Read Manggarai MARKUS 15 Bible Online

MARKUS 15 - Manggarai bible

MARKUS 15

¹Du gula ucap muing sanggéd imam kepala agu taung ata tu’ad agu isét pecing Taurat agu sanggéd Adak Agama poli bantang camad, nai ca anggit, tuka ca léléng. Isé wasé Mori Yésus agu todang Hia agu condo Hia oné ranga di Pilatus.

²Mai réi di Pilatus agu Hia: “Raja data Yahudi Hau ko?” Walé kaut le Mori Yésus: “Taé de rum haup kali hitu ta!”

³Itu kali sanggéd imam kepala do kéta buang latang te Hia.

⁴Hi Pilatus réi kolé agu Hia, taén: “Toé kéta walés le Hau ko? Lélo kaut, leng kéta bail dod buang disé latang te Hau!”

⁵Maik Mori Yésus toé kéta walé koé cekoén, wiga lenget laing kolé li Pilatus.

⁶Laséngn manga ruku latang te lego cengatan ata bui du leso ramé lorong tegi data do.

⁷Agu du hitu manga cengata, ngasangn hi Barabas, lari buin cama-cama agu pisa taus ata pandé raha. Isé poli mbelé atad du raha.

⁸Og kali maid ata do agu tegi kudut lut kin ruku manga hitu.

⁹Mai walé di Pilatus agu isé, agu réi: “Goris méu kudut lego laku latang te méu raja Yahudi ho’o?

¹⁰Ai pecing muing Liha, te sanggéd imam kepala condo Mori Yésus ali guér.

¹¹Maik sanggéd imam kepala sosok lawa do, kudut tegi lego hi Barabas latang te isé.

¹²Cangkalin kolé walén li Pilatus agu réi oné isé: “Émé nggitu, co’o laku pandén ata ho’ot caro de méu raja data Yahudi?”

¹³Mai kolé kepok disé, taéd: “Pépék Hia oné panggol!”

¹⁴Mai taé di Pilatus oné isé: “Da’at apa ata poli pandé liha?” Maik isé tambang kéta kepok: “Pépék Hia oné panggol!”

¹⁵Agu landing kudut karét nai data do situ, hia lego hi Barabas latang te isé. Maik Mori Yésus lucay lisé, poli hitu condo liha kudut pépék oné panggoly.

¹⁶Poli hitu sanggéd serdadu todang Mori Yésus nggere-oné mbaru dé adak, mbaru beté-bicar, agu bénta taung sanggéd serdadu impung nitus.

¹⁷Isé sélék Hia le juba rembung, wéngké karot gulung agu paséy éta ulu Diha.

¹⁸Poli hitu wangka lisé tabén Hia, mai taéd: “Tabé, yo raja data Yahudi!”

¹⁹Isé ongga sa’i Diha le helung, agu iso-pé Hias, agu tikul io Hias.

²⁰[20a] Woko poli loér-lokétn Hia lisé, loak lisé juba rembungn hitu oné mai weki Diha agu cuki kolé juba run Hia. [20b] Poli hitu Mori Yésus todang nggere-pé’angy kudut pépéky lisé oné panggol.

²¹Du hitu, liba nitu cengata, ngasangn hi Simon ata Kiréné, ema di Aléksandér agu hi Rufus, ata hitu di mai pé’ang mai béndarn, agu ata hitu duduk lisé kudut pola panggol de Mori Yésus.

²²Todang lisé Mori Yésus nggere-oné ca osang ata ngasangn Gologota, ngong: Osang Toko Longkor.

²³Itu kali téing anggor halok agu mur lisé oné Hia, maik toé inung Liha.

²⁴Poli hitu pépék lisé Hia oné panggol, og kali pati lisé ceca paké Diha, ali téka-nampo molé.

²⁵Ongga ciok le leso du pépékn Hia oné panggol.

²⁶Agu apa rajan tara wahéngn Hia, caroy oné tulis hitut manga nitu: “Raja Data Yahudi.”

²⁷Cama-cama agu Hia, pépék oné panggol kolés sua taus ata tako cengata oné racap wanangn, agu cengata oné racap léon. [

²⁸Laingn kéta pakep muing curup oné Surak Nggeluk, taén: “Hia te bilang ného ata da’aty lata.”]

²⁹Sanggét ata liba nitu, loér Hias, agu cang agu ngéngur sa’id, mai taéd: “Oé Haut nanang pandé renco Mbaru Nggeluk, agu ngoéng te pandé kolé oné telu leso kauty,

³⁰wa’uh de éta mai panggol hitu agu campé weki Rum!”

³¹Nenggitu kolé loér Hia le sanggéd imam kepala, cama-cama agu isét pecing Taurat, agu mai taé disé: “Ata bana Liha campés, maik weki Run Hia toé ngancéng!

³²Damang de, oé Mesias, Raja Israél, wa’uh éta mai panggol hitu, kudut ita agu imbi lami.” Nenggitu kolé isét sua, situt pépék cama agu Hia, loér Hia kolés.

³³Du ongga campulusua, nendep haéd ciri oné temu tana hitu dengkir ongga telu.

³⁴Agu du ongga telu kepok Mori Yésus agu werés kéta rewengn: “Éloi, Éloi, lama sabaktani?” ngong: Mori gé, é Mori gé, co’o tara pencang Akud Ité?

³⁵Dengé hitus, mai taé data iwod ata hesé nitu: “Lélo, Hia bénta Éliay!”

³⁶Itu kali main cengata ba bunga karangy, lembo liha oné anggor héo, itu kali tudukn liha oné ca helung agu téi Mori Yésus te inung, agu mai taén: “Géréng di lité, olong lélo di, ot mai hi Élia te ulur Hia nggere wa.”

³⁷Og kali kepokn Mori Yésus agu werés kéta rewengn agu beté nain.

³⁸Du hitu rinding de Mbaru Nggeluk, jija laing suay mai éta main haéng wan.

³⁹Du kepala serdadu ata hesé dungka Hia, ita rowa Diha nenggituy, mai taén: “Tu’ung kéta ata ho’o Anak de Mori Keraéng.”

⁴⁰Manga kolé pisa taus inéwai ata porong déu-maid, ného hi Maria Magdaléna, hi Maria endé di Yakobus ata reba agu asen hi Yosés, agu hi Salomé.

⁴¹Sanggéd taung isé poli lorong Mori Yésus agu campé Hias du Hia oné Galiléan. Agu manga kolé iwod nitu, inéwai bana ata poli mai oné mai Yérusalém cama laing agu Mori Yésus.

⁴²Rémé nggitun wangkag manén tana, agu leso hitu leso nangket, ai ného diangn leso Sabat.

⁴³Landing hitu hi Yusuf, ata Arimatéa, cengata oné mai lit de Adak Mésé, ata géréng cain Adak de Mori Keraéng, cukung kétay ngo oné hi Pilatus, agu tegi rapu de Mori Yésus.

⁴⁴Lenget laing li Pilatus woko dengé poli rowan Mori Yésus. Og kali béntan liha kepala serdadu, agu réi oné hia, ot poli rowan Mori Yésus.

⁴⁵Woko poli dengén liha tombo de kepala serdadu, og sendon liha téing rapu hitu oné Yusuf.

⁴⁶Hi Yusuf olong weli towé hemély, poli hitu hia téti rapu de Mori Yésus éta mai panggoln agu wuwus liha ali towé hemél hitu. Poli hitu loling Hia oné boa ata poli tekangn oné péré watu. Poli hitu nggoling liha ca watu mésé, kudut tadu para boa hitu.

⁴⁷Hi Maria Magdaléna agu hi Maria endé di Yosés ita lisé nia baté boakn Mori Yésus.