Read Manggarai MATÉUS 24 Bible Online

MATÉUS 24 - Manggarai bible

MATÉUS 24

¹PASAL 24-25 [1] Poli hitu Mori Yésus ngo bepé’ang mai Mbaru de Mori Keraéng, agu ngon. Og maid ata nungku Diha agu toso oné Mbaru de Mori Keraéng.

²Mai taé Diha agu isé: “Itas le méu sangéd taung situ ko? Aku taé agu méu, moron matan, agit can koé watu so’o ata ondang kid tondol lobo watu haéd; te pandé lur kéta taungs.”

³Du lari lonton Mori Yésus éta golo Zaitun, mais ata nungku oné ranga Diha kudut te tombo hanang koéd agu Hia. Mai taéd: “Tombo koé agu ami du niag tai jarid apa situ, agu co’o tandan mai Dité agu tandan te cemol lino?

⁴Mai walé de Mori Yésus agu isé: “Néka témo, boto manga ata pandé cibul méu!

⁵Ai dod ata te mai ba ngasang Dakus, agu mai taéd: Aku dé Mesias, wiga isé situ pandé wéléng ata do.

⁶Manga dengén le méu kacik rampas, agu réba kudut manga rampas. Landing néka sogit laing le méu agu néka simpungm; ai sanggéd situ paka mangas, maik toé di hitu leso cemoln.

⁷Ai wa’u ca te to’o dungkang wa’u ca, raja ca dungkang raja ca. Te manga darem agu nupung oné néténg tana.

⁸Maik sanggéd situ, hitus di wangkad susa pa’it du toé di cekeng weru.

⁹“Du hitu méu kudut téi te luca latam, agu te alam agu méu te kodo le sanggén uku landing ngasang Daku,

¹⁰agu dod ata te legong agamad; isé pika cama taud agu kodo cama taud.

¹¹Do tuad nabi tangké situt pandé wéléng taung ata.

¹²Agu le tambang dod ata pandé da’at, wiga momang cama haé ata te ciri ces.

¹³Landing isét ta’ong dengkir cemoln, ngancéng selamaks.

¹⁴Agu keréba di’a de Adak ho’o kudut te keréba oné temu tana linoy kudut sabin latang te sanggén uku, poli hitu itu pong caiy cemol.”

¹⁵“Jari émé ita le méu ‘Hiat pandé woréng’ hesé oné osang nggeluky, lorong curup hitut poli tombon le nabi Daniél-isét bacang surak porong lélo di’a hitu —

¹⁶itu tara isét manga oné Yudéa paka losi nggerlé pocos.

¹⁷Ata do siot lari lonto, é tangis lobo mbarud, néka wa’u nggere-was te emi cecad oné mbaru,

¹⁸agu ata siot rémé oné umad, néka wé’é te emi ceca pakéd.

¹⁹Copél mésé latang te isé endé siot rémé na’ang weki ko rémé cucu anakd du hitu.

²⁰Ngajim kali, kudut du losis hitu néka du cekeng duréng agu néka hena oné leso Sabat.

²¹Ai du hitu te manga wahéng mésé ata toé dé’it mangay pu’ung du mangan lino ho’o, dengkir te ho’on agu hitut toé manga koléy.

²²Agu émé toé pandé wokoky cekengn, oné mai sanggéd apa kaut so’ot moséd, toé kéta manga retangd; landing le manga isét poli lird cekeng hitu te pandé wokok kauty.

²³Du hitu émé manga ata taé agu méu: Lélo hi Mésias manga no’oy ko hi Mésias manga lé hioy, néka imbi le méu.

²⁴Ai mésias-mésias tangké agu nabi-nabi tangké-té cais agu isét ngancéng pandé tanda mésé agu tanda lenget, wiga émé ngancéng kolé pandé wéléng ata poli lird.

²⁵Nuk di’a-di’a, Aku poli tombo muingn agu méu.

²⁶Jari, émé manga ata nggo’o taén ngong méu: Lélo, Hia manga oné satar mambaky, néka ngo nitu méu; Lélo, Hia manga oné lo’angy, néka imbi le méu.

²⁷Ai cama ného ndilap, wili-welok awo main agu wéwéng gérakn haéng salé kolépn, nenggitu kolé tai main Anak Manusia.

²⁸Nia manga tobo, nitus holid ka rentumd.”

²⁹“Toé béhéng lété du polin wahéng du hitu, mata leso te ciri nendépy, agu wulang toé manga néran agu sanggén ntala, te pa’u kéta taungs éta mai awang agu sanggéd kuasa de awang gégo kéta taungs.

³⁰Du hitu te ita tanda de Anak Manusia éta awang agu sanggéd uku oné lino te jéjéngs agu te ita lisé Anak Manusia hitu mai lobo rewung éta awang déméng agu kuasa mésén agu angosn.

³¹Agu hia te jera pé’ang taungs malékat-malékat kudut tebang terompét ata maor kéta runingn, agu isé te nekek taungs ata poli lird oné mai pat lok de lino, oné mai binting awang ca, haéng binting awang bana.

³²Nuk kaut le méu betuan rapang haju ara: Émé ngoél rengka-rengka koén agu wangkas ludungd, pecing dé le méu te cekeng lena tiong cé’én.

³³Nenggitu kolé, émé ita taung situ le méu, pecing dé le méu, tiong cé’én dé ga, wa dungka para mbaru gi.

³⁴Aku taé agu méu: Moro matan, isét uwa so’o toé kéta retangs, émé toé di manga taung apa so’o.

³⁵Awang agu lino te mora taungs, landing curup Daku toé ngancéng moray.

³⁶Landing latang te leson agu wién hitu, toé manga cengatan ata pecingn, malékat-malékat éta Surga kolé toé, agu Anak kolé toé, hanang weki run hi Ema.”

³⁷“Ai cama ného apa du mosé di Nuh, nenggitu kolé néng tai du main Anak Manusia.

³⁸Ai cama ného isé leso bebolon tuan mbang mésé hitu, hang agu inungs, na’a rona agu na’a winas, haéng leso hi Nuh tuké nggeroné kepaln,

³⁹agu isé toé baé cekoén latang te cao-ca, bebolon cain mbang mésé hitu te pandé ampus taung isé; nenggitu kolé néng tai du main Anak Manusia.

⁴⁰Du hitu émé manga sua taus ata oné uma, hiat cengata te dadéy, agu hiat cengata ledong nituy;

⁴¹émé manga sua taus iné-wai rémé tukd, dadé hiat cengata agu hiat cengata ledong nituy.

⁴²Landing hitu néka témo, ai toé pecing le méu du leso apa Moris hitu te maiy.

⁴³Landing nuk di’a-di’a ho’o: Émé pecing lata ngara mbaru du nia le wié main ata tako, toét-toé wela kin, agu toé sondang mbarun te rampok 1atay.

⁴⁴Landing hitu, méu kolé paka jengkek di’a-di’a, ai main Anak Manusia du toé kéta manga nuk calan le méu.”

⁴⁵“Céing mendi ata tipek agu nggalas nai, ata téti le morin te sanggéd ata do latang te téing hang du leso hitu?

⁴⁶Mosé di’a mendi ata repéng le morin rémé gorin, du cain morin hitu.

⁴⁷Aku taé agu méu: Moro matan, morin hitu te téti hia ciri ata lami sanggéd paéngn.

⁴⁸Landing émé mendin hitu ata da’at agu get oné nain:

⁴⁹Mori daku toé di maiy, wiga hia pu’ung ongga taung haé mendin, agu hang-inung cama-cama agu ata languy,

⁵⁰maik morin mendi hitu cai du leso ata toé kéta manga nukn liha,

⁵¹agu te ala hiay agu pandé hia cama ného wada disét lopé-lapét. Nitu baén manga jéjéng agu kérek ngis.”