Read Mandinka Nahumu 1 Bible Online

Nahumu 1 - Mandinka bible

Nahumu 1

¹Kiilaariyaa kumoo fele Ninewe saatewo la kuwo to, kibaaroo, Alla ye meŋ lankenemayandi Nahumu Elikosinkoo ma.

²Yaawe* Alla kiiliyaata le, aduŋ a ka juloo joo le, a ka juloo joo, aduŋ a ka kamfaa le famfaŋ, a ka juloo joo balannaalu to le, aduŋ a jusoo ka kandi a jawoolu kamma le.

³Yaawe semboo warata le, aduŋ a la kamfaa maŋ tariyaa. A la jarabiroo te kuu kuruŋ kelaa hani kiliŋ ne kaari la. Saafoñotoo le mu a taaraŋ siloo ti, aniŋ sanji foñoto baa. A siŋo ka tawaloolu wulindi le ko niŋ kankaŋo be tii la.

⁴A si baa yaamari a ye jaa, a ye boloŋolu bee fanaa jandi, Basani la beeyaŋ daañini dulaa kendoolu ye noro, aniŋ Karimeli yiroolu, Libanooni fiifeŋ firoolu ye jiraŋ.

⁵Konkoolu ka jarajara a ñaatiliŋo la le, konkoriŋolu ye yeluŋ. Bankoo ka jarajara a ñaatiliŋo la le, duniyaa, aniŋ niilamaa feŋolu bee.

⁶A la kamfaa si kuŋ noo jumaa le to? Jumaa le si i loo noo a la jusuboo ye? A la kamfaa ka yelema naŋ ne ko dimbaa. Bere baalu ka juru ate ñaato le.

⁷Yaawe beteyaata le, tankandirilaa, maasiiba waatoo la. A ka moolu le kanta mennu ka ì jikoo loo ate doroŋ kaŋ.

⁸Bari a be a jawoolu bayi la le, ì ye duŋ diboo kono, a be ì siidulaa kasaara la niŋ waame baa le la.

⁹Muŋ ne ye a tinna feere jawoo be siti la Yaawe kamma? A be a jawoolu la kuwo daŋ na le, ì te wuli la kotenke.

¹⁰Ì si ke ko niŋ feŋo maranta ŋaniŋo kono, ì ye ke ko siiratoo, dimbaa ye ì domo ko ñaama jaaroo.

¹¹Ite Ninewe, moo fintita naŋ ite le kono, meŋ ye kuruŋyaa jamfaa siti ka Yaawe sooki. A ye moolu yaamari kuu kuruŋ kewo la.

¹²Yaawe ye ñiŋ ne fo Yahuuda moolu ye ko: “Yahuuda, nte le ye ali toorandi, bari n te a ke la kotenke. Ali jawoolu be siyaariŋ ñaa-wo-ñaa, ì be bambandiŋ, ì bee be kasaara la le, ì ye yeemaŋ.

¹³Ì la maraloo yookoo* meŋ be laariŋ ali kaŋ, m be a bondi la ali kaŋ ne, ŋa ì la joŋyaa juloo kuntu ali kaŋo la.”

¹⁴Yaawe ye ñiŋ ne yaamari ite Ninewe la kuwo to ko: “I te koomoo soto la meŋ be i too fintindi la. M be i la jalaŋ leseriŋolu kasaara la le, aniŋ i la nee jalaŋolu ka bo i la jalambuŋo to. Ŋa i la kaburoo parendi i kamma le, kaatu i maŋ jari ka baluu.”

¹⁵Yahuuda moolu, ali a juubee! Kiilaa fele ali ye, a niŋ kibaari betoo ka bo konkoolu kaŋ, ka kayiroo bankee ali ye. Ali ali la diina juuraloolu juura, ali ye ali la laahidoolu timmandi. Jawu te ali la bankoo kele la kotenke. Ì bee le be kasaara la.