Read Manggarai MARKUS 7 Bible Online

MARKUS 7 - Manggarai bible

MARKUS 7

¹Manga cangkalin ca liups ata Parisi agu pisa taus ata pecing Taurat oné mai Yérusalém mai cumang Mori Yésus.

²Ita lisé te manga pisa taus ata nungku Diha hang déméng limé sakid, ngong toé olong samo liméd.

³Ai sanggéd ata Parisi cama ného ata Yahudi, toé ngancéng hangs émé toé olong samo liméd, ai isé lorong ruku éta mai empod;

⁴agu émé kolé oné mai ambad toé rodo hangs, émé toé olong samos. Do kolé wintuk bana ata cau disé, ného rapang nawi cangkil, gelo agu kembokang.

⁵Ali hitu ata Parisi agu ata pecing Taurat situ réi oné Hia: “Co’o tara ata nungku Dité toé mosé lorong wintuk de adak disé empo dité, maik hang déméng limé sakid?”

⁶Mai walé Diha agu isé: “Getok tu’ung curup di nabi Yésaya latang te méu, oé ata pisik! Ai nggo’o tulisn: Wa’u so’o hiang Aku éta lobo wiwird, maik naid tadang kid oné mai Aku,

⁷oké bod sanggéd taung suju disé agu Aku, ngai toing hitut toing disé pandé lata manusia.

⁸Adak de Mori Keraéng kebang le méu kudut cau kéta adak de manusia.”

⁹Mai kolé curup de Mori Yésus agu isé: “Cedek tu’ung méu te doét Adak de Mori Keraéng, kudut méu ngancéng kémbéng adak de rus.

¹⁰Ai hi Musa poli taén: Hiang ga emam agu endém! agu: céing ata mawang eman ko endén paka matay.

¹¹Maik mai taé de méu: Émé manga cengata ata curup agu eman ko agu endén: Apa kaut ata manga oné aku, ata ngancéng te tinu méu, poli taungs bolad laku te takung -- ngong takung agu Mori Keraéng --

¹²itu kali méu te sendo hia te pandé hitu-ho’o te tinu eman agu endén.

¹³Le wintuk hitu reweng de Mori Keraéng le méu toé pingay, hanang lut kaut adak hitut cau de méu. Agu do kolé wintuk bana nenggitu, ata pandé de méu.”

¹⁴Og kali Mori Yésus bénta kolé ata do agu curup oné isé: “Sanggés taung méu séngét Akum agu na’a koé oné nais:

¹⁵Apa kaut pé’ang mai ata ngo nggere-oné weki data, toé pandé rinek hia laingy, maik apa ata losa oné mai weki data hituy kali ata pandé rinek laing hia.” [

¹⁶Céing ata manga tilun te séngét, séngét ga!]

¹⁷Du poli ngo nggere-oné mbarun Hia te hedong oné mai ata don, ata nungku Diha réi agu Hia betuan rapang hitu.

¹⁸Mai walé Diha: “Toé kolé pecing le méu betuan? Toé pecing le méu te sanggéd cao-ca situt mai pé’ang maid nggere-oné weki data, toét pandé rinek laing hia,

¹⁹ai toé lako pala naiy maik oné tukay wan, poli hitu losa oné jambangy?” Le hitu kudut toing Liha te sanggéd hang toé manga irengd.

²⁰Mai kolé taé Diha: “Apa ata losa oné mai weki data, hitut pandé rinek hia laing,

²¹ai situt oné mai, mai oné mai nai data, losa sanggéd nuk da’at, loma ata, tako, ala ata,

²²ngoéng ata, kanang-kanang akun, gauk da’at, sehak, belek da’at, mét tau, mbécik, mésé nai, sembutar.

²³Sanggéd pandé da’at so’o, tua oné mai naid agu hitus ata pandé rinek atad.”

²⁴Og kali Mori Yésus téti nitu main agu ngo nggere-oné tana Tirus. Hia ngo oné ca mbaru, agu toé ngoéngn te pecing lata, maik cai Diha toé kong lépéngn.

²⁵Manga ca endé ata anak molasn hena le jing da’aty, gélang dengén cai Diha, og kali main agu suju wa wa’i Diha.

²⁶Inéwai hitu cengata ata Yunani oné mai Siro-Fénisia. Tegi liha oné Mori Yésus te mbér jing da’at hitu oné mai anakn.

²⁷Itu kali mai taé de Mori Yésus ngong Hia: “Kong olong becurs di anak koé, ai toé patun emi roti ata poli améng latang te anak koé agu peké nggere-oné acuy.”

²⁸Maik mai walé de inéwai hitu: “Tu’ung Mori, maik acu hitut wa ngaung méja kolé hang rewok roti situt pa’u de anak koé.”

²⁹Og kali mai taé de Mori Yésus ngong inéwai hitu: “Landing le curupm hitu, ngo muingh ga, ai jing da’at hitu poli losan oné mai weki de anakm.”

³⁰Inéwai hitu kolé nggere-oné mbarun, ita liha anakn hitu halas kin éta lobo wongka, agu jing da’at hitu polig losan.

³¹Poli hitu Mori Yésus legong kolé tana Tirus agu lako palé Sidon ngo nggere-oné sano Galiléa, oné bahi-réha tana Dékapolis.

³²Cai nituy, dadé lata oné Hia cengata ata nenteng agu dopel agu tegi oné Hia, kudut témba koé limé Diha bétan ata hitu.

³³Agu du poli kentong dion hia le Mori Yésus oné mai ata do, wiga hanang koéd isé, Hia puci limé rempan nggere-oné tilu data hitu, poli hitu loa ipo Diha agu cabi lema data hitu.

³⁴Rémé nggitun, cang agu conga nggere-éta awangn, Mori Yésus do’éng nai mésén agu curup oné hia: “Éfata!” ngong cengka ga!

³⁵Og kali léngan tilu data hitu agu du hitu muing kedok kolé cawi leman, wiga getas kéta curupn.

³⁶Mori Yésus pedé agu sanggéd ata manga nitu, kudut néka tombo agu ata céi-céing kaut. Maik koném ré’ing ného nia kaut isé Liha, danga-danga molé lisé tombon.

³⁷Isé lenget agu nganga ca béka mu’ud agu mai taéd: “Hia pandé di’a taung sanggén cao-ca, ata nenteng pandé nilors Liha, ata dopel pandé curups Liha.”