Read Mandinka Kiitindirilaalu 5 Bible Online

Kiitindirilaalu 5 - Mandinka bible

Kiitindirilaalu 5

¹Wo luŋ ne mu, Debora niŋ Baraki Abinowamu dinkewo ye ñiŋ suukuwo laa ko:

²Banisirayilankoolu pareeta le ka keloo ke, moolu wakiilita le ka ì faŋolu dii. Ali Yaawe* tentu!

³Ali moyiroo ke, alitolu mansoolu, ali i lamoyi, alitolu maralilaalu! M be suukuwo laa la Yaawe ye, m be tara la kumafeŋ kosoo le la, niŋ m be suukuwo laa kaŋ Yaawe ye, Banisirayila la Alla.

⁴Hee Yaawe, kabiriŋ i bota naŋ Seyiri konkoolu to, kabiriŋ i naata ka bo Edomu bankoo kaŋ, bankoo jarajarata. Jiyo jurumita ka bo saŋo santo, minaayoolu ye jiyo juruma duuma.

⁵Konkoolu jarajarata Yaawe ñaatiliŋo la, hani ñiŋ Sinayi Konkoo faŋo, Yaawe ñaatiliŋo la, Banisirayila la Alla.

⁶Samuka tiloo la, Anati dinkewo, Yaweli tiloo la, siloolu buka maa. Bituŋ a siloo taalaalu ka lamfee siloolu le taa.

⁷Senelaalu maŋ senoo ñaa soto, ì tarata foñondiŋo le la Banisirayila, fo kabiriŋ nte, Debora wulita, fo biriŋ nte, Banisirayila baamaa wulita.

⁸Kabiriŋ ì ye alla kutoolu tomboŋ, keloo naata tara saatewo dundaŋ daalu* to. Tankaraŋ ne maŋ tara Banisirayila la ñiŋ moo wuli taŋ naanoo bulu, sako sooroo.

⁹N hakiloo be Banisirayila la kelediŋ kuntiyolu kaŋ ne, aniŋ moolu, mennu wakiilita ka ì faŋolu dii. Ali Yaawe tentu!

¹⁰Ali a miira! Alitolu, mennu be fali koyoo kaŋ, alitolu, mennu be siiriŋ kirikewolu kaŋ, aniŋ alitolu sinna taamalaalu!

¹¹Ali i lamoyi, ì ka kontaani ñaameŋ beeyaŋolu mindulaalu to. Jee le mu, ì ñanta Yaawe la kebaara tilindiŋolu karaŋ na, a la kebaara tilindiŋolu hani saateeriŋ moolu ye. Bituŋ Yaawe la moolu taata saatewo dundaŋ daalu to.

¹²Wuli santo, wuli Debora-wo! Wuli santo, wuli i ye suukuwo laa! Wuli santo Baraki, i la moo mutariŋolu samba, ite, Abinowamu dinkewo!

¹³Bituŋ bankoo moo kummaalu, mennu tuta baluuriŋ jee, ì jiita naŋ konkoo duuma, Yaawe la moolu naata ka sembemaalu kele a ye.

¹⁴Efurayimu* lasiloo jiita naŋ duuma wulumbaŋo kono. Wo koolaa Benjamini lasiloo naata, ì niŋ ì la kelediŋ kafoolu. Kelediŋ kuntiyolu naata bo Makiri bonsuŋolu le kono. Sebuluni lasiloo, wolu naata ke kantiyolu ti kelediŋolu kunna.

¹⁵Isakari lasiloo maralilaalu niŋ Debora naata ñoo la duuma. Kabiriŋ Baraki tariyaatoo dunta wulumbaŋo kono, Isakari lasiloo bulata a nooma. Bari Rubeni lasiloo maŋ kambeŋ noo ka taa.

¹⁶Muŋ ne ye a tinna ali tuta kooma saajii koorewolu to, ka i lamoyi footaŋo la, kantarilaalu ka meŋ fee? Rubeni lasiloo maŋ kambeŋ noo ka taa.

¹⁷Kileyadinkoolu tuta Yoridani Boloŋo kankuŋ doo le la. Dani lasiloo, muŋ ne ye a tinna kuluŋ dookuwo ye wolu taridendi? Aseri lasiloo tuta baadaa borindoo le la kuluŋ sembedulaalu to.

¹⁸Bari Sebuluni lasiloo, wolu ye ì niyo le laa hani ka faa faŋ. Nafutali lasiloo fanaa ye wo le ke keledulaa to.

¹⁹Mansakewolu naata, ì niŋ ì keleta: Kanaani mansoolu ye keloo ke Taanaki le, Mekido jiiborindoolu to, bari ì maŋ kodiforo samba ka bo jee.

²⁰Looloolu ye keloo ke ka bo santo, ì boritoo, ì ye Sisera kele.

²¹Kisoni Bolondiŋo jiyo woyita ka ì jawoolu samba, Haa, Kisoni jiyo woyi-woyi laalaata. M be taa la niŋ semboo le la.

²²Suu sembemaalu be bori kaŋ, ì worosoolu ka junku bankoo kaŋ, ì boritoo.

²³Yaawe la malaayikoo ko, “Ali Merosi saatewo danka, ali a moolu danka, ali ì danka. Kaatu ì maŋ naa ka Yaawe maakoyi, ì maŋ naa ka ke Yaawe maakoyilaa ti, ka kafu kelejawaroolu ma.”

²⁴Allamaa neema ke la Yaweli ye, ka tambi musoolu bee la, Heberi Keninkoo la musoo. Allamaa neema ke la a ye, ka tambi musoolu bee la, mennu be sabatiriŋ tiriliisoolu* koto.

²⁵Sisera ye jiyo le daani, Yaweli ye nonoo dii a la. A ye a ke a ye booli ñiimaa le kono, a ye nono foroo le dii a la.

²⁶A buloo futata tiriliisi* pikaloo ma, mariti baa be a bulubaa buloo kono. A ye Sisera pempeŋ a la, a ye a kuŋo teyi, a ye a kuŋo bee teyiŋ-teyiŋ, a ye a ñori a kuŋo kono.

²⁷A bidibidita a siŋo koto, a ye i laa ka i jaŋ. A bidibidita a siŋo le koto, a ye i laa ka i tiliŋ. A bidibidita daameŋ, a ye i laa jee le to, a kasaarata.

²⁸Sisera baamaa ye yoofiiroo ke niŋ palanteeroo la, a woosiita, “Muŋ ne ye a tinna a la sareetoo tarideeta? Muŋ ne ye a la suwoolu maakaŋolu taridendi?”

²⁹A la musu ñaamendiŋolu ye a jaabi, a ye wolu la kumoo seyinkaŋ a faŋ ye,

³⁰“Ì be tara la talaaroo le la feŋolu la, ì ye mennu soto keledulaa: Kee-wo-kee, musu kiliŋ waraŋ musu fula, bayi ñiimaalu, wolu ye ke Sisera taa ti, soobayoolu, soobayi fula ye tara minindiŋ moo-wo-moo kaŋo la, mennu sotota keledulaa.”

³¹Hee Yaawe, Allamaa i jawoolu bee halaki la teŋ. Bari Allamaa i kanulaalu bee ke la komeŋ tiloo, niŋ a be mala kaŋ semboo la. Bituŋ tenkuŋo naata sabati bankoo kaŋ fo sanji taŋ naani.