Read Mandinka Mika 2 Bible Online

Mika 2 - Mandinka bible

Mika 2

¹Kooroo be boyi la moolu kaŋ ne, mennu ka tilimbaliyaa feeroo siti, aniŋ kuu kuruŋo, niŋ ì be laariŋ ì la laaraŋolu kaŋ. Niŋ fanoo keta, ì ye a taamandi ì la sembe sotoo kaŋ.

²Niŋ ì hameta kunku meŋ na, ì ka wo buusi a maarii bulu le. Niŋ ì lafita buŋo meŋ na, ì ka a taa le. Ì ka kewolu niŋ ì la dimbaayaalu toorandi, ì ka ì sotofeŋolu foriseetoo taa.

³Wo kamma la Yaawe* ye ñiŋ ne fo, “Alitolu moo kuruŋolu, ŋa maasiiboo le landi ali ñaato. A be ke la ali ye le komeŋ yookoo*, ali te ali kuŋo buusi noo la a koto, aduŋ ali te balafiriŋ taamoo ñaa soto la. Ñiŋ waatoo be ke la ali ye maasiiboo le ti.

⁴Ñiŋ luŋo la, moolu si ali ke jelefeŋo ti. Ì si ñiŋ teelindiri denkiloo laa, ì ye ì faŋ ke woosiilaalu ti ko, ‘Ntolu kasaarata le fereŋ. Yaawe ye ǹ na moolu la keetaabankoo duŋ bulu koteŋolu bulu, a buusita ǹ na. A ye ǹ na kunkoolu talaa ǹ jawoolu teema.’ ”

⁵Niŋ waatoo siita ka ñiŋ kenoolu murundi ka bo alikuuroo la, ali te moo soto la Yaawe la moolu kono, meŋ be soŋ na ka sumandiroo ke ali ye.

⁶Moolu ka nte kawandi le, ka a fo n ye ko, “I dahaa kawandoo la, kana ñiŋ kuu siifaa kawandi. Malu kuu te naa ntolu kaŋ.

⁷Fo Yaakuba koomalankoolu dankata le baŋ? Fo Yaawe la muñoo be bo kaŋ ne baŋ? Fo a ka kuwolu ke teŋ ne baŋ? Fo a la kumakaŋolu maŋ beteyaa moolu ye baŋ, mennu tilinta?”

⁸Yaawe ko: “Alitolu le keta moolu ti, mennu loota n na moolu ye jawuyaa daa to. Ali ye tambilaalu la dendika baalu wura ì la, mennu maŋ i yillaa kuu jawu-wo-kuu jawu ma, aniŋ ko keloo be ke la.

⁹Ali ye n na moolu la musoolu bayi ka bo ì la buŋolu kono, ì niiseewoo dulaalu. Ali ye n na neemoo buusi ì diŋolu la burayi.

¹⁰Ali wuli, ali ye taa! Dahaa dulaa te ali ye jaŋ. Ali faŋolu le ye a nondi ali la junube kuu kewolu la. A be kasaara la le, kasaara baa faŋo la.

¹¹Niŋ a ye a tara moo le sotota, kuma kenseŋ folaa aniŋ faniyaa folaa, meŋ be ali kawandi la ko wayinoo* be siyaa la, aniŋ dolo koteŋo, ali be laa la wo maarii le la annabiyomuyaa la.”

¹²Yaawe ye ñiŋ ne fo ko, “Alitolu Yaakuba koomalankoolu, a be koyiriŋ ne ko, m be ali bee kafu la ñoo ma le. M be Banisirayila moo toomaalu bee kafu la ñoo ma le. M be ali ñaatonkayaa la, ko niŋ ì be saajiyolu kenkeŋ kaŋ ì la buŋo kono, ko niŋ ì be beeyaŋ koorewo kenkeŋ kaŋ daañini dulaa to. Hadamadiŋolu maakaŋo doroŋ ne be moyi la ñiŋ dulaa to ì la siyaa kamma.”

¹³Alla le be siloo yele la, a ye tambi ì ñaato, bituŋ ì ye a nooma. Ì ye tambi niŋ saatee dundaŋ daa la, ì ye finti. Ì la Mansa, Yaawe faŋo le be tambi la ì ñaato.