Read Mandinka 5 Musa 33 Bible Online

5 Musa 33 - Mandinka bible

5 Musa 33

¹Musa Alla la moo ye neemoo duwaa Banisirayilankoolu ye, janniŋ a be bele la.

²A ko: “Ka bo naŋ Sinayi Konkoo santo, Yaawe* naata ǹ kaŋ. A wulita ko tiloo, a malata ǹ kaŋ ka bo naŋ Seyiri.[46] A la maloo malamalata naŋ ka bo Parani Konkoo to, a niŋ malaayika wuliwuloolu, dimbaa be ŋalasi la a bulubaa karoo la.

³Tooñaa-tooñaa, Yaawe ye a la moolu kanu le, a la moo senuŋolu bee be a buloo le kono, ì be siiriŋ a siŋolu koto, ka yaamaroo soto a bulu.

⁴Nte Musa ye Alla la Luwaa dii ali la, a keta ali taa ti, Yaakuba koomalankoolu.

⁵Yaawe keta mansa ti Yesuruni,[47] ñaatonkoolu be bendiŋ ñoo kaŋ, aniŋ Banisirayila lasiloolu bee.”

⁶Musa ko Rubeni lasiloo la kuwo to ko, “Allamaa Rubeni lasiloo siimaayaa la, a kana buruka, bari ì yirikoo kana siyaa.”

⁷A ko Yahuuda lasiloo la kuwo to ko, “Yaawe, i tuloo tu Yahuuda lasiloo la duwaa to, ì niŋ ì baadiŋolu ye ke kiliŋ ti kotenke. I ye ì bambandi, i ye ì maakoyi ka ì jawoolu kele.”

⁸A ko Lewi lasiloo la kuwo to ko, “Yaawe, i la Tummimu tu Lewi lasiloo bulu, i la Urimu[48] tu i la foroolu bulu, i ye mennu kotobo Masa, i ye ì sonkandi Meriba.[49]

⁹Ì be i la karoo le la nuŋ, ka tambi ì wuluulaalu la, ka tambi ì baadiŋolu la, ka tambi ì faŋo diŋolu la. Ì ye i la yaamaroo doroŋ ne muta, ì ye i niŋ ì la kambeŋo muta.[50]

¹⁰Itolu le be Yaakuba[51] karandi la i la yaamaroolu la, ì si Banisirayila karandi i la luwaalu la, itolu le be cuuraayi sadaa siisindi la i ye, ì ye beeyaŋ sadaalu bo i ye i la sadaajanidulaa* kaŋ.

¹¹Hee Yaawe, ì sembentuŋyaa, i ye ì la baaroolu bee muta ì ye. Ì jawoolu mennu ye i koŋ, ì bee semboo tiñaa, ì kana wuli kotenke.”

¹²A ko Benjamini lasiloo la kuwo to ko, “Benjamini lasiloo, alitolu le mu Yaawe kanuntewo ti. Ali tarata a koto tankoo kono, a ye ali sansaŋ tankoo la waatoo bee, a ye ali duŋ a daboo koto.”

¹³A ko Yusufa koomalankoolu la kuwo to ko, “Allamaa Yaawe neema la ali la bankoo ma, a ye neema ali ma komboo la ka bo saŋo santo, a ye neema ali ma jiyo la ka bo bankoo duuma.

¹⁴Allamaa ali la bankoo fiifeŋolu yiriwaa la, tiloo ye ì mondi ì sawoo la, ì ye moo ì waatoo la.

¹⁵Konko baalu, mennu be looriŋ biriŋ, Allamaa ì fiifeŋolu diŋ na beteke, konkoriŋ kotoolu fiifeŋolu ye diŋ kendeke.

¹⁶Allamaa ali la doofeŋolu yiriwaa la kendeke. Allamaa ali la kuwo ye Alla ñaabo, Alla meŋ fintita yirindiŋo kono, meŋ be mala kaŋ nuŋ.[52] Allamaa ñiŋ bee ye jii Yusufa koomalankoolu kaŋ, ate meŋ mu ñaatonkoo ti a baadiŋolu kono.

¹⁷A diŋ foloo be kallankeeyaariŋ, a semboo be ko ninsituuraa semboo, Efurayimu* niŋ Manase koomalankoolu, ì wuliwuloolu be bankoolu ñori la niŋ ñiŋ semboo le la fo duniyaa dandulaa to.”

¹⁸A ko Sebuluni lasiloo niŋ Isakari lasiloo la kuwo to ko, “Allamaa Sebuluni lasiloo seewoo la ì la taa niŋ naa to, Isakari lasiloo ye seewoo ì sabatidulaalu to.

¹⁹Ì be sii koteŋolu kumandi la ì la konkoo to, ì ye sadaalu* bo ko a ñanta ñaameŋ. Ì si fanka baa to, ì ye i tinee kulloo la meŋ be baa daala keñoo to.”

²⁰A ko Kadu lasiloo la kuwo to ko, “Tentoo be Alla ye, Alla meŋ ye Kadu lasiloo la tundoo fanundi. Kadu ka baturoo ke le ko jatoo, ka ì jawoolu daboolu fatasi, aniŋ ka ì kunkoloolu teyi.

²¹A ye bankoo dulaa betoo tomboŋ a faŋo ye, kabiriŋ lasili ñaatonkoolu benta ñoo kaŋ, ñaatonkoo niyo, wo le diita a la. A ye Yaawe la yaamaroo taamandi, aniŋ a la Luwaa tilindiŋo, Banisirayila ye.”

²²A ko Dani lasiloo la kuwo to ko, “Dani lasiloo ka muluŋ ne ko jatandiŋo, meŋ ka podi naŋ ka bo Basani tundoo kaŋ.”

²³A ko Nafutali lasiloo la kuwo to ko, “Hee Nafutali lasiloo, Yaawe la hiinoo ye ali wasa le, a la neemoo be ali kaŋ ne kendeke. Ali tundoo taa ka bo tilijii maafaŋo la, ka taa fo bulubaa maafaŋo la.”

²⁴A ko Aseri lasiloo la kuwo to ko, “Allamaa Yaawe ye neema ali ma ka tambi Banisirayila lasili koteŋolu la. Allamaa ali ke la Alla kanuntewolu ti ka tambi ali baadiŋolu la. Allamaa ali ye ali siŋo kuu olifu* tuloo kono.

²⁵Ali la saatee dundaŋ daalu, ì sorondaŋolu si ke newo niŋ jaawaloo ti. Ali baluu tiloo be siyaa la ñaameŋ, ali semboo be lafaa la wo le ñaama.”

²⁶Musa ko Banisirayilankoolu ye ko, “Hee Yesuruni, Alla maŋ ñoŋ soto. A ka taama saŋ fatoolu le kono ka ali maakoyi, a niŋ a la kallankeeyaa* ka taama minaayoolu kaŋ.

²⁷Alla mu badaa-badaa Alla le ti, ate le mu ali la tankadulaa ti, a buloo be ali koto. A ye ali jawoolu bayi ali ñaato, a ko, ali ye ì kasaara.

²⁸Bituŋ Banisirayila siita tankoo kono, Yaakuba koomalankoolu siita kayiroo kono. Ali la bankoo be faariŋ siimaŋo niŋ wayinoo* le la, saŋo ka komboo tondi naŋ a kaŋ.

²⁹Hee Banisirayilankoolu, mantaa benta ali ye ñaameŋ! Ali maŋ ñoŋ soto, Yaawe ye alitolu mennu kiisa. Yaawe mu ali la koteeroo* le ti, ka ali maakoyi, a mu ali la hawusaroo* le ti ka nooroo ke. Ali jawoolu be ì faŋ seyi la ali ma le, bari ali be i tuu la ì koolu kaŋ ne.”