Read Mandinka Sefaniya 2 Bible Online

Sefaniya 2 - Mandinka bible

Sefaniya 2

¹Alitolu banku moo malubaloolu, ali ali faŋo loŋ, ali ye ali faŋ kaañaŋ,

²janniŋ ì be ali bayi la, ko foñoo ka fuufulewo tindi ñaameŋ, janniŋ Yaawe* be jusubo la ali kamma, janniŋ Yaawe la kamfaa luŋo be futa la ali ma.

³Alitolu fammajiilaalu mennu be bankoo kaŋ, ali ka Yaawe la yaamaroolu nooma, ali tenteŋ ka Yaawe la kuwo ñiniŋ. Ali tu hameriŋ ka bula tiliŋo nooma, a niŋ fammajiyo. Fo tumandoo niŋ Yaawe la ñiŋ kamfaa luŋo siita, ali si tu tankoo kono.

⁴Kaasankoolu be ì la saatewo bula la, Asikeloni ye tumbuŋ. Asidodi be kenseŋyaa la tilibula baa le faŋo la, Ekironi moolu ye wudaayi.

⁵Kooroo be alitolu Filisitinkoolu[2] ye, alitolu mennu be siiriŋ baa daala Kanaani bankoo kaŋ. Yaawe la kumakaŋo ye alitolu le maa ko, “M be ali bee le kasaara la, hani moo te tu la.”

⁶Ali la baadaa borindoo, a be labaŋ na ke la beeyaŋ daañini dulaa le ti. Saajii kantalaalu kali ì la saajiyolu daañini jee, jee ye ke saajiyolu niŋ saajii kantalaalu sabatidulaa ti.

⁷A be ke la Yahuuda moolu le taa ti mennu tuta baluuriŋ. Ì be kali la ì la beeyaŋolu daañini la jee le, ì ye i laa Asikeloni buŋolu kono wulaaroo. Yaawe, ì la Alla le be ì topatoo la, a ye ì la neemoo murundi ì kaŋ.

⁸Yaawe ko: “Ŋa Mowabi la nendiroolu moyi le, aniŋ Ammoninkoolu la hadaañiri kumoolu, ka n na moolu neŋ, ka kibiri ì la bankoo la.

⁹Wo kamma la nte Yaawe Alihawaa Maariyo*, Banisirayila la Alla ye ñiŋ ne fo ko: A be koyiriŋ ñaameŋ ko nte be baluuriŋ ne, Mowabi be ke la le ko Sodomu, Ammoninkoolu ye ke ko Komora.[3] Jeelu si ke ñaamoolu falindulaa ti, aniŋ koo lewo, jeelu ye kenseŋyaa fo fawu. N na moolu mennu tuta baluuriŋ, wolu le be ì ñapinkaŋ na, n na moolu mennu tuta baluwo to, wolu le be ì la bankoo keetaa la.”

¹⁰Ì la faŋ waroo joo be ke la ñiŋ ne ti, ì la Yaawe Alihawaa Maariyo la moolu neŋo kaŋ, ka ì hadaañi:

¹¹Yaawe be ì jaakalindi la le famfaŋ, a ye duniyaakono alloolu bee kasaara, ì ye mennu muta Alla ti. Bituŋ bankoolu moolu bee si naa sujudi ate doroŋ ye, moo-wo-moo a si a ke a faŋo la bankoo kaŋ.

¹²Alitolu Kusinkoolu* fanaa, Yaawe ye ñiŋ ne fo ko, “N na hawusaroo* le be ali faa la.”

¹³Yaawe bulu be laa la maraa la maafankoolu kaŋ ne, a ye Asiriya kasaara, a ye Ninewe kenseŋyandi, a ye jee jandi ko keñewuloo*.

¹⁴Jee ye ke beeyaŋ koorewolu laadulaa ti, aniŋ wulakono daafeŋolu siifaa bee. Sonkosonkoolu niŋ ballabaariŋolu ye i laa a tumbuŋolu to, kiikiyaŋolu si kuma a palanteeroolu to, kaanaalu ye kuma a bundaa kuŋolu to, ì la bunkono sedari* babaroolu ye koloŋ.

¹⁵Ñiŋ ne mu wo saatee taamaayaariŋo ti, meŋ tarata tankoo kono. A ko a faŋ ma ko, “Nte doroŋ ne mu, doo koteŋ maŋ soto.” A juubee a naata ke tumbuŋo ti ñaameŋ, a keta wulakono daafeŋolu taradulaa ti. Moo-wo-moo tambita niŋ jee la, a si foofooroo ke, a ye a kuŋo jiijaa.