Read Mandinka Sefaniya 1 Bible Online

Sefaniya 1 - Mandinka bible

Sefaniya 1

¹Yaawe* ye ñiŋ kiilaariyaa kumoo le lankenemayandi Sefaniya ma. Sefaniya mu Kusi dinkewo le ti, Kusi mu Kedaliya dinkewo ti, Kedaliya mu Amariya dinkewo ti, Amariya mu Hesekiya dinkewo ti. Kiilaariyaa ñiŋ keta Mansa Yosiya, Amoni dinkewo la maraloo waatoo le la Yahuuda bankoo kaŋ.

²Yaawe ko: “Feŋ-wo-feŋ be duniyaa kono, m be a bee le bondi la jee.

³Hadamadiŋ wo, beeyaŋ wo, kunu wo, ñee wo, m be ì bee le bondi la duniyaa kono, ŋa moo kuruŋolu la kuwo jindi. M be hadamadiŋolu bee le kasaara la. Nte Yaawe le ye a fo.

⁴M bulu be laa la Yerusalaamunkoolu kaŋ ne, aniŋ Yahuuda bankoo moolu bee. M be Baali* jalambatoo bee daŋ na ñiŋ dulaalu to le. M be jalambatu kuntiyolu toolu bo la le, ŋa piriisoolu* kasaara mennu ye ì koo dii n na.

⁵M be moolu fanaa kasaara la le, mennu ka sujudi saŋo santo malafeŋolu ye, ì la buŋolu kaŋ santo, moolu fanaa mennu ka sujudi n ye, ì ka kali n na, ì ka naa muru ì ka kali Moleki jalaŋo fanaa la.

⁶Moo-wo-moo ye a koo dii nte Yaawe la, m be a kasaara la le, aniŋ mennu buka ì daa ke n na kuu to, sako ka n na yaamaroo ñini.”

⁷Ali i deyi Maarii Yaawe ñaatiliŋo la. Yaawe la luŋo sutiyaata naŋ ne. A be pareeriŋ ne ka a la moolu kanateyi ko beeyaŋ sadaa*, aduŋ a ye ì jawoolu le buuñaatoo kumandi a sadaa domoo to.

⁸Yaawe ko: “Ñiŋ sadaabo luŋo la, m be ñaatonkoolu le faa la, mansa dinkewolu, aniŋ mennu fanaa ye wandi aadoolu taa.

⁹Wo luŋo la, moo-wo-moo ka a siŋo sawundi bundaa kuŋo[1] la, jalaŋo silaŋñaa kamma la, aniŋ moo-wo-moo ka a maarii yaa fandi feŋolu la, a ye meŋ soto fitinoo niŋ nakaroo la, m be ì bee le jarabi la.”

¹⁰Yaawe ye ñiŋ ne fo ko: “Wo luŋo la, ali be kumboo kaŋo moyi la, Ñee Dundaŋ Daa to, Yerusalaamu, lembakaŋo Saatewo Bajonkoo to, aniŋ kasaaroo maakaŋo konkoolu to naŋ.

¹¹Ali kumboo alitolu mennu be Saatewo Duumoo to, kaatu ali la safaarilaalu bee le be faa la, kodiforo peesalaalu bee ye kasaara.

¹²Wo waatoo la, m be tara la Yerusalaamu ñini la niŋ lampu maloo le la. M be moolu jarabi la le, mennu be laariŋ ì faŋ na ko, ì la kuwolu be beteyaariŋ ne. Ì ka ñiŋ miira ko, Yaawe te kuu ke la, a jawumaa to baŋ, waraŋ fo a betemaa to.

¹³Ì la fankoo bee si ñapinkaŋ ì bulu, ì la buŋolu bee ye kasaara. Ì ye buŋolu mennu loo, ì te sabati la ì kono, ì ye wayini* yiroolu mennu tutu, ì te ì jiyo miŋ na.”

¹⁴Yaawe la ñiŋ luŋ baa be sutiyaa kaŋ naŋ ne, a ka naa le, a be sutiyaa kaŋ naŋ ne famfaŋ. Yaawe la ñiŋ luŋo la, kumboo kaŋo be moyi la le, a niikuyaa be wara la baake. Hani kelejawaroolu, ì be lemba la le.

¹⁵A be ke la Yaawe la kamfaa luŋo le ti, kataa niŋ niitooroo luŋo, tiñaaroo niŋ kasaaroo luŋo, diboo niŋ minaayoo, niikaa niŋ dibi fiŋo luŋo.

¹⁶Ñiŋ luŋo be tara la faariŋ kelebinoolu kumakaŋolu le la, kele wuuroo be tara la keriŋ, niŋ kelediŋolu be saatee tatariŋolu waliŋ kaŋ, aniŋ tata jaŋolu.

¹⁷Yaawe ye ñiŋ ne fo ko: “M be ñiŋ niitoora siifaa le samba la naŋ hadamadiŋolu kaŋ, ì si taama ko finkintewo, ì la junube kuwolu kamma la. Ì jawoolu ye naa ì yeloo boŋ ko jiyo, ì furewolu ye tara fayiriŋ bankoo to fo ì ye toli.”

¹⁸Yaawe la ñiŋ kamfaa luŋo la, sani te ì kanandi la sako kodiforo. Duniyaa bee le be kasaara la, a la kamfaa dimbaa la. Moo bee la baluwo ye daŋ waati kiliŋ, ka bo duniyaa kono.