Read Mandinka Habakuki 1 Bible Online

Habakuki 1 - Mandinka bible

Habakuki 1

¹Yaawe* ye ñiŋ kiilaariyaa kumoo le lankenemayandi Annabilayi Habakuki ma.

²Hee Yaawe, kabiriŋ waati jaŋ m be deemaaroo ñini kaŋ i bulu, i be n danku la waati jumaa le? M be woosii kaŋ i ye ñiŋ ne la ko, fitinoo meeta minindiŋ moolu la le. Saayiŋ waati jumaa le mu, i be m̀ bo la a kono?

³Muŋ ne ye a tinna i ye n jerindi ñiŋ tilimbaliyaa la? Muŋ ne ye a tinna i ye i ñaa kaasi kuu kuruŋo la? N ñaa ka kasaaroo niŋ fitina kuwo doroŋ ne je daa-wo-daa, keloo niŋ sonkoo be wuli kaŋ doroŋ.

⁴Luwaa la kuwo lamfuta, tooñaa nene maŋ sabati, kuruŋolu ye kendoolu kada, tooñaa nakarita.

⁵“Ali bankoolu juubee, ali ye ì koroosi, ali si jaakali. M be naa kuu ke la ali tiloo la, niŋ moo ye a fo ali ye, ali te laa la a la.

⁶M be semboo dii la Babiloninkoolu le la, wo moo balafaabaloolu, aduŋ ì tariyaata. Ì ka taama duniyaa karoo bee le la ka moolu yaalu taa ì bulu.

⁷Ì ka silaŋo le duŋ moolu la, aniŋ kijafaroo. Ì la faŋ waroo kaŋ, ì ye ì fansuŋ luwaa londi, meŋ diyaata ì ye, ì ka taama wo le la.

⁸Ì la suwoolu le tariyaata ka tambi soloo la, aduŋ itolu le ñamoo fatiyaata ka tambi suluu konkoriŋo la. Ì la suu borindilaalu si bo naŋ dulaa jaŋ, ì la suwoolu sinkaŋo be kuma la bankoo kaŋ. Ì tariyaatoo si ì jawoolu waliŋ keloo la ko niŋ seeliŋo be jii la suboo kaŋ duuma.

⁹Ì kataatoomaa le ka naa, ì hameriŋo ye kirimbaasi ñaato. Ì ye moo mutariŋolu jurumi ñoo kaŋ ko bankumunkoo.

¹⁰Mansakewolu, ì ka wolu ñaawali le, maralilaalu, ì ye wolu ke jelefeŋolu ti. Tatoo, ì ka jele wo la le, ì ka bankoo le ke teputepoo ti, ì ye sele a la ka jee taa.

¹¹Ì tambitoo ì ka dulaa seneyandi le lewu ko foñoo, ì ye tenteŋ ka kuu kuruŋo ke. Ì ka tara taamaayaariŋ ì semboo le la, ko wo le mu ì la Alla ti.”

¹²Yaawe*, ite be keriŋ ne biriŋ, Yaawe, n na Alla, n na Senuŋ Baa, ite meŋ be tu la fo abadaa. Ite le ye Babiloninkoolu tomboŋ ka kiitii koleŋo laa ǹ kaŋ. Ite tankandirilaa, ite le ye semboo dii ì la ka naa ǹ jarabi.

¹³I jankuta wo ti le, i ñaa ye loo kuu kuruŋo kaŋ, i buka muña kuu kuruŋo kaŋ. Wo to muŋ ne ye a tinna i be soŋ na jamfaalaalu ye kuu ke noo? Muŋ ne ye a tinna i tuta deyiriŋ biriŋ ñiŋ moo kuruŋolu be moolu tumbuŋ kaŋ, mennu tilinta itolu ti.

¹⁴I ye moolu bula le ko baakono ñewolu, ko kuruntu feŋolu, maralilaa te mennu la.

¹⁵Babiloninkoolu ye moolu wafu naŋ, ko niŋ ñewo be dooliŋo daa. Ì ye moolu saba naŋ ko jaloo ka ñewolu kafu ñoo ma ñaameŋ, ì niŋ seewoo niŋ kontaanoo.

¹⁶Ì ye sadaalu* bo ì la jaloolu ye. Ì ye seera feŋ diimaalu siisindi ì ye, ko wolu le ka a tinna ì ka mutaroo ke kendeke, aniŋ ka domori kendoo soto.

¹⁷Fo ì be tu la ñiŋ ne la baŋ, ka ì la hawusaroolu* taa ka moolu faa bankoolu kaŋ balafaabaliyaa kono?