Read Manggarai MARKUS 13 Bible Online

MARKUS 13 - Manggarai bible

MARKUS 13

¹Du kolén Mori Yésus oné mai Mbaru de Mori Keraéng, cengata ata nungkun curup agu Hia: “Tuang Guru, lélo damang tenad sanggéd watu so’o agu nau kétas sanggéd mbaru situ!”

²Itu kali mai taé de Mori Yésus agu hia: “Ita taungs le hau mbaru mésé so’o? Toé kéta manga can watu situ ata pésék lobo haén, renco kéta taungs tai.”

³Du rémé lonton Mori Yésus éta Golo Zaitun dungka kéta agu Mbaru de Mori Keraéng, hi Pétrus, hi Yakobus, hi Yohanés agu hi Andréas, réi hanang koéd agu Hia:

⁴“Toi koé agu ami, du nia jarin tai agu apa kéta tandan émé sanggéd apa situ kudut cemol taungs.”

⁵Itug kali pu’ung le Mori Yésus tombo agu isé: “Néka témo bail, rantang pandé wéléng méu lata!

⁶Te cais ata do, ata ba ngasang Daku agu mai taéd: ‘Aku dé hi Kristus’, agu isé kudut pandé wéléng ata dos.

⁷Agu émé dengé le méu manga rampas mésé ko néong kudut manga rampas, néka sobit laing le méu. Sanggéd taung situ paka jaris maik toé di hitu cemoln.

⁸Ai du hitu manga rampas wa’u ca dungkang wa’u ca, agu raja ca dungkang raja ca. Kudut manga kolé nupung mésé néténg tana, agu te manga kolé darem mésé. Sanggéd situ hitus di pu’ungd susa kudut cai cekeng weru.

⁹Maik méu, jerék koém! Méu te mboték latam oné ranga de Adak Agama agu méu kudut ongga latam oné mbaru ngaji agu méu te ba oné ranga disét cau kuasa agu de raja-raja landing Akum, kudut ciri saka-si laing latang te isé.

¹⁰Maik Keréba Di’a paka olong wéro le méu oné sanggéd wa’u.

¹¹Émé méu todang agu ba nggere-oné ranga de adak, néka simpung laing le méu, latang te apa situt paka walé le méu, maik walé kaut apa ata téing oné méu du hitu muing, ai bom méu hitut curup, maik Nai Nggeluk.

¹²Du hitu tai manga ka’é ata pika asén kudut alay, nenggitu kolé ema ata pika anakn. Agu manga anak-anak ata cekerangang agu ata tu’ad agu te ala lisé.

¹³Méu ho’o rangkat kéta taung lata do landing ngasang Daku. Maik ata meku nain dengkir agu cemoln, hia hitu te selamaky.”

¹⁴“Émé ita le méu ‘Ata Pandé Kosé’, hesé oné osang ata toé patun latang te hia-ata bacang paka tingo di’a-di’a - Céi-céi ata manga oné Yudéa paka gélang losi nggere-éta pocos.

¹⁵Ata siot rémé lonto éta ténda mbarud, isé néka wa’us agu ngo oné kudut emi cao-can oné mbarud,

¹⁶agu ata pé’ang uma kin, néka kolé mbarud kudut emi wéngko wekid.

¹⁷Calang da’at kétas inéwai siot lari na’ang wekid ko ata rémé cucu anakd du hitu.

¹⁸Ngaji koém, kudut sanggéd taung situ néka cai du cekeng duréng.

¹⁹Ai du hitu te cai némba mésé ata toé manga dé’it pu’ung du wangkan lino, ata dédék le Mori Keraéng, dengkir te ho’on agu toég manga kolé poli hitu.

²⁰Agu émé toé pandé wokok cekéng hitu le Mori Keraéng, op kali sanggéd apa kaut ata mosé, toé manga cengatan ata mba’én: maik landing ata siot poli lir Diha, pandé wokok cekeng itu le Morin.

²¹Du hitu, émé manga ata taé agu méu: Lélo hi Mesias manga cé’é ho’oy, ko: Lélo, hi Mesias manga nituy, néka imbi le méu.

²²Ai te cais Mésias-Mésias Tangké agu nabi-nabi tangké, isé te pandé tanda agu tanda lenget kudut émé ngancéng, pandé copél ata poli lir.

²³Jerék di’a-di’a méu! Aku poli langgad taung apa so’o olo maid agu méu.”

²⁴Maik du hitu, du cemol sanggéd taung susa, mata leso ciri nendep agu wulang toé manga gerakn

²⁵agu ntala pa’u taungs, awang agu sanggéd icin gégo taungs.

²⁶Du hitu te ita lata Anak manusia cai lobo rewungy déméng agu sanggéd kuasan agu néra mésén.

²⁷Agu du hitu kolé, wuats Liha malékat, agu kudut te nekek taungs sanggéd ata poli lir Dihad, da’on awo, ambén salé, ulun le-wa’in lau, oné mai comongn lino haéng pé’ang binting awang.

²⁸Nuk koé icin le méu tombo rapang haju ara. Émé wangkag ta’an rengkan agu tuan ludungn, pecing le méu, hitu dé kudut ruis cai cekeng walis.

²⁹Nenggitu kolé, émé itas le méu jarid apa situ, pecing le méu, ruisg cai cekengn, olo mai para mbaru gi.

³⁰Aku taé agu méu: Moro matan, uwa so’o, toé di moras, émé toé di cai was sanggéd curup Daku.

³¹Awang agu lino te cemols, maik curup Daku tédéng lén.

³²Landing latang te leson agu redun, toé manga cengatan ata pecingn, malékat-malékat éta Surga kolé toé, Anak Manusia kole toé, hanang weki run hi Ema kanang.”

³³“Néka témo agu wela koé matas! Ai toé pecing le méu du nia leso redun.

³⁴Agu rapang ného cengata ata ngo pé’ang tana pé’ang, ata legong mbarun, agu téing kuasa agu sanggéd mendin, néténg ata manga taung agu gorin, agu perénta latang te hiat lami para, kudut wela koé matan.

³⁵Landing hitu, wela koém, ai toé pecing le méu du nia cain ata ngara mbaru hitu, aram le manéy, ko seréhang tanay, ko du kakor lalongy, ko gula ucapy,

³⁶kudut émé cala-nga’ak kaut cain hia, néka regéng méu lari tokos.

³⁷Apa ho’ot tombo Daku agu méu, tombo kolé Laku agu sanggén ata: Néka Témo!”