Read Mandinka Jakariya 9 Bible Online

Jakariya 9 - Mandinka bible

Jakariya 9

¹Yaawe* la kumoo fele, a ye meŋ fo Hadiraki tundoo ma, aniŋ Damasiku saatewo. A ñaa be looriŋ hadamadiŋolu bee kaŋ ne, ko a ñaa be Banisirayila lasiloolu bee kaŋ ñaameŋ.[12]

²A ye a fo Hamati fanaa ma le, Hamati, meŋ niŋ Hadiraki be naaneeriŋ. A ye a fo Tire niŋ Sidoni saatewolu fanaa ma le, ì niŋ ì la hakilimaayaa bee.

³Tire ye tatoo loo ka a faŋ sansaŋ, a ye kodiforoo jurumi ñoo kaŋ ko bankumunkoo sanoo, ko mbeedi kaŋ buutoo.

⁴Bari saayiŋ, Maariyo be a sotofeŋo bee konkoŋ na le, a be a la fankoo fayi la baa le kono, a ye saatewo ñiŋ jani.

⁵Asikeloninkoolu be ñiŋ je la le, ì ye sila, Kaasankoolu fanaa be ñiŋ je la le, ì niŋ dimiŋo ye tara ko musoo, tiŋo be meŋ na. Ekironi fanaa be ke la wo le ñaama, kaatu a jikidaa yeemanta le. Kaasa la mansa be kasaara la le. Asikeloni saatewo ye kenseŋyaa.

⁶Jankadiŋolu le be sabati la Asidodi. Yaawe ko: “M be daŋ ke la Filisitinkoolu la faŋ waroo la le.

⁷Ì ye subu yelemaa meŋ ñimi, ì ye domori haraamuriŋo meŋ domo, m be a bee le bondi la ì daa kono. M be a saba la naŋ ne ka bo ì ñiŋ kesoolu teema. Filisitinkoolu mennu be tu la baluwo to, be tu la nte Yaawe le ye. Ì be ke la le ko kaabiiloo Yahuuda kono. Ekironinkoolu be ke la ko Yebusinkoolu[13] Yerusalaamu kono.

⁸Bituŋ ŋa daakaa n na bankoo kaŋ kantarilaa ti, moo te taa niŋ naa la jee. Hani toorandirilaa kiliŋ te boyi la a kaŋ, kaatu m faŋo ñaa ye ì la bataa je le.”

⁹Yaawe ko: “Ite Dimmusuriŋ* Siyoni*, seewoo kendeke! Ite Dimmusuriŋ Yerusalaamu, wuuri kontaanoo ti. Ali la mansa fele, a be ali waliŋ kaŋ naŋ. A tilinta, kiisoo be a bulu, a niŋ fammajiyo be faloo koo to, falindiŋo le mu, falimusoo diŋo.

¹⁰M be keleraŋ sareetoolu* buruka la Efurayimu* le, ŋa Yerusalaamu la keleraŋ suwoolu fanaa buruka, ŋa daŋ ke kalabeñoo la. Ali la mansa be kayiroo naati la bankoolu kaŋ ne, biriŋ fankaasi ka taa fankaasi, ka bo Yufurati Boloŋo to ka taa fo duniyaa daŋo to.

¹¹“N na moolu, n niŋ ali ye kambeŋo siti le, ŋà a bambandi beeyaŋ sadaa* yeloo la. Wo kamma la, m be ali la moolu firiŋ na mutoo kono le, meŋ be ko koloŋo, jii te daameŋ.

¹²Alitolu mutamoolu, ali niŋ jikoo, ali muru naŋ ali la saatee tatariŋo kono. Bii m be ñiŋ laahidi la ko, ali la niitoora-wo-niitoora, m be a jooseyi la neemoo la le ko siiñaa fula.

¹³Ŋa Yahuuda ŋooji le ka ke n na kaloo ti, ŋa Efurayimu ke n na kalabeñoo ti. M be Siyoni dinkewolu ke la le ko kelejawaroo la hawusaroo*, ka Jirisi bankoo dinkewolu kele.”

¹⁴Yaawe be finti la naŋ ne, a ye tara a la moolu kunto, a la kalabeñoo ye ŋalasi ko saŋ ŋalasoo. Maarii Alla si kelebinoo fee, a ye wuli naŋ a jawoolu kamma ko turubaadoo, meŋ ka bo naŋ bulubaa karoo la.

¹⁵Yaawe Alihawaa Maariyo* be a la moolu kanta la le. Ì be ì jawoolu la kampuraŋ beroo muta la le, ì ye dori ì kaŋ. Ì si ì jawoolu yeloo boŋ, ì ye faa yeloo la ko keraŋo, ì ka meŋ taa ka yeloo sariŋ-sariŋ sadaajanidulaa* tonkoŋolu to. Ì jawoolu yeloo si ì siirandi, ì ye wuuri ko dolomintoolu.

¹⁶Wo luŋo la, Yaawe, ì la Alla be ì tanka la le, kaatu a la dimbaayaa moolu le mu ì ti. Ì si ñeliñeli a la bankoo kaŋ ko bere ñiimaalu, ì ka mansanaafoo ñarandi mennu la.

¹⁷A si ke kuu bete ti, aniŋ kuu ñiimaa. Bankoo siimaŋo niŋ a wayini* kutoo, si a fondinkewolu bambandi, a ye ì yiriwandi.