Read Mandinka Mika 3 Bible Online

Mika 3 - Mandinka bible

Mika 3

¹Ali i lamoyi m ma, alitolu Yaakuba koomalanka maralilaalu, alitolu Banisirayila ñaatonkoolu. Fo ka a loŋ meŋ mu tiliŋo ti, wo maŋ tu ali faŋo le bulu baŋ?

²Alitolu mennu ka kuu kendoo koŋ, ali ye kuu kuruŋo kanu. Ali ye n na moolu baloo bee namaŋ-namaŋ, ko niŋ i be beeyaŋo busu la, ka ì kuloolu niŋ ì bala suboo talaa.

³Ali la ì busuriŋ koolaa, ali ye ì kuloolu teyiŋ-teyiŋ, ka ì bala suboolu kuntuŋ-kuntuŋ kudewolu ti, ka ì ke kaleeroo kono, ka ì ke nee walaa kaŋ, ali ye ì ñimi.

⁴Ali si naa kumboo Yaawe* ye, bari a te ali danku la wo waatoo. A si a ñaa kaasi ali la ali la ñiŋ kuu kuruŋ kewo kamma la.

⁵Annabiyomoo doolu le sotota, mennu ye n na moolu filindi. Niŋ ì be feŋ soto kaŋ meŋ bulu, ì ka kayiroo le laahidi wo ye, bari ì be foo la feŋ na a bulu doroŋ, ì be keloo wulindi la a kamma. Yaawe ye ñiŋ ne fo ñiŋ annabiyomoolu ye ko:

⁶“Ñiŋ kuwo kamma la, ali be tara la diboo le kono, ali te jeri ke noo la. Ali si tara diboo kono, ali te kuu fo noo la, meŋ be ke la ñaato. Tiloo si boyi ali ma, tiloo la maloo ye ke ali ye diboo ti.

⁷Alitolu juubeerilaalu, ali si malu, alitolu bitaarilaalu ye duŋ maloo kono. Ali si ali buloo duŋ ali daa koto, kaatu jaabiri te bo la nte Alla yaa.”

⁸Bari nte wo de, Yaawe le ye nte bambandi. A ye a la Nooroo le duŋ n na, a ye tooñaa hakiloo dii n na, aniŋ fatiyaa, ka tooñaa yitandi Banisirayila la, Yaakuba koomalankoolu, ì la muritoo niŋ ì la junube kuu kewo to.

⁹Ali i lamoyi ñiŋ na, alitolu Yaakuba koomalanka maralilaalu, alitolu Banisirayila ñaatonkoolu, alitolu tooñaakoŋ moolu, alitolu mennu ka tooñaa nakari.

¹⁰Ali ye Siyoni* loo yeleboŋo le kono, ali ye Yerusalaamu loo tilimbaliyaa kono.

¹¹A kuntiyolu ka kiitiyo kuntu dukoo le la, a piriisoolu* ka karandiroo ke kodoo le ye, aduŋ a annabiyomoolu fanaa ka ñaato kuwolu fo moolu ye kodoo le kamma. Ì la ñiŋ kuwolu bee keriŋo koolaa, hani wo bee ì ka tara jikiriŋ Yaawe la ka a fo ko, “Fo Yaawe le maŋ tara ntolu fee? Maasiiba kuu te laa la ntolu kaŋ.”

¹²Ali la kuwo kamma la, Yerusalaamu be ke la tumbuŋo le ti, Siyoni ye ke senebankoo ti, aduŋ Alla Batudulaa Buŋo* be looriŋ konkoo kaŋ daameŋ, jee be ke la sutoo le ti.