Read Manggarai MARKUS 14 Bible Online

MARKUS 14 - Manggarai bible

MARKUS 14

¹Ramé Paska agu ramé Roti Toé Manga Ragin ného cesuan kali ga. Sanggéd imam kepala agu ata pecing Taurat bantang kawé co’o nawan kudut deko agu ala Mori Yésus,

²ai nggo’o taé disé: “Néka du leso raméy, boto raha laing le ro’éng.”

³Du Mori Yésus manga oné Bétania, oné mbaru di Simon ata hena dé’it le boké, agu lari lonto hangn, mai cengata inéwai ba agu ca kuntul watu mina bengé ata wegit kétay. Woko poli pandé bikén liha mu’un kuntul watu hitu, loli mina hitu liha lobo sa’i de Mori Yésus.

⁴Manga ata rabo agu mai curup cama taud: “Te co’on kéta tara woro-waés bon mina bengé ho’o?

⁵Ai mina ho’o émé pikay ngancéng réci oné mai telu ratus dinar, agu séngn ngancéng téing ata lénggé.” Itu kali rabon lisé inéwai hitu.

⁶Maik mai taé de Mori Yésus: “Kongn ga, co’o tara pandé susa hias méu? Hia poli pandé ca ata di’an latang te Aku.

⁷Ai ata lénggé manga mtaungs agu méu, agu méu ngancéng campé isém, émé ngoéngs méu, maik Aku toé manga mtaung agu méuk.

⁸Hia poli pandé apa ata ngancéng pandé liha. Weki Daku luma pado liha tanda latang te améng boak Aku.

⁹Aku taé agu méu: Nia-nia kaut wan wéron Keréba Di’a oné temu tana lino, apa ata pandé diha ho’o, kudut caro koléy latang te nuk hia.”

¹⁰Itu kali ngon hi Yudas Iskariot, cengata ata nungkun oné mai isét campulu sua, ngo oné imam-imam kepala kudut te pika Mori Yésus oné isé.

¹¹Isé naka kétas du dengén lisé agu reké lisé kudut téing séng agu hia. Poli hitu hia kawé salang ata di’an kudut condo Mori Yésus.

¹²Du leso laring cain ramé Roti Toé Manga Ragin, du leso mbelé lisé domba Paska, ata nungku de Mori Yésus réi agu Hia: “Nia kéta wan ngoéng Dité kudut améng lami hang Paska latang te Ité?”

¹³Og wuat Liha sua taus ata nungkun agu pedén: “Ngo méu oné béndar, cai nitu méu, manga kali cumang agu méu cengata ata pola gumbang. Lut kaut hia méu,

¹⁴agu taé kaut le méu agu hiat ngara mbaru hitut ocok diha: Nggo’o pedé de tuang Guru, nia wan legang ata améng latang Aku kudut hang Paska cama-cama agu ata nungku Daku?

¹⁵Manga kali toin lata hitu agu méu ca legang éta lobo ata ngéngga kétay, ata poli kenanud agu poli mengkekd taung. Nitu kaut le méu wédin hang Paska latang te ité!”

¹⁶Itu kali ngod ata nungku situt sua agu du caid oné kota dumpu lisé sanggéd kéta taung cama ného hitut poli curup de Mori Yésus oné isé. Og kali wédi di’an lisé te adak hang Paska.

¹⁷Woko manég tana, cain Hia cama-cama agu ata nungku situt campulusua.

¹⁸Du rémé lonto situt agu hangd, mai taé de Mori Yésus: “Aku taé agu méu, moro matan, cengata oné mai méu te condo Akuy, ata rémé hang agu Akun.”

¹⁹Og susa nai laing kéta lisé, agu ca-cas réi agu Hia: “Mori, cala toép aku?”

²⁰Mai walé Diha: “Ata hitu cengata oné mai méut campulusua ho’o, hia hitu lembo roti oné mangko cama laing agu Akuy.

²¹Bo kali Anak Manusia kudut te ngo ného apa ata poli tulisn latang te Hia, landing copél da’at hiat condo Anak Manusia. Céwé di’an latang te ata hitu néka loasy danong.”

²²Du Mori Yésus agu ata nungkun lari hangd, Mori Yésus emi roti, ngaji berkak, pu’ils Liha, agu téing oné isé, agu mai taén: “Emim ga, ho’o de weki Daku.”

²³Poli hitu emi kolé Liha piala, ngaji wali diay, itu kali téing agu isén, agu sanggén taung isé inung oné mai piala hitus.

²⁴Agu mai taé Diha agu isé: “Ho’o de dara Daku, dara baté reké, ata bowo latang te ata do.

²⁵Aku taé agu méu: Moro matan, Aku toé kéta inung kolék waé oné mai pu’u anggor, dengkir du leso inungn Laku anggor weru oné Adak de Mori Keraéng.”

²⁶Du polis déréd isé, déré naring Morin, og dé ngod isé éta Golo Zaitun.

²⁷Itu kali Mori Yésus taé agu isé: “Sanggés méu te gégé-goa taung imbis. Ai manga ata poli tulis: Aku kudut ongga ata lami jimbal agu sanggéd jimbal kudut mbi-mbar taungs.

²⁸Maik du poli to’o kolég Aku, olo Aku kolé cai oné Galiléa itu po méu.”

²⁹Mai taé di Pétrus ngong Hia: “Koném po gégé-goa imbi disé, aku kali toé.”

³⁰Mai taé de Mori Yésus ngong hia: “Aku taé agu hau, moro matan, leso ho’o, léléng wié ho’o to’ong, toé di sua mu’us kakord lalong, hau poli pali Akum telu ngkalin.”

³¹Maik tambang kéta tu’ungn curup di Pétrus: “Koném po paka matak aku cama-cama agu Ité, aku toé kéta pali Iték.” Sangggéd isét do curup nenggitu kolés.

³²Itu kali cai Mori Yésus agu ata nungkun oné uma mina, ngasangn Gétsémani. Mai taé de Mori Yésus agu ata nungkun: “Lonto cé’é ho’o méu, Aku ngo ngajik.”

³³Agu Hia dadén hi Pétrus, hi Yakobus agu hi Yohanés. Hia rantang da’aty agu jejery,

³⁴itu kali mai taén ngong isé: “Wéong kéta nai Daku, cama ného kudut matak ga. Ka’éng cé’é ho’o méu agu wela koém.”

³⁵Hia lako nggere-olo cekoén, cembar kaut nggere-wa tanay agu ngajiy, kudut émé ngancéng susa pa’it ho’o hésing koé oné mai hian.

³⁶Mai taé Diha: “Ema, yo Ema, sanggéd cao-ca ngancéng taungs Lité, emi koé Lité piala susa ho’o oné mai Akun, maik néka lorong ngoéng Daku, lorong baté ngoéng Dité kali.”

³⁷Poli hitu Hia mai koléy agu repéng isét telu rémé tokod. Agu mai taé Diha ngong hi Pétrus: “Simon, toko kim hau ko? Toé nganceng ta’ong wela koé ca jamn?

³⁸Wela ga, agu ngaji koém, kudut méu néka hena le damangm; bo kéta nai lorong kauty, maik weki leme-léngkus.”

³⁹Og kali ngo kolén, agu ngajin ného bao.

⁴⁰Agu du mai kolén Hia, repéngs Liha isé lari toko kid, ai mbau tuju kid matad, agu toég pecing lisé co’o kéta walén lisé curup Diha.

⁴¹Poli hitu Hia mai kolé te telu ngkalin agu taé oné isé: “Toko kis méu agu asi maéls ko? Emo dé’it. Ho’og redun, lélo, Anak Manusia condo oné limé data ndékoky.

⁴²To’om ga, ngo tité ga. Hiat condo Aku ruis gi.”

⁴³Rémé kéta di’an curupn Mori Yésus, itu wan hi Yudas, cengata oné mai ata nungkun situt campulusua, agu cama laing agu hia do kéta ata, ata ba sempilang agu semambu, ata jera le imam-imam kepala, isét pecing Taurat agu le tu’a do.

⁴⁴Ata hitut condo Hia, poli toi tanda ho’o agu isé: “Ata hitut omo laku, hitu dé Hia, deko le méu Hia, agu todang Hia le méu jerék koém.”

⁴⁵Agu du cai nitun hia, hidi-hadan ngo cumang Mori Yésus agu mai taén: “Io Guru”, itu kali omo Hian.

⁴⁶Og caun lisé Mori Yésus agu deko Hias.

⁴⁷Cengata oné mai isét hesé nitu werus sempilangn, agu paki mendi de Imam Mésé wiga campuk muing tilun.

⁴⁸Mai taé de Mori Yésus ngong isé: “Nuk de méu Aku ho’o empo-déhongk wiga mai ba muing sempilang agu semambus latang te deko Aku?

⁴⁹Kali po Aku lété leso manga oné bahi-réha méuk, toing oné Mbaru de Mori Keraéng, agu méu toé deko Akum. Landing paka helek kin apa ata poli tulis oné Surak Nggeluk.”

⁵⁰Og pencangn Hia le ata nungkun agu losi kéta taungs.

⁵¹Manga cengata ata reba, du hitu hia wéngko kaut ngggebary, lut Hia. Isé kudut deko hias,

⁵²maik lego kaut nggebarn agu losi wekin kanang.

⁵³Poli hitu todang lisé Mori Yésus nggere-oné ranga de Imam Mésé. Nitus lipurd sanggéd imam kepala, taung ata tu’ad, agu ata pecing Taurat.

⁵⁴Agu hi Pétrus lut kin déu main, dengkir cai oné natas de Imam Mésé, agu nitu hia lonto oné bahi-réha ata lami nitu cang agu pisu apis.

⁵⁵Sanggéd imam kepala agu sanggéd adak de agama kawé ata sakasi te dungkang Mori Yésus, kudut Hia ngancéng alay, maik toé laong dumpun lisé.

⁵⁶Do kolé ata, ata téing sakasi nggopét latang te Hia, maik sanggéd sakasi situ toé laing ca torokd.

⁵⁷Og hesé pisa taus ata téing sakasi kudut dungkang Hia, ali sakasi nggopét ho’o:

⁵⁸“Ami poli dengé curup data ho’o: Aku kudut pandé renco Mbaru Nggeluk ho’ot pandé de manusia agu oné telu leso kaut wa, kudut hesé Mbaru Nggeluk bana, ata toé pandé le limé de manusia.”

⁵⁹Sakasi ho’o disé, léléng toé kolé manga laing cad.

⁶⁰Itug kali hesén Imam Mésé oné bahi-réha lonto-léok hitu agu réi oné Mori Yésus, taén: “Toé kéta walés le Hau buang disét sakasi so’o?”

⁶¹Maik Hia hema kin, agu toé manga walé koé cekoén. Imam Mésé hitu réi cengkalin kolé agu Hia, taén: “Asa weli ga, hi Mesias Hau ko, Anak de Mori Ata Naring Laing?”

⁶²Mai walé de Mori Yésus: “Tu’ung, Aku ho’oy, agu kudut ita le méu Anak Manusia lonto oné racap wanang de Mori Pu’un Kuasa, agu mai lobo rewung éta awangy.”

⁶³Og kali Imam Mésé hitu wirot ceca pakén agu mai taén: “Te co’on kolé di kawéd ata sakasi?

⁶⁴Polig dengén le méu loér Diha kamping Mori Keraéng. Co’o kali nuk de méu ga?” Itu kali ca nai kauts isé beté kudut Hia paka ala mata muingy.

⁶⁵Itu kali pu’ung pisa taus ata situ iso Hia agu tadu rangan, agu racuk Hia cang agu mai taéd: “Oé nabi, céing ata ho’ot ongga Hau?” Nenggitu kolé isét mendi lami, ongga Hias.

⁶⁶Du hitu hi Pétrus wa natas kin. Itu kali mai cengata mendi inéwai de Imam Mésé,

⁶⁷agu du itan le inéwai hitu hi Pétrus lari pisu apin, jeténg kéta lélon agu mai taén: “Hau kolép ca ata laséng cama-cama agu Mori Yésus, ata Nasarét hitu.”

⁶⁸Maik pali liha agu mai taén: “Toé pecing laku, agu toé pamot laku apa hitut curup de hau.” Itu kali ngon hia nggere-pé’ang lewang [agu kakor lalong].

⁶⁹Du ita kolé le mendi inéwai hitu hi Pétrus, mai kolé taé diha ngong ata situt manga nitu: “Ata ho’o de haé lako disé.”

⁷⁰Maik pali kolé li Pétrus. Remon wa ga, sanggéd ata situt manga nitu curup kolés agu hi Pétrus: “Hau ho’o kolé toét-toé cengata oné mai isé, céwén kolé hau ata Galiléah!”

⁷¹Itug kali mawang agu sumpan hi Pétrus: “Aku toé pecing ata ho’ot curup de méu!”

⁷²Agu du hitu muing kakor lalong te suang kalin. Itug kali nukn li Pétrus, te Mori Yésus poli dé’it curup agu hian: “Toé di sua mu’un kakor lalong, hau poli pali Akum telungkalin.” Og kali nenut kéta rétangn.