Read Manggarai MARKUS 5 Bible Online

MARKUS 5 - Manggarai bible

MARKUS 5

¹Itus kali caid isé sano besinad, oné tana data Gerasa.

²Ného itun di Mori Yésus wa’u oné mai wangkan, main cengata ata henag le jing da’at oné mai boa kudut cumang Hia.

³Ata hitu ka’éng nituy agu toé kéta manga cengatan ata ngancéng te pongo hia, koném po le ranté,

⁴ai poli dongkalin hia pengkutn agu rantéy, maik pandé beté taungs ranté liha agu tepo taungs langki situt pengkut hia, wiga toé manga cengatan ata remo koé mberesn te kukut hia.

⁵Wié-leson hia labok oné boa hitu agu labok golo cang agu ciékn agu ongga weki run le watu.

⁶Du ita liha Mori Yésus déu main, mburuk hia te cumang agu suju Hiay,

⁷agu reweng mésén hia kepokn: “Kudut co’og aku Lité Mori Yésus, anak de Mori Keraéng? Moro matan Mori, néka wahéng aku!”

⁸Ai poli dé’it curupn le Mori Yésus agu hia: “Oe poti jing da’at! Pé’angh ga oné mai ata ho’o!”

⁹Poli hitu Hia réi agu ata hitu: “Céi ngasang de hau?” Mai walén: “Ngasang daku hi Légion, ai ami ata dokm.”

¹⁰Hia geso kéta tegin kudut Mori Yésus néka wur sanggéd jing situ oné mai tana hitu.

¹¹Manga nitu oné ampak golo do kétas ela rémé kawé hangd,

¹²mai sanggéd jing situ tegi agu Hia, mai taéd: “Jera koé ami te ka’éng oné sanggéd ela situ!”

¹³Mori Yésus sendo tegi disé. Itug kali pé’angd sanggéd jing situ agu ngo oné sanggéd ela situs. Ca néwas ela situt am sua sebu dod woncek oné mai tado ngampang nggere-wa sano agu mata taungs oné itu.

¹⁴Og kali losi kéta taungs ata situt lami ela situ agu tombo apa hitu oné béndar agu oné béo baling main. Ali hitu wiga mai kéta taung ata kudut lélo apa hitut poli jarin.

¹⁵Isé mai oné ranga de Mori Yésus agu ita ata hitut henang le jing da’at ngai lonton, polig paké bajun agu ina gi, ata hiot hena le Légion hitu. Wiga rantang kéta taungs isé.

¹⁶Sanggéd ata situt poli ita le rud pandé hitu, tombo agu isé co’oy ata poli jarin oné weki data hitut henang le jing hitu agu sanggéd ela situ.

¹⁷Itug kali isé soka Mori Yésus kudut Hia legong tana disé hitu.

¹⁸Du kudut ngo nggere-oné wangkan Mori Yésus, mai kolé ata hiot poli henang le jing bao tegi kudut sendo koéy te lut Hia.

¹⁹Toé sendo le Mori Yésus, maik mai taé Diha ngong ata hitu: “Koléh ga nggere-oné mbarum, nggere-oné haé béom, agu tombo oné isé sanggéd cao-ca ata poli pandé de Mori Keraéng oné wekim agu co’o Hia poli momang haun!”

²⁰Ata hitu koléy agu pu’ung wéro-émbongd liha oné temu tana Dékapolis sanggéd cao-ca ata poli pandé de Mori Yésus oné wekin agu sanggéd isé lenget kéta taungs.

²¹Du poli ngo besina sanon kolé le wangkan Mori Yésus, ata do lusut kétas maid cewur oné Hias. Lari Hia manga oné lupi sanon,

²²tuan kolé cengata kepala mbaru ngaji, ngasangn hi Yairus. Du cumangn liha Mori Yésus, tikul hia wa wa’i Diha,

²³agu geso kéta tegin oné Hia: “Anak inéwai daku lari betin, éta bokak nain ga, cala ngancéng koé ngot agu témba koé limé Dité bétan, kudut cébon agu kong mosén.”

²⁴Itug kali ngon Mori Yésus agu ata hitu. Do cengkali ata lut Hia agu pémpét nia-niad baling Hias.

²⁵Manga kolé nitu cengata inéwai ata campulusua ntaung’g béhéngn hena le ru’u gogang.

²⁶Hia poli dong kalin rewos le doktér, wiga cipot taung paéngn ata manga oné hiad, maik kéba bod kaut, ngot tambang molé betin.

²⁷Hia poli dengé tombo datan latang te Mori Yésus, o kali oné bahi-réha lawa do situ, hia lut Mori Yésus musi main agu cau juba Dihay.

²⁸Ai nuk diha: “Am cabi kaut laku juba Diha, ina muing betig.”

²⁹Du hitu kéta muing meti-jit kaut daran, agu noing’g liha, te weki diha polig inan oné mai betin.

³⁰Du hitu kéta muing kolé pecingn le Mori Yésus te manga kuasa ata pé’angn oné mai weki Diha, itug kali holés nggere-musin oné beréha lawa do situ agu mai réin: “Céing ata cau juba Daku?”

³¹Mai walé de ata nungku Diha: “Bom toé itas Lité lawa do so’ot dudi ruis weki Dité, agu mai weli Ité réi kolé: Céi ata cau Aku?”

³²Og kali énam Liha lawa do situt baling main kudut te lélo céi hitut poli cabi juba diha.

³³Inéwai hitu rantang da’aty agu jejer du pecing liha apa ata poli jari oné wekin, mai agu tikul wa ranga de Mori Yésus agu molor kéta tombon sanggéd cao-ca agu Hia.

³⁴Mai taé Diha ngong inéwai hitu: “O anak Daku, le imbim tara di’am hau. Koléh ga agu nisang naim, ai poli inan betim!”

³⁵Rémé kéta curupn Mori Yésus, caid ata oné mai mbaru de kepala mbaru ngaji hitu agu mai taéd: “Anak dité rowa gi, te co’o koléd ité cégotn keraéng Guru?”

³⁶Maik Mori Yésus toé pinga laing curup disé agu curup oné kepala mbaru ngaji hitu: “Néka rantang, imbi kaut!”

³⁷Itug kali Mori Yésus toé sendo cengatan ata lut, bo hi Pétrus, hi Yakobus agu hi Yohanés asé-kaé di Yakobus.

³⁸Isé cai oné mbaru de kepala mbaru ngaji agu nitu ita Liha ngai-ngaok kétas ata, rétang agu jéjéngs.

³⁹Du cai onén Hia, mai taé Diha ngong ata do situ: “Co’o tara ngaoks agu rétangs méu? Anak koé ho’o toé matay, maik ata tokoy!”

⁴⁰Maik tawa laing molé lisé Hia. Og kali jera ngo pé’angs Liha sanggéd ata situ, itu kali dadéd Liha ema agu endén anak koé hitu agu isét cama-cama agu Hia, nggere-oné lo’ang de anak koé hitu.

⁴¹Itug kali cau Liha limé de anak koé hitu, mai taén: “Talita kum,” ngong: “Oé anak, Aku taé agu hau, to’oh ga!”

⁴²Du hitu kéta muing anak koé hitu to’on agu lakoy, ai campulusua ntaung’g umurn. Sanggéd ata situt manga nitu lenget kéta taungs.

⁴³Langi tu’ung Liha agu isé, kudut néka cengatan ata pecing pandé hitu, og kali jeras Liha isé téing hang anak koé hitu.