Read Manggarai MARKUS 9 Bible Online

MARKUS 9 - Manggarai bible

MARKUS 9

¹Mai kolé taé Diha ngong isé: “Aku taé agu méu, moro matan, oné bahi-réha ata so’ot mangad, manga ata toé matas, émé toé di ita lisé Adak de Mori Keraéng poli cain déméng kuasan.”

²Enem leso wa ga, Mori Yésus dadé hi Pétrus, hi Yakobus, agu hi Yohanés, cama-cama agu isé, Hia ngo nggere-éta poco langkas. Nitu isé hanang koéd. Itug kali Mori Yésus caling taran wa ranga disé,

³agu ceca paké Diha bakok mbot kéta. Toé kéta manga cengatan oné lino ho’o ata ngancéng dedang ceca paké nenggitu.

⁴Itug kali ita lisé hi Élia cama agu hi Musa, isét sua rémé tombod agu Mori Yésus.

⁵Mai taé di Pétrus agu Mori Yésus: “Yo Guru, delék kéta nai dami woko manga cé’é ho’okm. Co’om hesé telun lami sékang, can latang te Ité, ca latang te hi Musa, agu can latang te hi Élia.”

⁶Hia curup nenggitu ai toé noing liha apa ata paka curupn, ai isé rantang kétas.

⁷Og kali tuan rewung kémbéng isé agu oné mai rewung hitu dengé reweng: “Ho’o kéta dé Anak cembes Daku, séngét koé Hiam.”

⁸Agu du énam lisé rodo mora kaut ata baling mai isé, toé manga ita cengatan kolé, hanang Mori Yésus kanang.

⁹Rémé koléd éta mai poco hitu, Mori Yésus ré’ing isé, kudut néka tombo agu céing-céing kaut, apa hitut poli itan lisé, émé Anak Manusia toé di to’o koléy oné mai ata matan.

¹⁰Isé cau tu’ung ré’ing hitu bao, cang agu siwi-sok kid cama taud ngong apa néng “to’o kolé oné mai ata mata.”

¹¹Itu kali réi lisé agu Hia: “Co’o tara nggo’on curup disét pecing Taurat, olong mai hi Élia te kolo?”

¹²Mai walé de Mori Yésus: “Tu’ung olong mai hi Élia tekolo, kudut poléng sanggén taung. Hanang co’o ata poli tulis latang te Anak Manusia, te Hia paka ta’ong susa doy agu mbécik latay?

¹³Maik Aku curup agu méu: Tu’ung hi Élia polig cain, maik ata pandé sara-naid lorong ngoéng de rud, ného ata poli tulis latang te hia.”

¹⁴Du Mori Yésus, hi Pétrus, hi Yakobus agu hi Yohanés kéor kolés oné ata nungku iwod, itas lisé lawa do nemper kid baling ata nungku situ, agu pisa taus ata pecing Taurat rémé kéta léwang sina-cé’éd.

¹⁵Du ita kaut lata do situ Mori Yésus, lengets isé agu hidi-hadad ngo curu hias.

¹⁶Itu kali Mori Yésus réi agu isé: “Apa kéta léwang tau de méu agu isé?”

¹⁷Mai taé dihat cengata oné mai ata do situ: “Tuang Guru, anak daku ho’o dadé cé’é Ite laku, ai hia hena le jing ata pandé dopeln.

¹⁸Agu émé cangep hia le jing da’at hitu, wewaky liha wa tana; wiga wusa mu’un, kérek ngisn, agu wedét wekin. Aku poli tegi oné ata nungku Dité, kudut mbér lisé jing da’at hitu, landing toé ngancéng lisé.”

¹⁹Mai taé de Mori Yésus ngong isé: “Oe méut uwa ho’ot toé imbi, nang du nian di Aku ka’éng cama laing agu méu? Ného nia kéta kolé di kodeln Laku pandé da’at de méu? Dadé cé’é anak koé hitu!”

²⁰Og kali dadén lisé oné Hia. Du jing da’at hitu ita Mori Yésus, pandé kéu-kaul kéta anak koé hitu, wiga nggele-nggoténgn anak koé hitu wa tana, agu wusa taung mu’un.

²¹Mai réi de Mori Yésus agu eman anak koé hitu: “Capa kéta béhéng tekan anak koé ho’o?” Mai walén: “Pu’ung du laing koén olo ga.

²²Agu dondé kéta jing da’at hitu sorok hia nggere-oné api ko nggere-oné waé kudut pandé woréng hia. Landing hitu émé ngancéngy Lité, campé koé agu ba’éng koé ami.”

²³Mai walé de Mori Yésus: “Taé de hau, émé ngancéng Lité? Toé manga ata toé ngancéng latang te ata imbi!”

²⁴Gélang-gélang ema data koé hitu ciékn: “Imbig laku, ba’éng koé aku ho’ot toé imbi!”

²⁵Du ita le Mori Yésus tambang molés cewurd ata do, renti Liha jing da’at hitu, agu reweng mésén, mai taén: “Oé hau jing da’at ata pandé dopel agu nenteng, Aku mbér hau, pé’ang ga oné mai anak koé ho’o agu néka mai koléh!”

²⁶Itu kali pé’angn jing da’at hitu cang agu ciékn agu panci-péncarn liha anak koé hitu. Anak koé hitu mana rapu taran, wiga do kéta ata curup: “Hia poli matan.”

²⁷Maik Mori Yésus cau limé de anak koé hitu agu kéngkon, og kali to’o le run.

²⁸Du Mori Yésus cai oné mbaru, agu ata nungkun hanang koéd agu Hia, mai réi disé: “Co’ok ami tara toé ngancéng mbér jing da’at hitu?”

²⁹Mai walé Diha agu isé: “Jing da’at ho’ot nenggo’o taran, toé ngancéng mbér moléy, hanang le ngajiy kali.”

³⁰Mori Yésus agu ata nungkun angkak nitu maid agu lako lagé tana Galiléas, agu Mori Yésus toé gorin te pecing lata;

³¹ai Hia lari toing ata nungkun. Mai taé Diha ngong isé: “Anak Manusia kudut condo oné limé datay, agu isé kudut ala Hias, agu telu leso wa poli alan lata, Hia mosé koléy.”

³²Isé toé pecing betuan curup hitu, agu sesenga’i kolés te réi agu Hia.

³³Poli hitu cai Mori Yésus agu ata nungkun oné Kapérnaum. Du cai oné mbarun Mori Yésus, Hia réi ata nungkun: “Apa curup de méu bao oné salang?”

³⁴Maik hema kid isé, ai oné salang bao, léwang taud céing ata mésén oné mai isé.

³⁵Og kali lonton Mori Yésus agu béntas ata nungkun situt campulu sua. Mai taé Diha ngong isé: “Émé cengata ngoéng ciri tu’a laing, hia paka ciri ata koéy agu mendi data doy.”

³⁶Itu kali Mori Yésus witir cengata anak koé agu peher oné réha iséy, poli hitu kapu anak koé hitu agu mai taén ngong isé:

³⁷“Céing kaut ata tiba anak koé nenggo’o landing ngasang Daku, hia tiba Akuy. Agu céing kaut ata tiba Aku, toé Aku hitut tiba liha, maik Hia hitut wuat Aku.”

³⁸Mai taé di Yohanés agu Mori Yésus: “Tuang Guru, ita lami cengata ata toé haé lako Dité mbér jingy le ngasang Dité, maikm ami ré’ing ata hitu, ai hia bom haé lako ditéy.”

³⁹Maik mai taé de Mori Yésus: “Néka ré’ing hia le méu! Ai toé manga ata, ata poli pandé tanda lenget le ngasang Daku, agu du hitu kolé pocu Akuy.

⁴⁰Céing kaut ata toé léwang itéy, hia hitu oné mai itén.

⁴¹Aku taé agu méu: Moro matan kéta, céing kaut ata téi méu ca gelasn waé landing méu ata lorong Akum, hia toé manga mora lahén.”

⁴²Céing-céing ata pandé wéléng cengatan oné mai anak koé so’ot imbi, céwé di’an latang te hia émé can watu mésé pongo oné bokakn, poli hitu hia oké oné taciky.

⁴³Agu émé limém pandé ndékok hauy, ndapuy, ai céwé di’an hau ngo nggere-oné mosé tédéng lén déméng tompokm, itu po déméng limé suam oké nggere-wa neraka, nggere-oné api ata toé kéta pesay; [

⁴⁴oné osang hitu, uli toé ngancéng matas, agu api toé manga pesan.]

⁴⁵Agu émé wa’im pandé ndékok hauy, ndapuy, ai céwé di’am hau ngo oné mosé tédéng lén déméng senggotm, po déméng wa’i suam maik oké nggere-wa neraka; [

⁴⁶oné osang hitu ulin toé ngancéng matas, agu api toé manga pesan.]

⁴⁷Agu émé matam pandé ndékok hauy, nggé’iy, ai céwé di’am hau ngo nggere-oné Adak de Mori Keraéng déméng mata cam, po déméng mata suam maik oké nggere-wa neraka,

⁴⁸nitu uli ngai huwisd toé matas agu api toé pesay.

⁴⁹Ai nété-néténg ata te ci’é le apis.

⁵⁰Ci’é hitu di’an, maik émé ci’é hitu ciri beléy, lepai kéta koléy pandé cerakn? Poro méu manga mtaung ci’é hitu oné wekis agu mosé hambor cama taus.”