Read Manggarai MARKUS 4 Bible Online

MARKUS 4 - Manggarai bible

MARKUS 4

¹Manga cangkalin Mori Yésus pu’ung kolé toing oné lupi sanoy. Itug kali maid ata logur-kouk kétas nemper ruis Hia, wiga Hia lonto lobo ca wangka ata ngai ka’éngn, og kali lonto nitun, maik isét lawa do situ, pé’ang tana masas, oné lupi sano hitu.

²Agu do kétas toing Diha le rapang molé agu isé. Oné toing situ nggo’o taé Diha ngong isé:

³“Séngét di’a-di’am ga! Manga cengata ngo wécak wini.

⁴Du rémé wécakd liha, manga iwod wini situ pa’u oné lupi salangs, itu kali maid kaka lélap, agu tenggok kéta taungs.

⁵Iwod pa’u éta lobo watu nampars, hiot toé do tanan, itug kali gélang todod, ai mipis tanan.

⁶Landing du étan leso, mélo taungs agu dangos ai toé kong wakéd.

⁷Iwod kolé pa’u bahi-réha karots, woko ludung kolés karot situ agu kecé bélak situ wiga matad, wiga toé manga wuad.

⁸Agu iwod pa’u oné tana behengs, todos uwa wié-lesod agu wuas, danid manga ata alép telumpulu, manga ata alép enempulu, manga kolé ata alép ceratusd.”

⁹Agu mai taé Diha: “Céing-céing ata manga tilun te séngét, séngét di’a-di’a!”

¹⁰Du hanang koén Hia, ata situt lut Hia agu campulusua taus ata rasul réi Hia apay betuan rapang hitu.

¹¹Mai taé Diha: “Agu méu poli téing nggalas nai kudut pecing pété ceha Adak de Mori Keraéng, maik latang te ata bana sanggéd cao-ca toing le rapang molés,

¹²kudut: Koném po ita lisé, maik toé idep koném po séngéts lisé, maik toé tingo, kudut isé néka tesérs agu ampong ndékokd.”

¹³Itu kali mai taé Diha ngong isé: “Toé pecing le méu betuan rapang ho’o?

¹⁴Émé nenggitu co’o kolés pecingd ba kréba de Mori Keraéng.

¹⁵Sanggéd ata situt lupi salang, baté wécakn wini hitu ngong isét dengé curup hitu og main jing da’at agu emi curup situ oné mai iséd.

¹⁶Nenggitu kolé siot weri oné watu nampar, ngong ata siot lélak kétas te dengé curup hitu

¹⁷maik toé wakéy agu ce koé kauty. Émé poli hitu cai denet data ko mosé céncés ali curup hitu, isé hedongs.

¹⁸Agu situt iwod ngong siot weri oné bahi-réha remang karot, hitus ata dengé curup hitu,

¹⁹wajo le simpung de lino ho’o agu ali nggopét de bora agu belek sanggéd apa bana, ngo nggere-onés agu kecé curup hitu wiga toé wuas.

²⁰Agu cemoln siot weri oné tana beheng ngong ata siot séngét agu tiba reweng hitu, itug kali wuad, manga ata alép telumpulud, manga ata alép enempulu agu mangas ata alép ceratusd.”

²¹Mai Mori Yésus curup agu isé: “Ata ba culu toé kudut pésék wa roto be way ko be wan wongka tokoy, maik kudut pésék oné bongga run.

²²Ai toé manga can situt cehas ata toé ita si’angs, agu toé can situt bonés ata toé cirik pecings.

²³Céing ata manga tilun te séngét, séngétm ga!”

²⁴Mai kolé taé Diha: “Pinga di’a koé hitut dengés! Tongka hitut paka méu latang te méu, agu manga kolé te tambang oné méu.

²⁵Ai céing ata mangan, te téing oné hia, maik céing ata toé mangan, apa kaut ata mangan oné hia, kudut emi oné mai hiad.”

²⁶Mai taé de Mori Yésus: “Nenggo’oy Adak de Mori Keraéng hitu: cama ného ata weri wini oné uma,

²⁷itug kali le wié hia ngo tokoy agu le gula hia to’on, agu wini hitu gumuky agu gélang langkasn, co’o ko co’o kaut tara nenggitun, toé pecing liha hitu.

²⁸Tana lino le run pandé wuan, laring cain olong tokorn, poli hitu kétén, poli hitu wuan repas cengkali oné kétén.

²⁹Émé té’é kéta gi ata hitu pu’ung akon, ai cekeng ako cai gi.”

³⁰Mai kolé taé Diha: “Co’o kéta koléy kudut tomingn lité Adak de Mori Keraéng hitu, ko ali rapang ného nia koléy lité?

³¹Adak hitu rapangn cama ného wini sawé ata weri wa tana. Bo kali wini hitu kéta ata merikn oné mai sanggéd wini ata mangad oné lino.

³²Maik émé weriy, todoy agu ciri céwé mésé oné mai sangged uté bana agu génggam kéta dangkan, wiga kaka lélap éta awang ngancéng pandé cewo bonén.”

³³Do kéta tarad rapang nenggitun Hia tombo oné isé lorong agu tingo disé,

³⁴agu toé kéta manga ata toé le rapang moléd Liha curup agu isé, maik latang te ata nungku Diha, tombo dungka taungs Liha sanggéd cao-ca émé hanang koéd.

³⁵Léléng leso hitu kin, du manég tana, Mori Yésus taé agu isé: “Mai ga ité ngo be sinat.”

³⁶Isé ledong ata do situ agu ngod, agu dadé Mori Yésus cama laing agu isé oné wangka agu ngai lonto kin, agu sanggéd wangka cebana kolé lut Hias.

³⁷Rodo tuan warat agu bombang mésé kawo wangka disé wiga wangka hitu penong le waé.

³⁸Du hitu Mori Yésus lari tokon bemusin wangka hitu oné ca wongka. Mai ata nungkun kéngko Hia agu mai taéd: “Tuang Guru, toé kéta pinga Lité, kudut te copélt ite?”

³⁹Itu kali to’on Hia wa mai, kenta warat hitu agu curup nggere-oné sano hitu: “Lik hau ga! Leteth ga!” Itug kali likn warat hitu agu sano hitu letet tu’ungy.

⁴⁰Og kali mai taé Diha ngong isé: “Co’o tara rantang kétas méu? Co’o tara toé imbin le méu?”

⁴¹Isé rantang kétas agu curup cama taud: “Céing kéta péng hia ho’o, wiga warat agu sano lorong kaut perénta Dihas?”