Read Manggarai LUKAS 1 Bible Online

LUKAS 1 - Manggarai bible

LUKAS 1

¹Keraéng Téofilus, Dod’g ata situt te tur ca keréba latang te sanggéd taung apa situt poli mangad oné mai beréha ité,

²ného siot tombo agu ité lisé, isét du wangka pu’ungn ita le matad agu ata bad keréba.

³Landing hitu, du poli pijir laku pu’ung du wangkad, itu kali na’a oné Suraks laku,

⁴kudut pecing tu’ung kétas lité, te sanggéd situ toing oné ité laing patéd kéta.

⁵Du uwa di Hérodés, raja tana Yudéa, manga cengata imam, ngasangn hi Zakaria oné mai ca liup agu hi Abia. Winan ga wa’u di Harun hi Élisabét ngasangn.

⁶Isét sua molord oné ranga de Mori Keraéng, agu moséd lorong taung perénta agu wérét de Mori Keraéng agu toé manga celad.

⁷Maik isé toé manga anakd, ai hi Élisabét toé wingy agu isét sua so’o tua lopos ga.

⁸Manga cangkalin, du caig oru maki de uku disén, hi Zakaria pandé lorong ného imamy oné ranga de Morin.

⁹Ai du téka nampo, nenggitu laséngn te petok imam hitut pandén, toi hia te ngo oné Mbaru Nggeluk, agu tapa dupa nitu.

¹⁰Du rémé tapan dupa, sanggéd ata do impungn be pé’angs agu ngaji kid.

¹¹Rodo itan cangata malékat de Mori Keraéng li Zakria hesé oné racap wanang de compang baté tapa dupa.

¹²Ita punggawa hitu hia gégay agu rantangy.

¹³Maik mai taé de Malékat hitu agu hia: “Néka rantang hau Zakaria, ai ngajim polig tiban, agu hi Élisabét, winam, te loas cengata ata rona, agu paka téi ngasang hia le hau hi Yohanés.

¹⁴Hau te nisang naim agu te nakah ngot ata do kolé nisang taung naid landing loasn hitu.

¹⁵Ai hia te moséy oné ranga de Morin agu hia toé kéta inung anggor ko tuak rani agu hia penong le Nai Nggeluky, pu’ung oné mai tuka de endén;

¹⁶hia te pandé do data Israél holés kolé nggere oné Morin, Mori Keraéng disé,

¹⁷agu hia te lako bolo mai Mori Keraéng oné Nai agu kuasa di Élia kudut pandé holés nai de sanggéd ema latang te anakd, agu nai disét da’at nggere-oné nai disét molor. Agu le hitu ambi te Morin ro’éng ata kopn latang te Hia.”

¹⁸Itu kali mai taé di Zakaria ngong malékat hitu: “Co’o kétay laku pecingn, te apa ho’o te jariy? Ai aku tu’ak ga, agu wina daku tiong lén mosén.”

¹⁹Walé de malékat hitu agu hia: “Aku ho’o hi Gabriél, hitut tiba taé de Mori Keraéng, agu ata wuat te curup agu hau, agu kudut caing keréba di’a ho’o oné hau.

²⁰Moro matan, hau te dopelh agu toé ngancéng curupn dengkir leso du nia taung jarid apa so’o ai toé imbi curup dakuh, hitut manga tu’ung tai itan du cai leson.

²¹Rémé nggitun, dod ata sereng kid géréng hi Zakariasd. Lenget laing lisé, te nggitu bail naisn oné Mbaru Nggeluk. Itu kali hia tombo hawa-haol agu isén, ai hia, hitu kin dopéln.

²²Du ngo nggere-pé'ang, hia toé ngancéng curupy agu isé, wiga baég lisé te hia poli ita ca tanda oné Mbaru Nggeluk. Itu kali téeing tanda molé liha nggere-oné isé, ai dopel kin hia.

²³Du polig leso maki dihan, hia kolé mbarun.

²⁴Remon wa poli hitu, hi Élisabét, winan, na’ang wekin, agu tédéng lima wulangn hia toé ngo bepé’angy, taén:

²⁵“Ho’o kéta ca pandé de Mori Keraéng latang te aku, agu te ho’on, Hia henan té capu ritak daku oné mai ranga data.”

²⁶Oné wulang te enemn, Mori Keraéng jera malékat Gabriél ngo oné ca béndar oné Galiléa, ngasangn Nasarét,

²⁷oné cengata anak molas hitut naca agu cengata ata ngasangn hi Yusuf oné mai kilo di Daud; ngasang de anak molas hitu hi Maria.

²⁸Du malékat hitu ngo oné mbaru di Marian, mai taén: “Tabé, ité ata widang berkak le Morin, Mori Keraéng manga agu itéy.”

²⁹Ného wetér hi Maria dengé curup hitu, mai taén oné nain, apa kétay péng betuan tabé hitu.

³⁰Mai taé di malékat hitu ngong hia: “Néka rantang, Maria, ai ité te tiba widang berkak oné ranga de Mori Keraéng.

³¹Moro matan, ité te na’ang wekid agu te loas cengata anak ata rona, agu porong téing ngasangy lité Hia hi Yésus.

³²Hia te ciri ata méséy, agu te caro Anak de Mori Keraéng Ata Langkas Kéta. Agu Mori Keraéng te widang Hia seriga di Daud, empo Run;

³³agu Hia ata ciri raja sanggéd waé di Yakob dengkir tain, agu peréntan toé manga tara cemoln.”

³⁴Curup di Maria ngong malékat hitu: “Co’o kéta néng ngancéng jari apa hitu, ai aku toé di neki agu ronag?”

³⁵Wantil de malékat hitu agu hia: “Nai Nggeluk wa’u oné itéy, agu kuasa de Mori Keraéng ata langkas kéta te sémbéng itéy; ali hitu, anak hitut kudut loas lité Anak nggeluk de Mori Keraéng.

³⁶Agu moro matan, hi Élisabét, asé-ka’ém hio, hia kolé te ho’on, na’ang wekin cengata anak ata rona du turung tu’an, agu ho’og wulang te enem, hia hitut le taé ata toé wingy.

³⁷Ai latang te Mori Keraéng sanggén cao-ca ngancéng kéta taung.”

³⁸Mai taé di Maria: “Tu’ung-tu’ung kéta aku ho’o mendi de Mori Keraéngk; jari oné aku lorong taém hitu.” Itug kali ngon malékat hitu.

³⁹Pisa wulang poli hitu, ngon hi Maria, nggaruk lako nggere-éta goloy, tua ca béndar oné Yéhuda.

⁴⁰Cai nitu hia, ngo oné mbaru di Zakarias, agu tabé hi Élisabét.

⁴¹Agu du hi Élisabét dengé tabé di Mariay, jékal anakn oné tukan, agu hi Elisabét kolé penong le Nai Nggeluky,

⁴²mai taén agu télés kéta rewengn: “Berkak kéta ite oné mai sanggéd inéwai, agu berkak kéta wua tukam.

⁴³Céing kétak aku ho’o, wiga endé de Morig mai la’at akuy?

⁴⁴Ai moro matan, tu’ung, du tabém hitu dengé le tilu dakuy, anak ho’ot oné tukag jékal nakan.

⁴⁵Mosé di’a ité, ai ité imbi apa ata curup de Mori Keraéng, te cai oloy.”

⁴⁶Mai taé di Maria: “Weki agu wakar’g bong Mori Keraéngy,

⁴⁷agu nakay ai Mori Keraéng, Ata selamak aku,

⁴⁸ai Hia poli ita merik de mendin. Moron kéta, pu’ung ho’o main, sanggéd bija nggere-wan, te curup ngong aku mosé di’ay,

⁴⁹ai Hiat Pu’un Kuasa, poli pandé wintuk mésé kéta oné aku, agu nggeluk kéta ngasangn.

⁵⁰Agu nabitn wa-wa na’ay lobo ata hitut rantang Hiay,

⁵¹Hia toto kuasan ali pandé le limén, agu pandé mbihi-mbehar ata situt mésé kéta naid.

⁵²Hia na’a nggere wa ata situt manga kuasad éta mai serigad, agu téti nggere étas ata situt pele-wa

⁵³Hia pandé hépak taungs situt di’ad oné ata situt daréms, agu jera ata situt bora ngo agu limé kanangd.

⁵⁴Hia campé Israél mendi Run, ai Hia nuk nabit Run

⁵⁵ného hitut baté rekén oné empo dité, oné hi Abraham, agu wua-wélan dengkir tain.”

⁵⁶Agu hi Maria, am manga telu wulang ka’éng cama agu hi Élisabét, itu po kolé béon.

⁵⁷Poli hitu, rapakg wulangn hi Élisabét te loasy, agu hia lada cengata anak ata rona.

⁵⁸Du dengé le haé béon, agu taung haé ukun, te Mori Keraéng poli toi nabitn hitut nggitu bail mésén oné hia, naka kétas isé cama laing agu hia.

⁵⁹Itu kali maid isé, du leso te alon, te sunat anak koé hitu, agu kudut téing ngasang lisé hia: hi Zakariasy, lorong ngasang de eman,

⁶⁰maik taé dé endén; “Néka, hia paka ngasang hi Yohanés.”

⁶¹Mai taé disé ngong hia: “Toé manga oné mai kilo de méu ata ngasang nenggitun.”

⁶²Itu kali nggewit molé kaut eman lisé te réi, céing liha téing ngasangn anakn hitu.

⁶³Tegi liha watu tulis, poli hitu tulis liha: “Ngasangn hi Yohanés.” Sanggéd isé jenger kéta taungs.

⁶⁴Agu du hitu kolé wuka mu’un, ngancéng tomboy te naring Mori Keraéng.

⁶⁵Rodo rantang taungs ata situt ka’éng baling isé, agu sanggéd apa situ dumuk lobo-mu’us oné temu tana lengko Yudéa.

⁶⁶Agu sanggéd ata situt dengén, na’a oné nais, agu mai taéd: “Ciri apa kéta péng anak koé ho’o tai?” Ai berkak de Mori Keraéng loréng hiay.

⁶⁷Agu hi Zakarias, eman penong le Nai Nggeluky, itu kali lén pedén:

⁶⁸“Naring kétay Morin, Mori Keraéng de Israél, ai Hia la’at ro’éngn agu ba géal latangt isé,

⁶⁹Hia pandé todo ca rangga selamak te ité, oné mai waé di Daud, mendin,

⁷⁰— ného hitut poli curupn pu’ung médé main, le mu’u de sanggén taung nabi situt nggeluk,

⁷¹te caca ité oné mai sanggéd bali dité, agu oné mai limé de sanggéd taung isét kodo ité,

⁷²kudut toto nabitn oné empo dité, agu nuk rekén hitut nggeluk,

⁷³ngong wada hitut poli taé oné hi Abraham, ema de empo dité, te Hia widang itéy

⁷⁴kudut ité lego oné mai lime data balid, ngancéng suju Hia toé déméng rantang

⁷⁵oné helek agu molor wa ranga Diha tédéng moséd

⁷⁶Agu hau, oé anak daku, te caro nabi de Mori hitut Langkas Kéta, ai hau té lako bolo mai Morih, té wé’ang salang latang té Hia,

⁷⁷té téing agu ro’éng Diha haéng pa’él latang selamak hitu, landing le ampongs ndékok disé,

⁷⁸le widang agu mohas oné mai Mori Keraéng dité, ali nia Hia te laat ité, mataleso gula éta mai osang langkas,

⁷⁹latang te gérak isét ka’éng oné nendep, agu ata gonggém moséd, kudut tito wa’i dité nggere oné salang hambor-meler.”

⁸⁰Anak koé hitu, éta-éta tu’an agu danga-danga weger nain. Agu hia ka’éng oné satar mambaky dengkir leso hia paka toto wekin oné Israél.