Read Mandinka Jakariya 8 Bible Online

Jakariya 8 - Mandinka bible

Jakariya 8

¹Yaawe* Alihawaa Maariyo* la kumoo naata n kaŋ.

²Yaawe Alihawaa Maariyo ye ñiŋ ne fo ko: Siyoni* la kuwo mu n ye suulakuwo le ti. A keta n ye suula kuu baa le ti. N kamfaabaata a jawoolu kamma le.

³Yaawe ye ñiŋ ne fo ko: M be muru la Siyoni Konkoo kaŋ ne, jee be kumandi la Yaawe Alihawaa Maariyo la konko senuŋo* le la. M be sabati la Yerusalaamu le, jee be kumandi la saatee tilindiŋo le la.

⁴Yaawe Alihawaa Maariyo ye ñiŋ ne fo ko: Keebaariŋolu niŋ musu keebaariŋolu be sii la Yerusalaamu mbeedoolu kaŋ ne kotenke, ì moo-wo-moo niŋ a la taamaraŋ dokoo, ì la keebaayaa kaŋ.

⁵Saatewo si faa sunkutundiŋolu niŋ kambaanendiŋolu la, ì ye tara feeyaa la a mbeedoolu kaŋ.

⁶Yaawe Alihawaa Maariyo ye ñiŋ ne fo ko: Moo toomaalu mennu tuta ali kono saayiŋ si a miira ko, wo te ke noo la. Bari nte Yaawe Alihawaa Maariyo buka kori kuu la.

⁷Yaawe Alihawaa Maariyo ye ñiŋ ne fo ko: M be n na moolu kiisa la naŋ ne ka bo bankoo kaŋ, meŋ be tilibo karoo la, aniŋ bankoo meŋ be tilijii karoo la.

⁸M be ì murundi la naŋ ne, ì ye sabati Yerusalaamu. Ì si ke n na moolu ti, ŋa ke ì la Alla ti foroyaa kono, aniŋ tiliŋo.

⁹Yaawe Alihawaa Maariyo ye ñiŋ ne fo ko: Ali ali tewolu siti kendeke, alitolu mennu be kumoolu moyi kaŋ teŋ, annabiyomoolu ye mennu fo nuŋ, biriŋ fondamaŋo be laa kaŋ, ka Yaawe Alihawaa Maariyo Batudulaa Buŋo* lookuu.

¹⁰Janniŋ ì ka a dati ka Batudulaa ñiŋ lookuu, dookuulaa be joo la meŋ na, waraŋ beeyaŋolu la luwaasoo, wo faŋo le maŋ soto. Taa niŋ naa faŋo maŋ koyi, jawoolu la kuwo kamma la. Ŋa a ke le, moolu ka boyi ñoo kaŋ.

¹¹Bari saayiŋ, alitolu moo toomaalu, mennu tuta baluuriŋ, n te ali jarabi la, ko ŋa a ke nuŋ ñaameŋ. Nte Yaawe Alihawaa Maariyo le ye a fo.

¹²Ali be fiiroo ke la kayiroo kono le, wayini* yiroolu ye diŋ kendeke. M be ali la bankoo barakandi la le, saŋo ye sanjiyo jindi. Ñiŋ bee be ke la alitolu moo toomaalu le taa ti.

¹³Ite Yahuuda niŋ Banisirayila, ì ka ali ke nuŋ danka moolu misaaloo le ti bankoolu kaŋ taariŋ, bari m be ali kiisa la le, ali ye ke neema moolu ti. Ali kana sila, ali ali tewolu siti.

¹⁴Yaawe Alihawaa Maariyo ye ñiŋ ne fo ko: Biriŋ ali mumuñolu ye n kamfandi, ŋa ñiŋ ne feere nuŋ ka ì jarabi, aduŋ m maŋ a baayi, ŋa ì jarabi le.

¹⁵A fele kotenke, ŋa feeroo landi, bari ñiŋ siloo, ali kana sila. M be timinandiyaa la Yerusalaamu fee le, aniŋ Yahuuda moolu.

¹⁶Ali ñanta ñiŋ kuwolu le ke la: Ali tooñaa fo ñoo ye, ali ye tiliŋo taamandi kiitiidulaa to, ka kayiroo sabatindi.

¹⁷Ali kana i miira ñiŋ na faŋ, ka kuu jawoo ke ñoo la. Ka i kali faniyaa kaŋ, wo kana ke ali daajikoo ti. Ŋa ñiŋ bee le koŋ. Nte Yaawe le ye a fo.

¹⁸Yaawe Alihawaa Maariyo la kumoo naata n kaŋ kotenke:

¹⁹Yaawe Alihawaa Maariyo ye ñiŋ ne fo ko: Ali ka luŋolu mennu suŋ saŋo kari naaninjaŋo,[9] kari luulunjaŋo, kari woorowulanjaŋo,[10] aniŋ kari tanjaŋo[11] la, wolu be ke la seewoo niŋ kontaani waatoo le ti, ka ke Yahuuda moolu ye juurali luŋolu ti. Wo to ali tooñaa niŋ kayiroo kanu.

²⁰Yaawe Alihawaa Maariyo ye ñiŋ ne fo ko: Sii jamaa be bo la naŋ bankoolu kaŋ taariŋ, saatee jamaa moolu be naa la le.

²¹Moolu be bo la saatee ka taa saatee, ka a fo ñoo ye ko, “Ali ŋà taa duwaa Yaawe la neemoo la, ali ŋà Yaawe Alihawaa Maariyo batu. Nte fele, n ka taa.”

²²Banku sembemaalu niŋ sii jamaa be naa le, ka Yaawe Alihawaa Maariyo batu Yerusalaamu, aniŋ ka a la neemoo duwaa.

²³Yaawe Alihawaa Maariyo ye ñiŋ ne fo ko: Ñiŋ waatoo la, sii koteŋolu moo taŋ si i miniŋ Yahuudoo la waramba tuloo la, ka a fo a ye ko, “M̀ batu ŋà bula ali nooma, kaatu ŋà a moyi le ko, Alla be ali fee le.”