Read Manggarai MATÉUS 9 Bible Online

MATÉUS 9 - Manggarai bible

MATÉUS 9

¹Du poli hitu Mori Yésus léti perahuy agu ngo besinan. Itu kali cain Hia oné béndar de Run.

²Itu kali berotong lata cengata ata péko wa ranga Diha ata ngai halas kin oné wongkan. Du ita le Mori Yésus imbi disé, mai taén ngong ata péko hitu: “Imbi kaut le hau anak, ndékokm polisg ampongd.”

³Maik nggutd pisa taus ata pecing Taurat oné naid, taéd: “Hia ho’o é, mbécik Mori Keraéngy.”

⁴Maik baé le Mori Yésus get nai disé, mai taén: “Co’o tara nuk ata da’ats méu oné nais?

⁵Nia ata céwé émongn; taé: Polisg ampongd ndékokm, ko taé: To’oh ga, agu lakoh ga?

⁶Maik kudut baé le méu, te oné lino ho’o Anak Manusia manga kuasan te ampong ndékok.” Mai taén ngong ata péko hitu: “To’oh ga, ba wongka tokom agu kolé mbarum!”

⁷Itu kali to’on ata hitu agu kolén.

⁸Wiga ata do situt ita pandé hitu, rantangs, itu kali naring Mori Keraéngd ata poli téing kuasa nenggitu oné manusia.

⁹Du poli ngo nitu main Mori Yésus, ita Liha cengata, ata ngasangn hi Matéus, lonto kin oné mbaru tegi béa, mai taéN ngong hia: “Lut Akuh.” Itu kali hesén hi Matéus agu lut Hiay.

¹⁰Ného cepisan du Mori Yésus hang oné mbaru di Matéus, do kétas isét tegi béa agu ata ndékok agu hang cama-cama agu Hia agu ata nungkun.

¹¹Du itas lata Parisi wintuk hitu, mai taé disé ngong ata nungku de Mori Yésus: “Co’o tara hang cama-cama agu ata tegi béa agu ata ndékokn guru de méu?”

¹²Dengé le Mori Yésus, mai taén: “Toé ata weki di’a hitut kawé doktér, maik ata beti.

¹³Jari ngom ga, idep di’a betuan reweng ho’o: Ata ngoéng Daku momang agu mohas, toé téing takung, ai mai daku, toé bénta isét molor, maik ata ndékok.”

¹⁴Ného cepisan, mais ata nungku de Yohanés oné Mori Yésus agu mai taéd: “Co’o tara ami agu ata parisin kali te puasa, maik ata nungku Dité toé?”

¹⁵Mai walé de Mori Yésus agu isé: “Ngancéng weli haé reba dihat kopé harat wéong naid du rémé hiat kopé cama laing agu isén? Landing manga leson hiat kopé harat dadé oné mai isén, du hitu di po puasas.

¹⁶Toé manga cengatan ata, hitut tumpak caré ata toéd neket oné baju boték, ai émé nenggitu caré-caré hitu te pandé biret baju hitu, agu danga-danga mésén biretn.

¹⁷Nenggitu kolé anggor weru, toé loli nggereoné kandi luit manga, ai émé nenggitu, betéy kandi hitu wiga anggor situ oké taungy, agu lewes bon kolé kandi hitu. Landing anggor weru na’a lata oné kandi weru kolé wiga ali hitu meler kid isét sua.”

¹⁸Lari curup nenggitun Mori Yésus agu isé, mai cengata kepala sinagoga suju wa ranga Diha agu mai taén: “Anak inéwai daku itu koé di rowan, landing weli ga, mai koét Ité agu témba liméd oné hia kudut mosé kolé.”

¹⁹Og ngon Mori Yésus cama laing agu ata hitu agu ata nungku Diha.

²⁰Du hitu manga cengata inéwai ata campulu sua ntaung béhéngn beti ru’u gogangy, lako ruis be musi mai Mori Yésus, agu cabi lindi juba paké Diha,

²¹Ai nuk oné nain: “Am cabi kaut laku lindi jubaN, ina bog aku.”

²²Og holés nggere musin Mori Yésus agu lélo hia, mai taéN: “Mberés kaut naim anak Daku, le imbim tara selamak laing hau.” Pu’ung nitu main ina muing beti de inéwai hitu.

²³Du cai oné mbaru de kepala sinagoga hitu ita isét tebang sunding agu ata do ngai ngaoks,

²⁴mai taén: “Pé’angm ga, anak koé ho’o toé matay, maik tokoy.” Maik isé tawa Hias.

²⁵Du poli taung jera ngo be pé’angd ata do situ, Mori Yésus ngo nggere onéy agu cau limé de anak koé hitu, itug kali to’on anak koé hitu.

²⁶Wiga wéro-émbon tombo hitu oné temu tana hitu.

²⁷Du ruda lako nitu main Mori Yésus, sua taus ata buta lorong Hia cang agu ciékd, taéd: “Ba’éng koé ami, oé anak di Daud.”

²⁸Du ngo oné ca mbaruy Mori Yésus, mais sua taus ata buta situ nggere-oné Hia agu Mori Yésus taé agu isé: “Imbi le méu te Aku ngancéng pandén?” Mai walé disé: “Yo Mori, imbi lami.”

²⁹Itu kali Mori Yésus asur mata disé cang agu mai taén: “Jari ga oné méu, lorong imbis.”

³⁰Itus kali wela kauts mata disé. Agu Mori Yésus masa kéta pedén latangt isé, mai taéN: “Lélo, porong néka cengatan te baé apa ho’o.”

³¹Maik ngo be pé’angs isé, agu wéron lisé Hia, oné temu tana hitu.

³²Rémé ngo be pé’angd sua taus ata buta situ, ba kolé nggere-oné Mori Yésus cengata ata dopel hena le jing da’at.

³³Agu du poli mbérn jing da’at hitu, itu po ngancéng curupn ata dopel hitu. Wiga lenget taung ata do, agu mai taéd: “Pandé nenggo’o toé kéta dimanga itan lata oné Israél.”

³⁴Landing mai taéd ata Parisi: “Le kuasa de tu’a de jing da’at Hia tara ngancéngn mbérd jing da’at situ.”

³⁵Nenggitu dé Mori Yésus lako temu béndar agu béon, Hia toing oné mbaru-mbaru ngaji agu keréba Injil Adak Surga agu pandé morad sanggéd beti agu lendé.

³⁶Le ita ata do situy, kembuk nain Mori Yésus latang te isé, ai lémas agu lubars cama ného jimbal siot toé manga ata lamid.

³⁷Maig taéN ngong ata nungkuN: “Bo kéta do dani, maik ata gorid cekoés kali.

³⁸Landing hitu tegi agu Hiat ngara dani, kudut Hia katu dos ata duat latang te akod.”