Read Manggarai MARKUS 3 Bible Online

MARKUS 3 - Manggarai bible

MARKUS 3

¹Poli hitu Mori Yésus ngo kolé nggere-oné mbaru ngajiy. Nitu manga cengata ata matag limé can.

²Isé lémét mtaung Mori Yésus émé pandé ina ata hituy du leso Sabat, kudut isé ngancéng pandé hena le salan Hia.

³Mai taé de Mori Yésus ngong ata hitut matag limé can hitu: “Mai cé’é ho’oh, hesé oné réha hau!”

⁴Poli hitu mai taé Diha ngong isé: “Nia ata ngancéng du leso Sabat, pandé di’a ko pandé da’at, pandé selamak mosé data ko paki ata?” Maik hema kaut isé situ.

⁵Hia nawes kéta nain ali teger nai disé, agu déméng cumpengn Hia énam taung ata lupi Hia, itug kali curupn oné ata hitu: “Lendor limém hitu ga!” Agu hia lendor limén, itug kali rodo ina kaut limén hitu.

⁶Itug kali ngo nggere-pé’angd ata Parisi agu gélang-gélang bantang camad agu ata Hérodian te ala Hias.

⁷Poli hitu Mori Yésus agu ata nungkun hedong ngo lupi sanos agu do ata oné mai Galiléa lut Hias. Nenggitu kolé ata oné mai Yudéa,

⁸oné mai Yérusalém, Iduméa, besina mai waé Yordan, agu oné mai Tirus agu Sidon, do kéta ata mai oné Hia, du poli dengén lisé sanggéd taung situt poli pandé Diha.

⁹Hia jera ata nungkun améng can wangka latang te Hia, ai lawa do situ rantang kéco Hia lisé.

¹⁰Ai Hia pandé ina ata do, wiga sanggéd isét beti dedek-dedek taud nggere-oné Hia kudut cabi Hias.

¹¹Woko isét hena le jing da’at ita Hias, isé cembar taungs wa ranga Diha agu ciékd: “Ata ho’o tu’ung-tu’ung Anak de Mori Keraéngy!”

¹²Maik Hia ré’ing tu’ung kéta isé, néka tombo céing kéta Hia.

¹³Poli hitu Mori Yésus tuké nggere-éta goloy. Hia bénta isét baté ngoéng Diha agu isé kolé néng mai oné Hias.

¹⁴Hia pilé isét campulu sua latang te lut Hias agu latang te wuats Liha ba Keréba Di’a

¹⁵agu téing Liha kuasa latang te mbér jing da’at.

¹⁶Isét campulu sua ata poli pilé Liha ho’os: hi Simon ata téing ngasangn Liha hi Pétrus,

¹⁷hi Yakobus anak di Zébédéus, agu hi Yohanés asé di Yakobus, isét sua so’o téing ngasang koéd Liha Boanérgés, ngong mberes ného genggus,

¹⁸poli hitu hi Andréas, Pelipus, Bartoloméus, Matéus, Tomas, Yakobus anak di Alféus, Tadéus, hi Simon ata Zélot,

¹⁹agu hi Yudas Iskariot hiot pika Hia.

²⁰Poli hitu Mori Yésus ngo nggere-oné ca mbaruy. Itug kali maid kolé lawa do, nemper kolés, wiga toé ngancéng te hangs.

²¹Du asé-ka’é Diha dengé taungs pandé situ, isé kudut mai dadé Hia, ai lorong taé disé Hia toég salang bonén curupn.

²²Agu isét pecing Taurat ata mai oné mai Yérusalém, taéd: “Hia koro le Béélzébul, agu le kuasa de tu’a de jing da’at hia mbér jing da’at.”

²³Mori Yésus béntas isé, og kali curup agu isé ali rapang moléy: “Ngancéng jing da’at mbér kolé jing da’aty?

²⁴Émé ca pemerénta bikéy, pemerénta hitu toé ngancéng ndengn,

²⁵agu émé ca kilo bikéy, ka’éng kilo hitu toé ngancéng ta’angn.

²⁶Nenggitu kolé émé jing da’at cangkar cama taud agu émé pati sua hia, hia toé ngancéng ta’angn, maik hitug cain kudut mempoy.

²⁷Maik toé manga cengatan ata ngancéng purak mbaru de laki te rampas cecan émé toé di olong pongoy ata laki hitu. Poli hitu hia po ngancéng rampok mbaru hitu.

²⁸Aku taé agu meu: Ata tu’ungn, sanggéd ndékok agu mbéis de sanggéd anak manusia, te ampongs agu sanggéd mbéis ata caro liséd.

²⁹Maik émé manga cengata ata mbéis Nai Nggeluk, hia toé manga ampongn tédéng lén ai ndékok hitu cameng dengkir tain.”

³⁰Tara nenggitun curup Diha, ai taé disé, Hia rasung le jing da’aty.

³¹Itug kali mais endé agu asé-ka’é de Mori Yésus. Rémé hesé bepé’angd isé, jera lisé ata kudut bénta Hia.

³²Manga ata do lonto léok Hias, isé tombo oné Hia: “Lélo dé, endé agu asé-ka’é Dité manga bepé’angs, agu nanang te cumang Ités.”

³³Mai walé de Mori Yésus agu isé: “Céing néng endé Daku agu céing kolés néng asé-ka’é Daku?”

³⁴Hia lélo kéta taungs sanggéd ata situt lonto léok Hias nitu, agu taén: “Ho’os endé Daku agu asé-ka’é Daku!

³⁵Céing-céing ata pandé lorong ngoéng de Mori Keraéng, isé situ asé ka’ég, isé situ wetag, isé situ endé Daku.”