Read Mandinka Yosuwa 12 Bible Online

Yosuwa 12 - Mandinka bible

Yosuwa 12

¹Ñinnu le mu bankoo mansoolu ti, Banisirayilankoolu ye mennu noo keloo la. Ì ye ì la tundoo taa Yoridani tilibo kara maafaŋo la, ka bo Arinoni Wulumbaŋo to ka taa Herimoni* Konkoo to, aniŋ Araba* tundoo tilibo kara maafaŋolu bee daa bulariŋo jee:

²Mansakee foloo, wo le mu Sihoni ti, Amori mansa meŋ sabatita Hesiboni. Ate le ye Kileyadi tundoo talanteemoo bee mara ka bo Aroweri, Arinoni Wulumbaŋo daala, ka bo wulumbaŋo teema maafaŋo la, ka taa fo Yaboki Boloŋo bala meŋ mu Ammoninkoolu la naanewo ti.

³Ate le ye Araba tundoo tilibo karoo la fanaa mara ka taa fo Kinnereti Baa[8] bala, aniŋ ka taa fo Araba Baa bala. Wo le mu Koojii Baa ti meŋ ñaa be tilindiŋ Beti-Yesimoti maafaŋo la. Bulubaa karoo la, a ye bankoo doo fanaa mara Pisika Konko jindaalu la.

⁴Mansakee doo mu Oki le ti. Ate le mu Basani mansa ti. A tarata Rafa koomalanka labaŋolu le kono. Ate le be maraloo la nuŋ Asitaroti aniŋ Edireyi.

⁵A la mansamarali bankoo taata le ka bo Herimoni Konkoo to, Saleka saatewo to, aniŋ Basani tundoo bee la, fo ka naa bula Kesurinkoolu niŋ Maakatinkoolu la bankoo naanewo to la, aniŋ Kileyadi tundoo talanteemoo, fo ka taa bula Sihoni la bankoo naanewo to la, Hesiboni mansa.

⁶Musa Yaawe* la dookuulaa, a niŋ Banisirayilankoolu ye ì noo keloo to. Bituŋ Musa Yaawe la dookuulaa ye ì la bankoo dii Rubeni lasiloo la, Kadu lasiloo, aniŋ Manase lasili talanteemoo, ka ke ì taa ti.

⁷Ñinnu le mu bankoo ñiŋ mansoolu ti, Yosuwa niŋ Banisirayilankoolu ye mennu noo keloo to Yoridani Boloŋo tilijii karoo la, ka bo Baali-Kadu, Libanooni Wulumbaŋo kono, ka taa Halaku Konkoo to meŋ taata fo Seyiri.[9] Yosuwa ye ì la bankoo dii keetaafeŋo ti Banisirayila lasiloolu la, lasili-wo-lasili bee ye a taa soto:

⁸Konkotundoo*, Sefela* tundoo, Araba tundoo, konko jindaalu, keñewuloo*, aniŋ Nekefu* tundoo. Hitinkoolu le sabatita nuŋ ñiŋ tundoolu to, aniŋ Amorinkoolu, Kanaaninkoolu, Perisi koomalankoolu, Hiwinkoolu aniŋ Yebusinkoolu.

⁹Banisirayilankoolu ye ñiŋ saatewolu le mansoolu kiliŋ-kiliŋ naa noo keloo to: Yeriko mansa, Ayi mansa meŋ be Beteli daala,

¹⁰Yerusalaamu mansa, Heburoni mansa,

¹¹Yarimuti mansa, Lakisi mansa,

¹²Ekiloni mansa, Keseri mansa,

¹³Debiri mansa, Kederi mansa,

¹⁴Horima mansa, Aradi mansa,

¹⁵Libuna mansa, Adullamu mansa,

¹⁶Makeda mansa, Beteli mansa,

¹⁷Tapuwa mansa, Heferi mansa,

¹⁸Afeki mansa, Lasaroni mansa,

¹⁹Madoni mansa, Hasori mansa,

²⁰Simuroni-Meroni mansa, Akisafu mansa,

²¹Taanaki mansa, Mekido mansa,

²²Kedesi mansa, Yokineyamu mansa meŋ be Karimeli,

²³Dori mansa meŋ be Dori tundoo kaŋ, Koyimu mansa meŋ be Kilikali,

²⁴aniŋ Tirisa mansa. Ì bee kafuriŋo ñoo ma, a taata kaañaŋ mansakee taŋ saba niŋ kiliŋ ne fee.