Read Mandinka Yosuwa 17 Bible Online

Yosuwa 17 - Mandinka bible

Yosuwa 17

¹Ñiŋ ne mu bankoo ti, meŋ sotota alikuuroo* la Manase lasiloo moolu ye, kaatu ì bota Yusufa dinkee foloo le bala. Makiri koomalankoolu, wolu le ye Kileyadi tundoo taa nuŋ fokabaŋ, aniŋ Basani tundoo, kaatu itolu le mu kelejawaroolu ti. Makiri le mu Manase dinkee foloo ti, aniŋ Kileyadi faamaa.

²Alikuuroo keta tundoo ñiŋ na kuwo la Manase dinkee doolu fanaa ye le. Wolu le mu Abiyesa kaabiiloolu ti, Heleki, Asiriyeli, Sekemu, Heferi aniŋ Semida. Ñinnu le mu Manase koomalanka kewo doolu ti, ka bo kaabiila ka taa kaabiila.

³Selofehadi, ate le mu Heferi dinkewo ti, Heferi, Kileyadi dinkewo, Kileyadi, Makiri dinkewo, bituŋ Makiri, wo le mu Manase dinkewo ti. Ate Selofehadi, a maŋ dinkee soto fo dimmusoolu doroŋ, mennu toolu mu Maala, Nowa, Hokila, Milika aniŋ Tirisa ti.

⁴Ì taata Eleyasa yaa, meŋ mu piriisoo* ti, Yosuwa Nuni dinkewo, aniŋ ñaatonkoolu. Ì ko ì ye ko, “Yaawe* ye Musa yaamari le ka keetaafeŋo dii ntolu la, ǹ niŋ m̀ baarinkewolu.”

⁵Ñiŋ ne ye a tinna, Manase lasiloo moolu ye nii taŋ soto bankoo ñiŋ to. Ì ye niyo soto Kileyadi tundoo fanaa kaŋ ne, aniŋ Basani, Yoridani tilibo karoo la,

⁶kaatu Manase dimmusoolu niŋ a dinkewolu ye keetaafeŋo soto le. Bituŋ ì ye Kileyadi tundoo dii Manase koomalanka toomaalu la.

⁷Manase bankoo naanewo taata le ka bo Aseri bankoo kaŋ, ka taa fo Mikimetati, meŋ be Sekemu ye tiliboo la. Naanewo ñiŋ tententa ka taa bulubaa karoo la, fo Eni-Tapuwa moolu be sabatiriŋ daameŋ.

⁸Manase ye Tapuwa tundoo soto le, bari Tapuwa saatewo faŋo, meŋ be Manase naanewo to, wo be Efurayimu* lasiloo moolu le la maroo to.

⁹Bituŋ naanewo ñiŋ tententa ka taa bulubaa karoo la fo Kana Wulumbaŋo to. Manase saatewolu kono, saatewo doolu be jee le, mennu tarata Efurayimu la maroo to, bari Manase naanewo faŋo be wulumbaŋo maraa kara maafaŋo le to la, fo Baa Baa* bala. A danta wo le to.

¹⁰Meŋ be bulubaa karoo la, wo be Efurayimu la maroo le to. Bituŋ meŋ be maraa karoo la, wo be Manase la maroo to. Bituŋ Baa Baa, wo le keta ì naanewo ti tilijiyo la. Manase la bankoo maraa karoo la, a niŋ Aseri lasiloo moolu la bankoo le naaneeta wo to. Bituŋ tilibo karoo la, a niŋ Isakari lasiloo moolu la bankoo naaneeta wo to.

¹¹Isakari niŋ Aseri la tundoolu kono, saatewo doolu fanaa naata tara Manase la maroo to jee le, saatee baalu, ì niŋ ì dandanna saateeriŋolu. Ñiŋ saatewolu le mu Beti-Sani ti, Ibuleyamu, Endori, Taanaki, Mekido aniŋ Dori. Ì ka Dori kumandi Nafoti la le fanaa.[12]

¹²Bari hani wo, Manase lasiloo moolu maŋ ñiŋ saatewolu taa noo. Bituŋ Kanaaninkoolu naata tu sabatiriŋ tundoo ñiŋ to.

¹³Kabiriŋ Banisirayilankoolu ye semboo soto, ì maŋ Kanaaninkoolu bayi jee fereŋ, bari ì ka ì foriseetoo dookundi le.

¹⁴Luŋ kiliŋ Yusufa lasiloo moolu ko Yosuwa ye ko, “Muŋ ne ye a tinna, ite ye bankoo kara kiliŋ doroŋ dii ntolu la? Ntolu siyaata le, aduŋ Yaawe neemata ntolu ma baake le.”

¹⁵Bituŋ Yosuwa naata a fo ì ye ko, “Niŋ ali siyaata, aduŋ Efurayimu konkotundoo* dooyaabaata ali fee, wo to ali taa wuloo kono, ali ye kenoo teyi ali faŋolu ye, Perisi koomalankoolu niŋ Rafa koomalankoolu la kenoolu to.”

¹⁶Bari Yusufa lasiloo moolu ko a ye le ko, “Konkotundoo dammaa maŋ kaañaŋ ntolu fee. Aduŋ kene fanuŋo to, Kanaaninkoolu le be sabatiriŋ jee, ì niŋ ì la keleraŋ neesareetoolu*. Mennu be Beti-Sani maafaŋo la, a niŋ a dandanna saateeriŋolu, aniŋ mennu be sabatiriŋ Yesireeli Wulumbaŋo kono, fanaa bee be wo le ñaama.”

¹⁷Bari Yosuwa ko Yusufa lasiloo moolu ye le ko, Efurayimu aniŋ Manase, “Tooñaa-tooñaa, ali siyaata le, aduŋ ali ye sembe baa le soto. Ali maŋ ñaŋ na bankoo kara kiliŋ doroŋ soto la.

¹⁸Konkotundoo fanaa be ke la ali taa le ti. Sutoo le mu jee ti, bari ali si jee teyi noo le fo a dandulaa to ka ke ali taa ti. Kanaaninkoolu ye keleraŋ neesareetoolu soto ñaa-wo-ñaa, aniŋ ì la bambaŋo bee, ali be ì bayi noo la jee le.”