Read Manggarai MARKUS 2 Bible Online

MARKUS 2 - Manggarai bible

MARKUS 2

¹Poli hitu, pisa leso musi main, du Mori Yésus cai kolé oné Kapernaumy, dengé tombo te Hia manga oné mbaruy.

²Og maid kolé ata do nemper nitus wiga ké’ot muing mbaru, haéng para lé. Lari kéta tombo keréba di’an Hia agu isé,

³manga kolé ata te dadé wa ranga Diha cengata ata péko, pat taus ata rakangn.

⁴Maik isé toé ngancéng ba dungka Hia, ai do baild ata situ, itu kali rongkasn lisé éta mbaru dungka Hia; woko lénga gi, ulur wan lisé ata péko hitu do’éng agu berotongn.

⁵Du ita le Mori Yésus imbi disé, mai taé Diha ngong ata péko hitu: “Oé anak Daku, polig ampongd ndékokm!”

⁶Maik nitu manga kolé lontod pisa taus ata pecing Taurat, manga nuk oné naid:

⁷“Co’o ata ho’o tara curup nenggitun? Hia mbécik Mori Keraéngy. Céing ata ngancéng ampong ndékok, bom hanang Mori Keraéng kali?”

⁸Maik gélang muing pecingn le Mori Yésus, te isé nuk nenggitus, og kali mai taé Diha ngong isé: “Co’o tara nenggitun nuk oné nais méu?

⁹Nia ata céwé émongn, curup agu ata péko ho’o: Ndékok de hau polisg ampongd, ko curup nggo’o: To’oh ga, téti brotongm agu lakoh?

¹⁰Maik kudut pecing le méu, te oné lino ho’o Anak Manusia manga kuasan te ampong ndékok” — maig taé Diha ngong ata péko hitu -- :

¹¹“Latang te hau, Aku taé, to’oh ga, téti brotongm agu kolé nggere-oné mbarum!”

¹²Agu ata hitu heséy, gélang-gélang téti brotongn agu ngo nggere-pé’angy oné ranga de lawa do situ, wiga sanggéd isé jenger taungs, og kali naring Mori Keraéng, mai taéd: “Pandé nenggo’o toé dé’it manga itan lité.”

¹³Poli hitu Mori Yésus ngo kolé lupi sanoy, agu sanggéd taung ata do mai oné Hias, itug kali Hia toing isén.

¹⁴Rémé lako nitun Hia, ita Liha hi Léwi anak di Alféus lonto oné mbaru tegi béa, itu kali mai taé Diha ngong hia: “Mai é, lut Akuh!” Itu kali hesén hi Léwi ngo lut Hiay.

¹⁵Poli hitu, du Mori Yésus hang oné mbaru diha hitu, do kétas ata tegi béa agu ata ndékok hang cama-cama agu Hias agu ata nungku Diha, ai do kéta ata lut Hia.

¹⁶Du ata pecing Taurat agu ata Parisi ita te Hia hang rénjang kétay agu isét tegi béa agu ata ndékok situ, mai taé disé agu ata nungku Diha: “Co’o Hia tara hang rénjang kéta agu ata tegi béa agu ata ndékok?”

¹⁷Dengé le Mori Yésus réi disé agu mai taén ngong isé: “Toé ata weki di’a ata kawé doktér, maik ata beti; mai Daku toé latang te kawé ata nggeluk, maik ata ndékok.”

¹⁸Manga cengkalin du ata nungku di Yohanés agu ata Parisi lari puasad, mais ata agu réi oné Mori Yésus: “Co’o tara ata nungku di Yohanés agu isét Parisi puasas, maik ata nungku Dité toé?”

¹⁹Mai walé de Mori Yésus agu isé: “Ngancéng weli haé reba dihat kopé harat puasas, égém hiat kopé harat hitu cama laing agu isén, isé toé ngancéng puasas.

²⁰Maik manga leson tai, hiat kopé harat hitu emi oné mai isén, agu du hitu di isé te puasas.

²¹Toé manga cengatan ata tumpak caré ata toéd neket oné baju boték, ai émé nenggitu caré-caré hitu te pandé tambang biretn, ata werun pandé biret hitut mangan, itug kali tambang kéta mésén biretn.

²²Nenggitu kolé néng, toé manga cengatan ata loli anggor weru nggere-oné kandi luit manga, ai émé nenggitu anggor hitu agu kandin oké taungs. Maik anggor weru paka loli oné kandi weru koléy.”

²³Manga cengkalin du leso Sabat, Mori Yésus lako oné uma gandum, agu lari lakod ata nungku Diha, ako lisé gandum.

²⁴Mai taé data Parisi ngong Hia: “Lélo dé! Co’o isé tara pandé nenggo’od ata ireng laing du leso Sabat?”

²⁵Mai walé Diha agu isé: “Toé léng baca dé’it le méu apa ata poli pandé di Daud, du hia agu isét haé lakon toé manga hapéd agu darems,

²⁶co’o hia ngo nggere-oné Mbaru de Mori Keraéngy du hi Abyatar ciri ata Imam Méséy, itug kali hang roti takung situ — ata ireng kéta te hang lata banas, bom sanggéd imam — agu téing kolé liha agu isét haé lakon?”

²⁷Mai kolé taé de Mori Yésus agu isé: “Tara mangan leso Sabat latang te ata manusia agu toé manusia latang te leso Sabat,

²⁸ai Anak Manusia kolé Mori de leso Sabat.”