Read Mandinka Habakuki 3 Bible Online

Habakuki 3 - Mandinka bible

Habakuki 3

¹Ñiŋ ne mu Annabilayi Habakuki la duwaa ti, a suukuumaa le mu:

²Hee Yaawe*, ŋa a moyi le i ye meŋ ke, aduŋ a ye m masilaŋ ne. Hee Yaawe, a ke kotenke ntolu fanaa tiloo la, ǹ ñaa ye boyi a kaŋ ǹ na waatoolu la. Hani niŋ i kamfaata, balafaa soto ntolu ye.

³Alla naata ka bo Temani, Senuŋ Baa ka bo Parani Konkoo kaŋ.[1] S[2] A la kallankeeyaa* ye saŋ fatoolu muuri, duniyaa bee faata a jayi kaŋo la.

⁴A malamalañaa ka muluŋ ne ko tiloo, bammoo fintita naŋ a maafaŋo la, a la mansabaayaa semboo be maaboriŋ daameŋ to.

⁵Kuuraŋ jawoo tambita naŋ a ñaato, alibalaa ye a nooma naŋ kataba kiliŋ.

⁶A loota, a ye duniyaa jarajarandi, a ye a ñaa tiliŋ bankoolu la, ì jarajarata. Konko baalu, ì meeta looriŋ ñaa-wo-ñaa, ì katiŋ-katinta ñoo kono, konkoriŋ kotoolu jiita duuma, a la siloolu le mu kabiriŋ.

⁷Ŋa Kusaninkoolu je niitooroo kono, Midiyaninkoolu be jarajara kaŋ ì niŋ kijateyoo ì yaalu to.

⁸Yaawe, fo i kamfaata boloŋolu le kamma baŋ? Fo i ye fijoo jii baalu le kaŋ baŋ? I jusoo bota fankaasoo le kamma baŋ, biriŋ i be i la suwoolu kaŋ, aniŋ i la keleraŋ sareetoolu*, ka nooroo ke?

⁹I ye i la kaloo saba naŋ, i ye kalabeñoolu parendi, S i ye bankoo fara boloŋolu ti.

¹⁰Biriŋ konkoolu ñaa boyita i kaŋ, ì jarajarata le, jii jamaa bonta naŋ duuma. Fankaasoo bumbunta, a ye jiibaliŋo moolondi santo.

¹¹Karoo niŋ tiloo tuta ì noo kiliŋo le to, biriŋ i la kalabeñoolu tambitoo be malamala kaŋ, i la hawusaroo* be ŋalasi kaŋ ko saŋ ŋalasoo.

¹²Kamfaa kono, i ŋalabaasita duniyaa bee kaŋ. Jusuboo kono, i ye bankoolu toñonka.

¹³I naata le ka i la moolu kanandi, ka i la moo tombondiŋo tanka. I ye moo kuruŋolu ñaatonkoo kasaara le, ka a bulu kenseŋyandi. S

¹⁴Ite le ye a kuŋo soo a faŋo la kalabeñoo la, biriŋ a la kelediŋolu naata ǹ kaŋ niŋ semboo la, ka ǹ caarindi. Ì niŋ seewoo baa, ì pareeriŋo ka moo bataariŋolu kasaara, mennu be maaboriŋ.

¹⁵Ite le taamata baajiyo kono, i niŋ i la suwoolu, baajiyo bee kankanta.

¹⁶Kabiriŋ ŋa ñiŋ moyi, n kija le bota. N daaturoolu ka fadi ñoo la, maakaŋo ñiŋ kamma la. M baloo bee le lamfuta, n siŋolu faata n koto. Bari hani wo, m be muñariŋ ne ka luŋo batu, luŋo meŋ, maasiiboo be boyi la moolu kaŋ, mennu ñapita ǹ kaŋ.

¹⁷Hani niŋ sooto yiroolu maŋ firi faŋ, aduŋ diŋ te wayini* yiroolu bala, olifu* yiroolu maŋ diŋ, kunkoolu maŋ siimaŋ bondi, saajiyolu bee yeemanta saajii buŋo kono, ninsi fanaa te ninsi buŋolu kono,

¹⁸bari hani wo ñaa-wo-ñaa, nte be seewoo la Yaawe* la kuwo la le, m be seewoo la Alla la kuwo la le, n Kiisalaa.

¹⁹M Maarii Yaawe le mu nte semboo ti. A ye n siŋolu feeyandi m bulu ko minaŋo, ka n taamañaa sooneeyandi konkoolu kaŋ. Meŋ be suukuulaa ñaatonkayaa la: A si ke niŋ kontiŋolu la.