Read Manggarai MATÉUS 8 Bible Online

MATÉUS 8 - Manggarai bible

MATÉUS 8

¹Du poli kolén Mori Yésus éta mai golon, dod ata lako londang, lut Hia.

²Itu kali main cangata ata boké wa ranga Diha, suju agu io Hiay agu mai taén: “Mori, émé gorid ité, pandé ina koé beti daku.”

³Itu kali losn limé de Mori Yésus, asur ata hitu, agu mai taén: “Gorig Aku, inah ga.” Du hitu muing inan boké data hitu.

⁴Maik taé de Mori Yésus ngong hia: “Nuk dé, néka toi apa ho’o agu céing kaut, maik ngoh ga, toto wekim agu imam agu téing takung ata baté wuat di Musa, ai hitu tandan te pecing lisé.”

⁵Du Mori Yésus ngo nggeroné béo Kapérnaum, mai cengata kepala de serdadu te cumang Hia, te tegi agu Hia:

⁶“Mori, mendi daku halas kin oné mbaru, ai pékoy agu kélo-balé tu’ung mosén.”

⁷Mai taé de Mori Yésus ngong hia: “Aku ngok te pandé inan.”

⁸Maik walé de kepala serdadu hitu agu Hia: “Mori, toé kéta remok aku te tiba Ité oné mbaru daku, maram ca gewékn kaut reweng Dité, toé te toé ina muing beti de mendi daku hitu.

⁹Ai weki rug kaku ata bewa-mai perénta datak agu bewa-mai aku manga kolé serdadu ata merik pangkatd. Agu émé nggo’o kaut taé daku ngong cengatan serdadu hitu: Ngoh! Ngo kauty, agu émé nggo’o kolé taé daku ngong cengatan: Mai! Mai kauty, ko latang te mendi rug: pandé ho’o, pandé kauty liha.”

¹⁰Du dengé le Mori Yésus reweng de serdadu hitu, lenget kétay agu mai taén ngong isét lut Hia: “Moro matan, imbi mésé ného nggo’o toé dé’it dengé Laku oné mai ata Israél.

¹¹Aku taé agu méu: Dod ata te mai awo mai agu salé mai agu lonto hang cama-cama agu hi Abraham, hi Ishak agu hi Yakub oné Surga.

¹²Maik sanggéd anak mbaru hitu, te péncar nggeroné nendép tuil da’at, nitu de manga rétang-rembo agu kérek ngis.”

¹³Itu kali mai taé de Mori Yésus ngong kepala serdadu hitu: “Koléh ga, agu jari taung hitut imbim.” Wiga du hitu muing di’an mendi de kepala serdadu hitu.

¹⁴Du cain oné mbaru di Pétrus, ita le Mori Yésus, inang di Pétrus halas kin, ai beti pémpang.

¹⁵Itu kali cau limén liha inéwai hitu, agu rémé nggitun mora muing pémpangn. Itug to’on agu ris Hian.

¹⁶Du wiég tana, dadé dod ata nggeroné Mori Yésus, ata hena le jing da’at, maik ca mu’u kaut curup de Mori Yésus mbér jing situ, agu pandé ina isét hena le beti situ.

¹⁷Hitus dé cai wad te rapakn curup hiot caing le nabi Yésaya: “Hia ata polad lendé dité, agu ata tanggongd beti dité.”

¹⁸Du ita le Mori Yésus ata do baling mai Hia, jera Liha te lako be sina mais.

¹⁹Itu kali main ata pecing Taurat agu mai taén ngong Hia: “Tuang Guru, aku kudut lut Iték nggerenia kaut ngo Dité.”

²⁰Taé de Mori Yésus agu Hia: “Serigala manga liangn agu kaka lélap manga cewon, maik Anak Manusia kali toé kéta manga osangn latang te bérit sa’in.”

²¹Manga ca ata bana, hia cengata oné mai ata nungkun, mai taén agu Hia: “Mori, sendo koék aku Lité te boak emag!”

²²Maik mai taé de Mori Yésus agu hia: “Lut Aku, kong isét mata boak cama ata matad.”

²³Itu kali léti perahu Mori Yésus agu ata nungkun kolé lut Hias.

²⁴Rodo tuan kaut buru warat oné sano hitu, wiga wangka disé géréng té kandon le bombang, maik toko kin Mori Yésus.

²⁵Og kali mai data nungkun te kéngko Hia, taéd: “Campé Mori, copél tité ho’o ga.”

²⁶Mai taé Diha agu isé: “Co’o tara rantangs, méu ho’ot toé danga imbi?” Itu kali to’on Mori Yésus agu kentay Liha warat agu sano hitu. Itu kali letét kétay sano hitu.

²⁷Lengét kétas ata situ, mai taéd: “Céi kéta Hia ho’o, wiga warat agu sano lorong kaut le perénta Dihas?”

²⁸Du cai besinad, oné tana data Gadara, mai sua taus ata oné mai boa ata hena le jings, te cumang Mori Yésus. Ata situ ngancéng copél laing, wiga toé manga cengatan ata cung te lako salang hitu.

²⁹Isé situ ciéks taéd: “Te co’og ami Lité, oé Anak de Mori Keraéng? Cala mai Dité kudut wahéng ami bebolon cai wié leson?”

³⁰Toé tadang nitu main, manga ca okas ela, rémé oncor kawé hangd.

³¹Itu kali jing da’at situ tegi agu Hia, mai taéd: “Émé mbér ami Ité, jera koé ami ngo boné ela do siokm.”

³²Taéd Mori Yésus ngong isé: “Ngom ga!” Itu kali pé’angd agu ngo oné ela situ. Itu kali woncekd sanggéd ela do situ oné téngku nggerewa sano agu mata boné waés.

³³Og kali losid sanggéd ata lami ela situ agu du caid oné béndar tombo kéta taung lisé, nggitu kolé latang te ata do siot hena le jings.

³⁴Kedang kéta taungs lawa oné béndar hitu te ngo cumang Mori Yésus agu du poli cumangn lisé Hia, soka lisé, kudut Hia ledong tana ata ka’éng diséy.