Read Mandinka 5 Musa 21 Bible Online

5 Musa 21 - Mandinka bible

5 Musa 21

¹Musa ko Banisirayilankoolu ye ko: Yaawe* be naa bankoo meŋ dii la ali la teŋ, niŋ moo furewo jeta kenekoomoo to, meŋ faalaa maŋ loŋ,

²ali la alifaalu niŋ kiitindirilaalu si finti naŋ, ì ye furewo ñiŋ niŋ saatewolu teemoo sumaŋ, mennu be wo maafaŋo la.

³Bituŋ saatewo meŋ sutiyaata wo dinkiraa la, furewo jeta daameŋ, wo saatewo alifaalu si ninsiriŋo tomboŋ, yookoo* nene maŋ laa meŋ toŋo to ka a dookundi.

⁴Ì si wo ninsiriŋo samba wulumbaŋo to meŋ buka jaa, moo nene maŋ jee sene waraŋ ka jee fii. Bituŋ ì si ninsiriŋo ñiŋ kaŋo kati jee.

⁵Lewi koomalankoolu mennu mu piriisoolu* ti, wolu fanaa ñanta taa la jee le. Kaatu itolu le ñanta ñiŋ kuu siifaalu kiitiyo kuntu la, mennu keta ñoosaboo niŋ fitinoo ti. Yaawe faŋo le ye ì tomboŋ ka ì ke a la dookuulaalu ti aniŋ ka neemoo duwaa moolu ye a too la.

⁶Saatewo meŋ sutiyaata dinkiraa la, furewo jeta daameŋ, a alifaalu si ì buloolu kuu ninsiriŋ furewo ñiŋ kaŋ, ì ye meŋ kaŋo kati.

⁷Ì si a fo ko, “Ntolu maŋ ñiŋ moo faa, aduŋ ǹ ñaa fanaa maŋ seedeyaa a faalaa la.

⁸Yaawe, yamfa i la moolu ye, Banisirayilankoolu, i ye mennu kumakaa naŋ Misira bankoo kaŋ. Dukaree, kana ñiŋ moofaa dunoo laa ǹ kaŋ.” Bituŋ Yaawe si ñiŋ moofaa dunoo bo Banisirayila kaŋ.

⁹Yaawe ye meŋ kaniŋ, niŋ ali baarata wo la tiliŋo kono, ñiŋ yeleboŋo dunoo be bo la ali kaŋ ne.

¹⁰Niŋ ali taata ali jawoolu kele, Yaawe ali la Alla ye ì duŋ ali bulu, ali si ì muta noo ka ì samba.

¹¹Niŋ ali kono kee ye sunkutu ñiimaa je wo mutamoolu kono meŋ ye a ñaabo, a lafita ka a futuu,

¹²a si wo sunkutoo taa noo le, a ye a samba a yaa. Sunkutoo si a kuŋo nunku, a ye a ŋonsiŋolu kuntu,

¹³a ye a duŋ feŋolu wura mennu be a la nuŋ, biriŋ ì be a muta la. A si sabati wo suwo kono, a ye a wuluulaalu la saŋo kumboo fo kari kiliŋ. Wo koolaa, kewo ñiŋ si naa a futuu ka a ke a la musoo ti.

¹⁴Niŋ sunkutoo ñiŋ na kuwo maŋ kewo ñiŋ ñaa faa kotenke, a si a bula noo le, a ye taa daa-wo-daa diyaata a ye. A maŋ ñaŋ na a ke la joŋo ti, aduŋ a maŋ ñaŋ ka a waafi, baawo a ye a loŋ musoo ti le.

¹⁵Niŋ kewo ye musu fula futuu, a si ke noo, a ye doo kanu doo ti. Niŋ ñiŋ musu fuloo bee ye diŋolu soto a la, a si ke noo le a dinkee foloo wo maŋ ke a la kanumusoo diŋo ti.

¹⁶Luŋo meŋ na, kewo ñiŋ be a sotofeŋolu talaa la a dinkewolu teema, a maŋ ñaŋ na a kanumusoo dinkewo ke la a dinkee foloo ti, a maŋ a dinkee foloo baamaa kanu ñaa-wo-ñaa.

¹⁷A ñanta a dinkee foloo muta la a dinkee foloo le ti, a la talaaroo to a ye siidulaa fula dii a la, wo baamaa maŋ ke a kanumusoo ti ñaa-wo-ñaa. Ate le mu dinkee foloo ti, a ñanta wo ñantoo soto la le.

¹⁸Niŋ kewo ye dinkee kunjaaroo soto, a keta balannaa ti, ì ye kuluuroo laa a kaŋ ñaa-wo-ñaa, a buka a wuluulaalu la yaamaroo muta,

¹⁹a wuluulaalu ñanta a muta la le, ì ye a samba ì la saatee dundaŋ daa to, ì la alifaalu ka beŋ daameŋ ka kiitiyo ke.

²⁰Ì si a fo alifaalu ye ko, “Ǹ ñiŋ dinkewo kuŋo jaata le, aduŋ a keta balannaa ti, a buka soŋ ka ǹ na yaamaroo muta. A keta konomoo le ti, aduŋ a ka siira jawuke.”

²¹Bituŋ wo saatewo kewolu bee si beroolu taa ka a kurulabuŋ fo a ye faa. Ali be kuruŋyaa bondi la ali kono teŋ ne. Banisirayilankoolu bee si ñiŋ moyi, ì ye sila.

²²Niŋ moo ye kuu kuruŋo ke meŋ jarita ka a faa, aduŋ ali naata a faa, ali ye a deŋ yiroo bala,

²³a furewo maŋ ñaŋ na suutoo ke la dendiŋ yiroo bala. Ali ñanta a baadee la wo luŋo faŋo le la. Kaatu moo-wo-moo meŋ be dendiŋ yiroo bala, Alla la dankoo be wo kaŋ ne. Ali kana bankoo kosondi ñiŋ kuu siifaa la, Yaawe ali la Alla be meŋ dii la ali la ka ke ali taa ti.