Read Mandinka Yosuwa 15 Bible Online

Yosuwa 15 - Mandinka bible

Yosuwa 15

¹Ñiŋ bankoo le keta alikuuroo* ti Yahuuda lasiloo moolu teema, ka bo kaabiila ka taa kaabiila: Bankoo ñiŋ naanewo taata le fo Edomu bankoo bala, aniŋ ka taa fo Sini keñewuloo* bala bulubaa karoo la.

²Ì la naanewo meŋ be bulubaa karoo la, wo datita Koojii Baa dandulaa le to bulubaa karoo la.

³A taata le fo ka bula Akirabimu Konko seleraŋ siloo bulubaa karoo la, ka taa fo Sini keñewuloo bala. Naanewo ñiŋ tententa le ka taa fo Kadesi-Barineya saatewo bala, bulubaa karoo la, ka tambi Hesironi saatewo la, ka sele wo la fo Adari saatewo to, ka naa fo Karika saatewo maafaŋo la.

⁴Naanewo ñiŋ tententa ka taa fo Asimoni saatewo to, ka naa bula fo wulumbaŋo to la, ì niŋ Misira naaneeta daameŋ. Bituŋ a naata daŋ Baa Baa* bala. Ñiŋ ne mu ì la naanewo ti meŋ be bulubaa karoo la.

⁵Koojii Baa le to mu a tilibo karoo naanewo ti, ka taa fo Yoridani Boloŋo dandulaa to. Maraa karoo la, a naanewo datita jee le fanaa to.

⁶A taata fo ka bula Beti-Hokila la, ka tenteŋ wo la, fo Beti-Araba, maraa karoo la, ka naa fo beroo doo to, ì ka a fo meŋ ye ko, Bohani la Beroo, Bohani meŋ mu Rubeni dinkewo ti.

⁷Ka bo wo to la, naanewo ñiŋ taata le ka bo Akori Wulumbaŋo to, ka taa fo Debiri. A muruta wo la naŋ maraa karoo la Kilikali maafaŋo la. Kilikali be tilindiŋ Adummimu konko seleraŋ siloo le la, bolondiŋo bulubaa karoo la. A naanewo tententa le fo Eni-Semesi Woyoo bala la, a taata wo la fo Eni-Rokeli Woyoo bala.

⁸Bituŋ a tententa wo la ka taa Beni-Hinnomu Wulumbaŋo bala, konkoo bulubaa karoo la, Yebusinkoolu la saatewo meŋ mu Yerusalaamu ti. Ka bo wo to la, a tententa ka taa fo konkoo santo, Hinnomu Wulumbaŋo tilijii karoo la, Refayimu Wulumbaŋo maraa karoo danta daameŋ.

⁹Ka bo konkoo kaŋ na, naanewo ñiŋ taata le fo Nefutowa Woyoo bala ka tenteŋ wo la fo saatewo doolu to la, mennu be Efuroni Konkoo daala. A muruta naŋ wo la ka naa Baala saatewo to la. Ì ka ñiŋ saatewo kumandi Kiriyati-Yeyarimu fanaa la le.

¹⁰Ka bo Baala, naanewo ñiŋ muruta wo la naŋ ka taa Seyiri Konkoo to, tilijii karoo la. A tententa wo la ka taa fo Yeyarimu Konkoo maraa karoo la, ì ka daameŋ kumandi Kesaloni la. Bituŋ a jiita naŋ wo la Beti-Semesi saatewo to la, ka tambi Timuna saatewo to la.

¹¹A taata wo la Ekironi Konko jindaa maraa kara maafaŋo to la. A muruta wo la ka taa Sikeroni, ka tambi wo la naŋ Baala Konkoo to la ka taa fo Yabuneeli. Bituŋ naanewo ñiŋ danta Baa Baa bala wo le to.

¹²Tilijii la karoo naanewo be ñiŋ baadaa borindoo le bala. Ñinnu le mu naanewolu ti, Yahuuda moolu tarata sabatiriŋ daamennu to, ka bo kaabiila ka taa kaabiila.

¹³Saayiŋ Yosuwa ye Kalebu, Yefunne dinkewo niyo dii a la le, ka bo Yahuuda bonsuŋolu taa kono, ko Yaawe* ye a yaamari ñaameŋ. A ye Heburoni taa, saatewo meŋ be nuŋ Ariba la maroo to; Ariba, meŋ mu Anaki faamaa ti.

¹⁴Jee le mu, Kalebu ye Anaki kaabiila saboo bayi: Sesayi, Ahimani aniŋ Talimayi, mennu mu Anaki koomalankoolu ti.

¹⁵Kabiriŋ a bota wo to, a taata ka moolu kele, mennu be sabatiriŋ Debiri. Nunto ì ka a fo ñiŋ saatewo ye le ko, Kiriyati-Seferi.

¹⁶Kalebu naata a fo ko, “Niŋ moo-wo-moo ye Kiriyati-Seferi kele, a ye jee bee muta, m be n dimmusoo Akisa dii la a maarii la le, ka ke a futuumusoo ti.”

¹⁷Kalebu dookewo meŋ mu Kenasi ti, wo le dinkewo Otiniyeli naata Kiriyati-Seferi taa. Bituŋ Kalebu ye a dimmusoo Akisa dii a la, ka ke a la futuumusoo ti.

¹⁸Akisa la katoo koolaa ka naa Otiniyeli yaa, a naata a fo a ye ko, a ye kenoo ñini a faamaa bulu. Kabiriŋ a futata, a jiita a la faloo kaŋ. A faamaa Kalebu ko a ye ko, “Muŋ ne keta?”

¹⁹Akisa ye a jaabi ko, “I la deemaaroo laa n kaŋ, i ye kenoo doo dii n na, meŋ ye woyoolu soto. Kaatu i ye kenoo meŋ dii n na folooto Nekefu* tundoo kaŋ, wo maŋ jii soto.” Bituŋ Kalebu naata kenoo dii a la santo la aniŋ duuma la, meŋ ye woyoolu soto.

²⁰Ñiŋ ne mu Yahuuda lasiloo la keetaafeŋo ti, ka bo kaabiila ka taa kaabiila.

²¹Ì la saatewolu doolu be Edomu naanewo le daala bulubaa la karoo la: Kabuseeli, Ederi, Yakuri,

²²Kina, Dimona, Adada,

²³Kedesi, Hasori, Itinani,

²⁴Sifu, Telemu, Beyaloti,

²⁵Hasori-Hadata, Keriyoti-Hesironi, ì ka jee kumandi Hasori fanaa la le,

²⁶Amamu, Sema, Molada,

²⁷Hasari-Kada, Hesimoni, Beti-Peleti,

²⁸Hasari-Suwali, Beeriseba, Bisiyotiya,

²⁹Baala, Yimu, Esemu,

³⁰Elitoladi, Kesili, Horima,

³¹Sikilaki, Madimanna, Sansanna,

³²Lebawoti, Silihimu, Ayini, aniŋ Rimmoni. A taata kaañaŋ saatee baa muwaŋ niŋ kononto le fee, ì niŋ ì dandanna saateeriŋolu.

³³Ñinnu le mu saatewolu ti, mennu be Sefela* konkotundoo* la: Esitawoli, Sora, Asina,

³⁴Sanowa, Eni-Kannimu, Tapuwa, Enamu,

³⁵Yarimuti, Adullamu, Soko, Aseka,

³⁶Saarayimu, Aditayimu, aniŋ Kedera, ì ka jee kumandi Kederotayimu fanaa la le. A taata kaañaŋ saatee baa taŋ niŋ naani le fee, ì niŋ ì dandanna saateeriŋolu.

³⁷Senani, Hadasa, Mikidali-Kadu,

³⁸Dileyani, Misipa, Yokiteeli,

³⁹Lakisi, Bosikati, Ekiloni,

⁴⁰Kaboni, Laamasi, Kitilisi,

⁴¹Kederoti, Beti-Dakoni, Naama, aniŋ Makeda. A taata kaañaŋ saatee baa taŋ niŋ wooro le fee, ì niŋ ì dandanna saateeriŋolu.

⁴²Libuna, Eteri, Asani,

⁴³Ifuta, Asina, Nesibu,

⁴⁴Keyila, Akisibu aniŋ Maresa. Ì taata kaañaŋ saatee baa kononto le fee, ì niŋ ì dandanna saateeriŋolu.

⁴⁵Ekironi saatewo daa bulariŋo jee, aniŋ a dandanna saatee baalu niŋ saateeriŋolu.

⁴⁶Saatewolu bee, mennu be Ekironi tilijii karoo la Asidodi daala, aniŋ a dandanna saateeriŋolu.

⁴⁷Asidodi niŋ a dandanna saatee baalu niŋ saateeriŋolu, aniŋ Kaasa niŋ a saatee baalu niŋ saateeriŋolu ka taa fo Misira Wulumbaŋo to, aniŋ ka taa fo Baa Baa borindoo to la.

⁴⁸Ñinnu le mu saatewolu ti, ì ye mennu soto konkotundoo kaŋ: Samiri, Yatiri, Soko,

⁴⁹Danna, Kiriyati-Sanna, ì ka jee kumandi Debiri fanaa la le,

⁵⁰Anabu, Esitemo, Animu,

⁵¹Koseni, Holoni aniŋ Kiloha. Ì taata kaañaŋ saatee baa taŋ niŋ kiliŋ ne fee, ì niŋ ì dandanna saateeriŋolu.

⁵²Arabu, Duma, Esani,

⁵³Yanimu, Beti-Tapuwa, Afeka,

⁵⁴Humuta, Kiriyati-Ariba, ì ka jee kumandi Heburoni fanaa la le, aniŋ Siyori. Ì taata kaañaŋ saatee baa kononto le fee, ì niŋ ì dandanna saateeriŋolu.

⁵⁵Mawoni, Karimeli, Sifu, Yuta,

⁵⁶Yesireeli, Yokideyamu, Sanowa,

⁵⁷Kayini, Kibeya, aniŋ Timuna. Ì taata kaañaŋ saatee baa taŋ ne fee, ì niŋ ì dandanna saateeriŋolu.

⁵⁸Halihuli, Beti-Suri, Kedori,

⁵⁹Maarati, Beti-Anoti aniŋ Elitekoni. Ì taata kaañaŋ saatee baa wooro le fee, ì niŋ ì dandanna saateeriŋolu.

⁶⁰Kiriyati-Baali, ì ka jee kumandi Kiriyati-Yeyarimu fanaa la le, aniŋ Raba. Ì taata kaañaŋ saatee baa fula le fee, ì niŋ ì dandanna saateeriŋolu.

⁶¹Ñinnu le mu saatewolu ti, ì ye mennu soto keñewuloo kono: Beti-Araba, Midini, Sekaka,

⁶²Nibusani, Koosaatewo, aniŋ Eni-Kedi. Ì taata kaañaŋ saatee baa wooro le fee, ì niŋ ì dandanna saateeriŋolu.

⁶³Bari Yahuuda bonsuŋolu, wolu maŋ Yebusinkoolu bayi noo, mennu be sabatiriŋ Yerusalaamu. Wo kamma la Yebusinkoolu niŋ Yahuuda lasiloo moolu tarata sabatiriŋ ñoo kaŋ jee le, fo ka naa bula bii tiloo la.