Read Mandinka Yosuwa 16 Bible Online

Yosuwa 16 - Mandinka bible

Yosuwa 16

¹Bankoo meŋ talaata alikuuroo* la Yusufa koomalankoolu teema, a daa bota Yoridani Boloŋo le to, Yeriko jiibuloo to, tilibo karoo la. Ka bo Yeriko, a naanewo tententa ka taa keñewuloo* to, ka taa wo la Beteli konkotundoo* la.

²Ka bo Beteli saatewo to, a taata niŋ Lusi la ka tambi niŋ Arikinkoolu la tundoo la, ka taa wo la Ataroti saatewo to.

³Ka bo wo to la, a tententa wo la ka jii Yafuletinkoolu la tundoo kaŋ, tilijii karoo la, ka taa wo la fo Beti-Horoni-Duuma maafaŋo la, aniŋ Keseri. Naanewo ñiŋ danta Baa Baa* le to.

⁴Ñiŋ bankoo le keta keetaafeŋo ti Manase lasiloo moolu ye, aniŋ Efurayimu* moolu, mennu mu Yusufa koomalankoolu ti.

⁵Ñiŋ ne mu Efurayimu lasiloo moolu la keetaafeŋo ti, ka bo kaabiila ka taa kaabiila: Ì la tundoo naanewo taata le ka bo Ataroti-Adari, tilibo karoo la, ka taa fo Beti-Horoni-Santo to la.

⁶Naanewo ñiŋ taata le fo Baa Baa bala. Mikimetati saatewo, wo le be maraa karoo la. Tilibo karoo la, naanewo ñiŋ muruta wo la ka taa Taanati-Silo maafaŋo la. A tambita wo la ka taa Yanowa, tilibo karoo la.

⁷Bituŋ a taata wo la ka bo Yanowa ka taa Ataroti, aniŋ Naara, aniŋ Yeriko dandaŋo to la, a danta Yoridani Boloŋo to.

⁸Ka bo Tapuwa la, naanewo ñiŋ taata le ka naa fo Kana Wulumbaŋo to, tilijii karoo la, ka taa fo Baa Baa bala. A danta wo le to. Ñiŋ ne mu Efurayimu lasili moolu la keetaafeŋo ti, ka bo kaabiila ka taa kaabiila,

⁹saatee baalu niŋ saateeriŋolu bee, ì ye mennu jenkendi ì ye kara la, ka bo Manase lasili moolu la kewo to.

¹⁰Bari ì maŋ Kanaaninkoolu bayi, mennu be sabatiriŋ Keseri. Wo kamma la, Kanaaninkoolu niŋ Efurayimu lasili moolu tarata sabatiriŋ ñoo kaŋ ne, fo ka naa bula bii tiloo la. Bari ì ka Kanaaninkoolu foriseetoo dookundi le.