Read Mandinka Habakuki 2 Bible Online

Habakuki 2 - Mandinka bible

Habakuki 2

¹M be sele la n na kantari dulaa le to, ŋa tara kantaroo la jee. M be tara la batundiroo le la, ka a je Yaawe* be naa meŋ jaabi la, n na woosii diyaamoo kuwo to.

²Bituŋ Yaawe naata n jaabi ko: “Ŋa meŋ lankenemayandi i ma, a safee. A safee walaalu bala, a ye seneyaa set, hani borilaa tambitoo si meŋ karaŋ noo.

³Ñiŋ lankenemayandiroo ka a waatoo le batu. A diyaamuta labandulaa kuwolu le la, aduŋ a te ke la faniyaa ti. A kuwo naafata ñaa-wo-ñaa, hani wo a batu. A be koyiriŋ ne lewu ko a be naa le, a te baayi la muk.

⁴Kibaaroo fele: Faŋ wara moo maŋ tiliŋ, a be kasaara la le. Bari moo tilindiŋo be baluu la ka bo niŋ a la lannoo le la.

⁵Fankoo ka moo neenee le. Faŋ waralaa buka labaŋ kuu, kaatu ì ka tara hadumeriŋ ne doroŋ, ko kaburu dinkoo ka tara furewo batu kaŋ ñaameŋ, aniŋ saayaa, ì nene te wasa la muk. Ì si bankoolu bee kafu ñoo ma ì faŋolu ye, ì ye ì moolu bee ke ì taa ti.”

⁶“Wo bankoolu moolu si naa teelindiri denkiloo laa ì kamma, ka ì la kuwolu mansaalitoo fo ko: Kooroo be ali ye, alitolu mennu ka wandi feŋolu kafu ñoo ma, alitolu mennu ka ali faŋ fankandi sankayaa feŋolu la. Ali be i foño la ñiŋ na waati jumaa le?

⁷Ali ye mennu la naafuloolu taa, ì be teremmatoo wuli la naŋ ali kamma le. Ì si wuli naŋ ali kamma, ì ye ali kijabo, ali ye ke ì ye ñapinkaŋ feŋo ti.

⁸Ali ye banku jamaa le ñapinkaŋ, ì niŋ ì la feŋolu. Wo to moolu mennu kanata wo bankoolu moolu kono, fanaa be ali ñapinkaŋ na le. Kaatu ali ye hadamadiŋolu le yeloo boŋ, ali ye bankoolu kasaara, saatewolu, ì niŋ ì moolu bee.”

⁹“Kooroo be ali ye, alitolu mennu ka sotoo ke tilimbaliyaa kono, ka buŋolu loo a la fo santo, ko kunoolu ka ì la ñaŋolu laa ñaameŋ. Fo ali ye a miira wo le be ali tanka la maasiiboo ma baŋ?

¹⁰Ali la feeroolu sitoo ka moo jamaa kasaara, wo be ali la dimbaayaalu duŋ na maloo le kono, alitolu faŋolu ye foo ali niyolu la.

¹¹Hani beroolu mennu ka tara bumbaloolu bala, be kumboo la ali ma le. Kankaraŋ babaroolu ye i danku.”

¹²“Kooroo be ali ye, alitolu mennu ye saatewolu loo tilimbaliyaa kono. Ali ye yeloo boŋ ka ì loo.

¹³Ali ye bankoolu mennu taa, ì ye meŋ dookuu ali ye, ì ye ì faŋ batandi kensenke le, a keta ko loo, dimbaa ye meŋ domo. Kaatu Yaawe Alihawaa Maariyo* le ye a saabu.

¹⁴Duniyaa bee si faa londoo la, Yaawe la semboo niŋ a la waroo kuwo to, ko baa ka tara faariŋ jiyo la ñaameŋ.”

¹⁵“Kooroo be ali ye, alitolu mennu ka maañaa jawuyaa tiliŋ ali siiñoolu la, ka ì toorandi, fo ì ka muluŋ ko siiratoo. Kaatu ali lafita ka ì kenseŋo le je.

¹⁶Ali be duŋ na maloo le kono, ali te buuñaa soto la muk. Ali fanaalu taa le siita, ka muluŋ ko siiratoo, ali kenseŋo ye loo, ka ali la sunnabaliyaa yitandi. Mindaŋ pootoo meŋ be Yaawe bulubaa buloo kono, ka naa alitolu le kaŋ, ka jaraboo yelema naŋ ali kaŋ. Horomoo meŋ be ali kaŋ, be yelema la ali ye maloo le ti.

¹⁷Ali ye Libanooni yiroolu kuntu, ali ye a daafeŋolu kasaara. Ali ye hadamadiŋolu yeloo boŋ, ali ñapita bankoolu kaŋ, saatewolu, ì niŋ ì moolu bee. Wo kamma la, saayiŋ toora kuwo le be boyi la ali fanaa kaŋ.”

¹⁸“Jalaŋo ye muŋ nafaa le soto, hadamadiŋo faŋo la lese feŋo? A te feŋ yitandi noo la fo faniyaa. Jalaŋo ye muŋ nafaa le soto a dadaalaa ye, fo a be a jikoo loo la a kaŋ, feŋ meŋ buka diyaamu noo?

¹⁹Kooroo be ali ye, alitolu mennu ka a fo doko jaaroo ye ko, ‘Wuli,’ ali ka a fo bere jaaroo ye ko, ‘Loo.’ Wolu si muŋ ne yitandi noo ali la? Ì muuta sanoo la ñaa-wo-ñaa, aniŋ kodiforoo, hani wo bee maŋ ì ke niilamaa feŋ ti.”

²⁰Bari Yaawe*, ate be a taradulaa senuŋo to le. Duniyaa moolu bee ye i deyi a ñaatiliŋo la.