Read Manggarai MATÉUS 4 Bible Online

MATÉUS 4 - Manggarai bible

MATÉUS 4

¹Mai nitu main, og dadén Mori Yésus le Nai Nggeluk nggere-éta satar mambak kudut kapang le jing da’aty.

²Du poli puasan patmpulu leso agu patmpulu wié darem néng Mori Yésus.

³Itug kali main jing da’at hitut damang Hia, mai taén ngong Hia: “Émé Anak de Mori Keraéng Hau, jeras dé le Hau watu-watu so’o te ciri roti.”

⁴Mai wantil de Mori Yésus: “Manga tulisn: Mosé data manusia toé le roti kanang, maik oné mai néténg reweng ata losa oné mai mu’u de Mori Keraéng.”

⁵Poli hitu jing da’at dadé Hia nggere-oné béndar Nggeluk agu peher Hia éta bubung Mbaru de Mori Keraéng,

⁶mai taén agu Hia: “Émé Anak de Mori Keraéng Hau, tekuh dé nggere-wa, ai manga poli tulisn latang te Hau, kudut préntas Liha malékat-malékat te séndé lisé rantang timpok wa’im le watu.”

⁷Mai taé de Mori Yésus agu hia: “Manga kolé poli tulis: hau néka damang Mori Keraéngm!”

⁸Dadé kolé le jing da’at hitu nggeréta poco hiot langkas kétay agu toi oné Hias sanggéd rajad lino siot angosn kéta,

⁹agu mai taén ngong Hia: “Sanggén taung situ téing Haus laku, émé io agu suju aku le Hau.”

¹⁰Mai taé de Mori Yésus ngong hia: “Ngoh ga, hau jing da’at! Ai manga poli tulisn: Hau paka io agu suju Mori Keraéngm agu hanang Hia kali ata patun te hiang!”

¹¹Itu kali jing da’at pencang Hia, itas néng ga mai malékat-malékat te gatang Mori Yésus.

¹²Du dengén le Mori Yésus poli dekon hi Yohanés, itug kali ngon Hia oné Galiléa.

¹³Ledong Liha béo Nasarét agu ka’éng oné Kapérnaum, oné lupi sano tana Zébulon agu Naftali,

¹⁴ai kudut rapakn reweng ata poli pedeng de nabi Yésaya:

¹⁵“Tana Zébulon agu tana Naftali, salang nggeroné tacik, tana besina mai waé Yordan, Galiléa, tana de uku-uku bana,

¹⁶uku ata sedep oné nendep itag lisé gérak mésé agu latang te isé siot kumbu le susa polig téa le gérak.”

¹⁷Pu’ung du hitu wéwa le Mori Yésus: “Teserm ga, ai Adak de Surga ruis gi!”

¹⁸Agu du Mori Yésus rémé lakon loléng sano Galiléa itas Liha sua taus asé-ka’és hi Simon ata bénta hi Pétrus agu hi Andréas asén. Isé rémé oké ndalad oné sano, ai isé situ ata ndala ikangs.

¹⁹Mai curup de Mori Yésus agu isé: “Mai é, lut akum, kudut méu ciri ndala manusia laingm laku.”

²⁰Itus kali pencang wad kaut ndala, agu lut Hias.

²¹Du kolén Mori Yésus nitu main, ita kolé Liha sua taus asé-ka’és hi Yakobus anak di Zébédéus agu hi Yohanés asén, agu emad hi Zébédéus rémé besik ndalad oné wangka, itus kali bénta le Mori Yésus.

²²Toé rémpé-rémpé pencang wa kaut wangka agu emad, ngo lut Hias.

²³Mori Yésus lako léok Galiléa; oné mbaru-mbaru ngaji, nitus Liha toing agu ba kréba di’a de Adak Surga, pandé moras sanggéd beti agu ata lema-léngkus ba wekid oné uku situ.

²⁴Wéron ngasang Diha labok tana Siria, dadé néng lisé nggeroné Hia sanggén ata so’ot riwi-rowos, ata so’ot beti da’at, ata iling le jing da’at, ata beti le ru’u mona, agu ata péko, mai Mori Yésus pandé ina taungs.

²⁵Londang taungs ata te lut Hia. Isé mai oné mai Galiléa, Dékapolis, Yérusalém, agu oné mai Yudéa agu besina mai Yordan.