Read Mandinka Mika 6 Bible Online

Mika 6 - Mandinka bible

Mika 6

¹Ali i lamoyi kumoo la Yaawe* ye meŋ fo, a ye ñiŋ ne fo n ye ko: “Ali wuli, ali ye ali la kuwo kiitiyo laa konkoolu ñaa koto, konkoriŋolu ye ali la diyaamukaŋo moyi.”

²Ali i lamoyi, alitolu konkoolu, alitolu duniyaa fondamaŋolu mennu be tu la fo abadaa. Ali i lamoyi Yaawe la kiitiyo la, a ye meŋ landi a la moolu kamma, Banisirayilankoolu, a niŋ ì ka taa loo kiitii kenoo le to.

³Yaawe ye ñiŋ ne fo ko: “N na moolu, ŋa muŋ ne ke ali la? Ŋa ali batandi muŋ ne la? Ali n jaabi.

⁴Nte le ye ali bondi naŋ Misira, ka ali fintindi naŋ joŋyaa bankoo kaŋ. Ŋa Musa kii ka ali ñaatonkayaa, Haaruna aniŋ Miriyaamu.

⁵N na moolu, ali i miira Balaki Mowabi mansa ye feeroo meŋ siti ali kamma nuŋ, aniŋ Balaamu Bewori dinkewo ye a jaabi ñaameŋ.[17] Ali i miira ali la taamasiloo la, ka bo Sitimu ka taa Kilikali,[18] ali be a kalamuta la le, nte Yaawe ye baara kendoolu mennu ke.”

⁶“Nte niŋ muŋ ne be naa Yaawe ñaatiliŋo la, ka sujudi ñiŋ Mansa Baa ñaatiliŋo la? Fo n niŋ jani sadaalu* ye naa a ñaatiliŋo la baŋ, fo sanji kiliŋ ninsoolu?

⁷Fo Yaawe be seewoo la saakotoŋ wuliwuloolu boo la le baŋ, olifu* tulu daloolu, mennu maŋ dandulaa soto? Fo ŋa n dinkee foloo bo sadaa ti baŋ n na baara jawoolu kamma, m faŋo diŋo, ka ke n ye junube kafarilaŋo ti?”

⁸Ite hadamadiŋo, Yaawe ye a fo i ye le, meŋ mu kuu kendoo ti, aduŋ a ye meŋ kaniŋ i bulu, wo le mu, ka tooñaa taamandi, ka beteyaa kanu, aniŋ ka bula Alla nooma, i Maarii, fammajiyo kono.

⁹Ka sila Yaawe la, wo le mu ñaameŋo ti. Yaawe ye kiliroo ke Yerusalaamu saatewo to ko: “Ali i lamoyi, ali si sila busoo la, aniŋ busoo maarii.

¹⁰Naafuloo meŋ be moo kuruŋolu la buŋolu kono, ì maŋ ì soto niŋ tiliŋo siloo la. Ì ka sumandiroo ke sumandaŋ kuruŋolu le la, mennu haraamuta. N si n ñaa kaasi noo wo la ñaadii?

¹¹N si soŋ noo peesarilaŋ kuruŋo la kuwo la ñaadii, aniŋ sumandirilaŋ kuruŋolu?

¹²Ali la saatewo fentiyolu ye ì la fankoo soto fitinoo le la. Ali la saatee moolu ka faniyaa le fo, ka neeneeroo ke ì neŋ kolomoo la.

¹³“Ali la junube kuwolu kamma la, ŋa a dati le ka ali halaki busoo la, ŋa ali bula ali ye kasaara.

¹⁴Ali si domoroo ke fo, bari ali te faa la, ali be tara la konkoriŋ ne doroŋ. Ali be tu la feŋ yoronnoo le la, bari ì te ali nafaa la, aduŋ ali ye feŋ-wo-feŋ maabo, keloo mantooroo le be a bee taa la ali bulu.

¹⁵Ali si fiiroo ke, bari ali te a munafaŋo soto la. Ali si olifu yiridiŋolu biti, bari ali te a tuloo nafaa soto la. Ali si wayini* yiridiŋolu biti, bari ali te a jiyo miŋ na.

¹⁶Kaatu ali tarata Omuri[19] la sila kuruŋolu le nooma, aduŋ ali ye Ahabu[20] la dimbaayaa moolu jikoo le taa, ali bulata ì la yaamaroolu nooma. Wo kamma la, m be ali la saatewo ke la tumbuŋo le ti, a moolu ye ke jelefeŋo ti, aduŋ ali si muña tooñeeri kumoolu kaŋ, banku koteŋo moolu be mennu fo la ali ye.”