Read Manggarai MATÉUS 18 Bible Online

MATÉUS 18 - Manggarai bible

MATÉUS 18

¹Du hitu mais ata nungku de Mori Yésus agu mai réid: “Ceing kéta ata céwé mésén oné Adak Surga?”

²Itug kali bénta cengata ata koé le Mori Yésus agu pésék oné beréha iséy

³agu mai taén: “Aku taé agu méu, moron, émé méu toé teserm agu toé ciri ného anak koé ho’om, méu toé ngancéng ngo oné Adak Surgas.

⁴Maik céi-céing ata merik nain agu ciri ného anak koé ho’om, hiay ata céwé mésén kéta oné Adak Surga.

⁵Agu céing ata tiba cengatan anak koé ného ho’o le ngasang Daku, hia tiba akuy.”

⁶“Maik céing kaut hitut pandé ndékok cengatan oné mai anak koé so’o ata imbi Akus, céwé di’an hia hitu émé can watu mesé wasé oné bokakn, poli hitu pandé delep lau taciky.

⁷Calang da’at lino agu sanggéd pandé hena ndékok ata laing: bo kali calang ata manga muingy, maik copél hiat pandé mangan.

⁸Emé limém ko wa’im te pandé ndékok laing hau, ketek oké situ, ai céwé di’am hau ngo oné mosé le limé tompokm agu senggétm, itu pong déméng limé suam agu wa’i suam oké oné api tédéng lén.

⁹Agu émé matam hitut te pandé ndékok laing hau, nggé’i okéy hitu, ai céwé di’am hau ngo oné mosé le mata cam, itu pong oké oné api neraka agu mata suam.

¹⁰Nuk di’a-di’a néka hang le hep cengatan oné mai anak koé so’o. Ai Aku taé agu méu: Manga dé malékatd isé éta Surga, ata lélo mtaung ranga de Ema Dakus éta Surga. [

¹¹Ai mai de anak Manusia latang te mo’eng isét mora.”]

¹²“Co’o nuk de méu? Émé cengata ata manga paéng ceratus jimbaln, agu can ata wéléngy, toé weli kongd liha situt ciok mpulu ciokd lé poco, agu ngo kawé jimbal hitut wéléngy?

¹³Agu aku taé agu méu: Moro matan, émé ita néng ga, céwé naka hitut ca liha po ciok mpulu ciok situt toé wéléngd.

¹⁴Nenggitu kolé Emas hitut éta Surga, toé ngoéngn oné mai cengatan anak koé so’o te moras.”

¹⁵“Émé asé-ka’ém pandé ndékok, wahéng di’a-di’a hia sua taus. Émé séngét liha titong de hau, polig boné kolén hia le hau.

¹⁶Émé hia toé séngét hauy, dadé cengatan ko sua taun kolé ata, kudut le tombo de sua ko telu taun ata sakasin, perkara hitu toé gégo koléy.

¹⁷Émé hia toé séngét iséy, baro sékék hitu oné asé-kaé do. Agu émé hia toé kin séngét reweng data do, lélo kaut hia, cama ného cengata ata toé pecing Mori Keraéngy ko cengata ata tegi belasténg.

¹⁸Aku taé agu méu: Moro matan apa ata pongo le méu oné lino ho’o, pongo kolé éta Surga, agu apa ata cacas le méu oné lino ho’o, caca kolés éta Surga.

¹⁹Agu can kolé taé Daku agu méu: Émé sua taun oné mai méu oné 1ino ho’o cenais te tegi apa kaut, tegi disé situ sendos le Ema Daku hitut éta Surga.

²⁰Ai nia manga sua ko telu taun ata impungs landing le ngasang Daku, nitu Aku manga oné beréha isék.”

²¹Poli hitu mai hi Pétrus agu mai taén ngong Mori Yésus: “Mori, haéng pisa ngkalig aku te ampong asé-ka’ég émé hia pandé ndékok agu akuy? Haéng pitu ngkalin?”

²²Mai taé de Mori Yésus ngong hia: “Toé! Aku taé agu hau: toé hanang pitu ngkalin. Maik haéng pintumpulu ngkali pitungkalin.

²³Ai latang te Adak Surga, rapang ného ca raja hiot kudut manga bilangn agu sanggéd mendin.

²⁴Polig liha pu’ung bilangd, og béntan oné hia cengata ata monggurkouk keta raungn, dod cempulu sebu talénta.

²⁵Landing le toé ngancéng bajard raung situ liha, raja hitu jera hia kudut pika taungs anak agu winan agu sanggéd paéngn, latang te bajar taung raungn situ.

²⁶Og sujun mendi hitu io hia, agu mai taén: Mori géréng koé cekoén, sanggéd raung daku te léko taungs.

²⁷Itu kali wa nain raja hitu le momang mendi hitu, wiga legon, agu koso taungs raungn.

²⁸Landing du kolén mendi hitu nitu main hia cumang agu cengata mendi bana, ata manga raung ceratus dinar kanang oné hia. Mai hia deko agu hajel bokakn agu mai taén bajars raungm ga!

²⁹Itu kali suju haé reban hitu agu tegi ba’éng diha: Géréng koé cekoén ta ité, kudut bajar taungs laku raung situ.

³⁰Maik hia ogoy agu téi haé reban hitu oné bui dengkir bajar taungs raungn.

³¹Ita hitu haén situ iwo, wéong kéta naid, agu baro kéta taung apa ata ita disé oné morid

³²Raja hitu jera bénta ata hitu agu mai taén ngong hia: Oé mendi da’at, sanggéd raungm poli taungs laku kosud, ai hau tegi ba’éng dakuh.

³³Toé weli hau kolé paka ba’éng haé rebam ného aku poli momang haug?

³⁴Og rabo kéta morin hitu agu téing hia oné isét rani dengkir hia bajar taungs raungn.

³⁵Nenggitu kolé pandé de Ema Daku éta Surga latang te méu, émé néténg méu toé ampong asé-ka’és mai wa mai naim.”