Read Mandinka 5 Musa 32 Bible Online

5 Musa 32 - Mandinka bible

5 Musa 32

¹Saŋo niŋ bankoo, ali i lamoyi n na, ali ali tuloo loo m fokumoolu la!

²Allamaa n na karandiroo ye jii ali kaŋ ko sanjiyo, m fokumoolu ye ke ko komboo, ko samaa jiyo ñaamoolu kaŋ, ko sanji yofuyofoo fiifeŋ mereŋolu kaŋ.

³M be Yaawe* too tentu la le: Ali ǹ na Alla jayi a la waroo kaŋ.

⁴Ate le mu Semberaŋ Bere Baa ti, a kekuwolu maŋ sootaari soto, a la siloolu bee tilinta. Alla foroyaata le, faniyaa te a la kuwo to, ate mu tiliŋo niŋ tooñaa le ti.

⁵Bari alitolu ye junube kuwolu le ke, ali maŋ ke Yaawe la moolu ti kotenke, ali la kuruŋyaa kamma la, alitolu foroyaabaloolu, jamaani jenkeriŋo.

⁶Alitolu toolee hakilintaŋolu, fo ali ñanta Yaawe joo la teŋ ne baŋ? Fo ate le maŋ ke ali faamaa ti, ali Daamansoo? Fo ate le maŋ ali daa ka ali ke banku baa ti?

⁷Ali i miira kunuŋ na waati jaŋ koomanto, ali i miira jamaanoolu la, mennu tambita, ali ali wuluulaalu ñininkaa, ì be a yitandi la ali la le, ali ali la alifaalu ñininkaa, ì be a fo la ali ye le.

⁸Alla Mansa Tallaa ye duniyaa talaa bankoolu ti, a ye hadamadiŋolu talaa siyolu ti, a ye naanewolu ke ì teema, ko Banisirayilankoolu[41] yaatewo be ñaameŋ.

⁹Bari Yaawe taa, wo keta a la moolu le ti, Yaakuba[42] koomalankoolu, wolu le mu a niyo ti.

¹⁰A ye ì tara keñewuloo* le kono, a ye ì je dulaa le to, feŋ te daameŋ fo daafeŋ saŋaroolu kumakaŋo. A ye ì sansaŋ, a ye ì hati, a ka a hakiloo tu ì to, ko moo ka a hakiloo tu a ñaakesoo to ñaameŋ.

¹¹Yaawe keta ali ye le ko seeliŋo, ka a diŋolu maamandi ñaŋo kono, ka ì nindi tiyo la, a ka yaara a diŋolu kunto ñaameŋ, a ka duŋ a diŋolu koto ñaameŋ, ka ì samba a dampaŋolu la.

¹²Yaawe dammaa le ye ali kenkeŋ, alla koteŋ maŋ kafu a ma.

¹³A ye ali sabatindi konkoolu kaŋ, ali ka bankoo munafaŋolu domo, ali ka liyo suusuu konko faroolu to, ali la olifu* yiroolu ñiiñaata hani beroolu teema.

¹⁴Ali ka ninsoolu nonoo miŋ, ka taa bula saajiyolu niŋ baalu la. Ali la saajiiriŋolu niŋ baalu bee niŋ keŋo le mu. Basani tundoo saakotoŋolu, niŋ baakotoŋolu le be ali bulu, ali la siimaŋ kesoolu, ñoŋ te wo la, wayini* jii wuleŋo, ali ka wo le miŋ.

¹⁵Wo le to Yesuruni[43] naata nunku, a menta, a nunkuta, a be faariŋ tep, bituŋ a badalita. A ye a koo dii Alla la, a Daamansoo, a jututa a Semberaŋ Bere Baa la, a Kiisabaa.

¹⁶Ali ka a kiiliyandi alla koteŋolu la, ali ka a kamfandi kuu haraamuriŋolu la.

¹⁷Ali ka sadaalu* bo seetaanoolu ye, ì maŋ ke Alla ti, alloolu, ali nene maŋ mennu loŋ, alla kutoolu, mennu finti waatoo maŋ mee, ali mumuñolu nene maŋ sila mennu la.

¹⁸Ali ñinata Yaawe la, ali Daamansoo, ali ye ali ñaa kaasi, Semberaŋ Bere Baa la, meŋ ye ali daa.

¹⁹Alitolu le mu nuŋ Yaawe la dindiŋolu ti, bari ali ye a kamfandi, biriŋ a ye wo je, a ye i bo ali to.

²⁰A kumata ko, “M be m maabo la ì ma le, ŋa ì labaŋo juubee, jamaani jenkeriŋolu le mu ì ti, moolu le mu ì ti, foroyaa te mennu bala.

²¹Ali ka n kiiliyandi feŋ na, meŋ maŋ ke Alla ti, ali ka m kamfandi ali la jalaŋolu la. M fanaa be ali kiiliyandi la moolu le la, mennu te mooyaa daa to, m be toolee bankoo le taa la ka ali kamfandi ì la.

²²N na kamfaa be mala la naŋ ne ko dimbaa, ka duniyaa jani fo fureeduu to, ka duniyaa niŋ a fiifeŋolu bee domo, ka taa wo la fo konkoolu fondamaŋolu to.

²³“M be maasiiboo le kupi la ali kaŋ, m be ali buŋ na n na kalabeñoo bee le la:

²⁴Konkoo si ali labara, balakandoo niŋ kuuraŋ jawoo si ali kasaara. Daafeŋ saŋaroolu si ali faraŋ-faraŋ, saa kunamaalu ye ali kiŋ.

²⁵Hawusaroo* si faaroo ke mbeedoolu kaŋ, kijafaroo ye tara suwolu kono, dimmusuriŋolu niŋ dinkeeriŋolu, suusuudiŋolu niŋ keebaa tii koyoolu, ì bee le be faa la.

²⁶N si ñiŋ noo le, ka ali janjandi dulaa jaŋolu to, moo hakili kana bula ali la kotenke.

²⁷Bari ali jawoolu, wolu te a fahaamu la ko, nte Yaawe la keroo le mu. Ì si kibiri, ì ye a fo ko, ‘A fele ŋà Banisirayila noo.’ ”

²⁸Banisirayila keta hakilintaŋolu le ti, ì maŋ fahaamuru soto.

²⁹Niŋ ì ñaamenta nuŋ, ì be ñiŋ fahaamu la le nuŋ, tennuŋ ì be ì labaŋo suutee la le.

³⁰Moo kiliŋo, wo si moo wuli kiliŋ bayi noo ñaadii le, moo fula ye wuliwuloolu borindi, fo niŋ Yaawe, ì la semberaŋ beroo bota ì koto, a ye ì duŋ ì jawoolu bulu?

³¹Hani ǹ jawoolu faŋo sonta le ko, Yaawe, ǹ na semberaŋ beroo, wo niŋ ì semberaŋ beroo maŋ kiliŋ.

³²Ì be kuruŋyaariŋ ne ko Sodomunkoolu niŋ Komorankoolu. Ì mulunta le ko wayini yiroo, a diŋolu be kuniyaariŋ ne, ì be faariŋ kunoo la.

³³A wayinoo be le ko biidaa kunoo, ko daŋaroo kunoo.

³⁴Yaawe be londiŋ ì la ñiŋ kuu kuruŋolu bee la le, ì be maaboriŋ a la maaboridulaa to.

³⁵Julujoo mu Yaawe le taa ti, a be ì joo la a ñaama le, ì be boyi la a waatoo la le, a te mee la, mantooroo be jii la ì kaŋ, maasiiboo be ì moonee la le.

³⁶Yaawe be a la moolu la kuwo kiitii la le, a be balafaa soto la a la dookuulaalu ye le, niŋ a ye a je, ì semboo banta, moo maŋ tu ì kono, biriŋ a foro fo a joŋ.

³⁷Bituŋ a si a fo ko: Ali la alloolu be mintoo le, ali ye mennu muta ali la semberaŋ beroo ti?

³⁸Itolu le ka ali la beeyaŋ sadaalu keŋo domo, ì ka ali la wayini sadaalu miŋ. Itolu le ñanta wuli la ka ali maakoyi, ì ye ali tanka.

³⁹Fo ali maŋ ñiŋ je ko, nte le mu Alla ti, Alla koteŋ te keriŋ nte koolaa? Nte le ka moo faa, nte le ka moo balundi, nte le ka moo barama, nte le ka moo kendeyandi. Baayiñaa te nte la keroo la.

⁴⁰Ko a be koyiriŋ ñaameŋ, ko nte le mu Alla baluuriŋo ti, ŋa m buloo wulindi ka n kali ali ye ko:

⁴¹M be n na hawusaroo daa diyaa la le, fo a ye malamala, ŋa sii n na kiitiisiiraŋo kaŋ. M be n joo la n jawoolu to le, ŋa moolu jarabi, mennu ye n koŋ.

⁴²N na kalabeñoolu be suuri la ì balajaatoo kono le, n na hawusaroo* ye i miŋ ì yeloo la, moo baramariŋolu niŋ mutamoolu yeloo, aniŋ jawu kuntiña jaŋolu.[44]

⁴³Hee, duniyaa moolu, ali Yaawe la moolu jayi. A be a la dookuulaalu yeloo bonnaalu joo la le, a be i joo la a jawoolu to le, a be a la moolu la bankoo seneyandi la le, junuboo ye meŋ kosondi.

⁴⁴Musa niŋ Yosuwa naata jamaa moolu ñaatiliŋo la, a ye ñiŋ suukuwo kumoolu bee karaŋ, ì bee tuloo ye a moyi.

⁴⁵Kabiriŋ Musa ye i bandi ñiŋ kumoolu bee karaŋo la Banisirayila bee ye,

⁴⁶a ko ì ye ko, “Ali ali hakiloo tu ñiŋ kumoolu bee to, ŋa mennu dii ali la bii, fo ali si ali diŋolu yaamari ì la. Ali ì karandi ì la, fo ì si ì hakiloo tu ka baara ñiŋ luwaa kumoolu bee la.

⁴⁷Ñiŋ luwaalu maŋ ke kuma kenseŋolu ti, ì mu ali ye baluwo le ti. Niŋ ali bulata ì nooma, ali be siimaayaa la bankoo kaŋ ne, ali be naa duŋ na daameŋ ka a ke ali taa ti, Yoridani Boloŋo kara doo la.”

⁴⁸Wo luŋo faŋo la, Yaawe ko Musa ye ko,

⁴⁹“Taa Abarimu Konkoolu to Mowabi bankoo kaŋ jaŋ, i ye sele Nebo Konkoo santo, meŋ be Yeriko saatewo ñaatiliŋo la. Niŋ i loota a santo, i si Kanaani bankoo juubee, m be naa daameŋ dii la Banisirayilankoolu la ka jee taa.

⁵⁰I be bele la wo konkoo le santo, i ye kafu i mumuñolu ma, ko i kotoomaa Haaruna beleta Hori Konkoo kaŋ ñaameŋ, a kafuta a mumuñolu ma.

⁵¹Ali moo fuloo bee le balanta m ma Banisirayilankoolu bee ñaatiliŋo la Meriba Woyoo to Kadesi saatewo daala, Cini keñewuloo kono. Ali maŋ n kuliyaa n na seneyaa kaŋ ì ñaatiliŋo la.[45]

⁵²M be ñiŋ bankoo meŋ dii la Banisirayilankoolu la, i be jee hayinaŋ na dulaa jaŋ ne, bari i te duŋ na jee.”