Read Mandinka Nahumu 2 Bible Online

Nahumu 2 - Mandinka bible

Nahumu 2

¹Ite Ninewe, boyinkannaa le ka naa wuli i kamma. Wuli ko, i ye i la tatoo kanta, i kali siloo kaŋ juubee. I tewo siti, i ye i looraŋo bambandi.

²Ali ye Banisirayila kasaara le, Yaakuba koomalankoolu la bankoo, ali ye ì la wayini* yiroolu kasaara, bari Yaawe* ka naa a la semboo niŋ a la horomoo murundi a kaŋ ne.

³Ali jawoolu la koteeroolu* be wuleeriŋ ne, ì kelejawaroolu la duŋ feŋolu be wuleeriŋ. Ì la keleraŋ sareeti* newolu ka tara malamalariŋ ne, niŋ luŋo meŋ ì be pareeriŋ keloo la. Ì la hawusaroolu* ye tara wulindiriŋ santo.

⁴Ì la keleraŋ sareetoolu si tara boriŋ-boriŋ na mbeedoolu kaŋ taariŋ, ì ye tara kuntuŋ-kuntuŋ na. Ì si muluŋ ko pacama dimbaa, ì ye tara kuntuŋ-kuntuŋ na ko saŋ ŋalasoo.

⁵Kelediŋ kuntiyo si a la kelediŋ bambandiŋolu kumandi naŋ, ì kiditoo si bori saatewo tata sansaŋo to, tankaraŋ koteeroo* londita daameŋ.

⁶Boloŋo daalu si yele, mansabuŋo ye boyi piram.

⁷A be laariŋ wo le ñaama ko, ñiŋ saatewo moolu ñanta ke la dooyaa moolu le ti, ì ye tara mutoo kono, a jommusoolu ye woosii ko puraa, ì ye ì sisoolu lipa niikuyaa kamma la.

⁸Ninewe ka muluŋ ne ko jiidinkoo, meŋ jiyo ka bori. A moolu ka bori wo le ñaama, hani ì ko ì ye, “Ali loo, ali loo!” bari moo maŋ soto meŋ si loo ka muru.

⁹Ali ì la kodiforoolu ñapinkaŋ, ali ì la sanoolu ñapinkaŋ, naafuloo kuu te jaŋ. Feŋ-wo-feŋ kummaayaata, a jurumoo le be jaŋ.

¹⁰Ninewe teyita, a kenseŋyaata, a kasaarata. A moolu kijoo teyita, fo ì kumbaliŋolu ka busa ñoo la. Ì semboo bee taata, ì niyo kuyaata fo ì ñaadaa yelemata.

¹¹Ì la saatewo keta ñaadii le, meŋ ka muluŋ nuŋ ko jata koloo, jatadiŋolu daañini dulaa, jatoolu sabatidulaa, jatamusoolu niŋ jatadiŋolu, daameŋ moo buka haañi ka ì waliŋ jee?

¹²Jatoo ka daafeŋ koteŋolu le faa, a ye a diŋolu konoo fandi ì la, a ye ì kaŋo kati jatamusoolu ye. A ka a la koloo fandi deema suboo le la, a taradulaa ye tara faariŋ suboo la.

¹³Yaawe Alihawaa Maariyo* ye ñiŋ kumakaŋo le fo Ninewe la kuwo to ko: “N niŋ i be janjuŋ na le! M be i la keleraŋ sareetoolu bee jani la le fo ì ye nunku lep. Hawusaroo le be i la kelediŋolu bee faa la. M be feŋolu bee buusi la ali la le, ali ye mennu ñapinkaŋ keloo kono. Wandi bankoolu nene te ali la kiilaa la kumakaŋo moyi la kotenke.”