Read Mandinka Jakariya 13 Bible Online

Jakariya 13 - Mandinka bible

Jakariya 13

¹“Wo luŋo la, woyoo le be finti la Dawuda koomalankoolu ye, aniŋ Yerusalaamunkoolu, ka ì seneyandi ì la junuboolu to, aniŋ ì la jankubaliyaa.”

²Yaawe* Alihawaa Maariyo* ye ñiŋ ne fo ko, “Wo luŋo la, m be daŋ ke la jalaŋolu toolu la bankoo kaŋ ne, fo moo hakili kana bula ì la kotenke. Aduŋ m be faniyaa annabiyomoolu bondi la bankoo kaŋ ne, aniŋ noora jankubaloolu.

³Niŋ annabiyomu meŋ fintita naŋ kotenke, a baa niŋ a faa si a fo ì ye ko, ‘Ite maŋ ñaŋ ka baluu, kaatu ite ka faniyaa fo Yaawe too le la.’ A baa niŋ a faa, mennu ye a wuluu si a soo ka a faa a la bankeeroo kaŋ.

⁴Wo luŋo la, annabiyomoolu ye jeri-wo-jeri bankee, a si ke ì ye malu kuwo ti. Ì te annabiyomu dendikoo duŋ na kotenke ka moolu neenee.

⁵Ì meŋ-wo-meŋ si a fo ko, ‘M maŋ ke annabiyomu ti, nte mu senelaa le ti. Biriŋ n dindiŋ n ka m baluu senoo le la.’

⁶Niŋ meŋ ye a ñininkaa ko, ‘Muŋ barama noo le be i sisoo bala teŋ?’ a si a jaabi ko, ‘Ŋa ñiŋ soto n teerimaalu la buŋo le kono.’ ”

⁷Yaawe Alihawaa Maariyo ye ñiŋ ne fo ko: “Hawusari*, kuniŋ i ye wuli n na kantarilaa kamma, wuli a kamma, n na moo sutuŋo le mu. A seyi, saajiyolu ye janjaŋ. Hani domandimmaalu faŋo, m bulu be laa la ì kaŋ ne.”

⁸Yaawe ko, “Niŋ ñiŋ bankoo moolu mu talaadaa saba ti, talaadaa fuloo bee be faa la le, talaadaa sabanjaŋo ye tu baluwo to.

⁹Talaadaa sabanjaŋo, m be wolu seneyandi la dimbaa le la, ko ì ka kodiforoo seneyandi ñaameŋ. M be ì kotobo la le, ko ì ka sanoo kotobo ñaameŋ. Ì be n too kumandi la le, aduŋ m be n danku la ì ma le. N si a fo ko, ‘Ì mu n na moolu le ti.’ Ì fanaa si a fo ko, ‘Yaawe le mu ǹ na Alla ti.’ ”