Read Manggarai LUKAS 12 Bible Online

LUKAS 12 - Manggarai bible

LUKAS 12

¹Rémé nggitun, logur-koukd ata do nemperd, wiga isé dedek cama taud. Itug kali Mori Yésus pu’ung toingn, laring cain kéta latang te ata nungkun, mai taé Diha: “Sésénga’i koé agu ragi, ngong pisik disét Parisi.

²Toé kéta manga can situt tadus ata toé léngas, agu toé kéta manga can kolé situt cehas ata toé pecings.

³Landing hitu, apa situt curup le méu oné nendeps, te dengé oné géraks, agu apa situt saok molés du tilu oné lo’ang, te tombo éta mai bubung mbarud.

⁴Aku taé agu méu; oé sanggén taung haé-reba Daku, néka rantang laing isét ngancéng mbelé weki, agu poli hitu toé ngancéng pandé apa-apa koléd.

⁵Aku te toi oné méu, céing hitut paka rantangy le méu. Rantang koé Hia, hitut du poli mbelé, manga kuasan te wéwéng ata nggere-wa neraka. Moro matan, Aku taé agu méu: Rantang koé Hiam!

⁶Toé weli liman cik pika sua sebusy? Koném po nggitu, toé kéta can ata hémong le Mori Keraéng,

⁷ngot wuk situt éta ulum bilang kéta taungs. Landing hitu, néka rantang ai méu céwé mésén itu po cik do situ.

⁸Aku taé ngong méu: Néténg ata situt tura Aku oné ranga de manusia, Anak Manusia kolé te tura hia oné ranga de sanggéd taung malékat de Mori Keraéng.

⁹Maik céing ata pali Aku oné ranga de manusia, Aku kolé te pali hia oné ranga de sanggéd taung malékat de Mori Keraéng.

¹⁰Néténg ata situt taé kaut ca mu’un ata lawang Anak Manusia, hia te ampongy; maik céing ata mbéis Nai Nggeluky, hia toé kéta ampongy.

¹¹Émé manga ata buang méu oné Adak Agama, ko sanggéd adak ata perénta laing agu oné isét cau kuasa, néka simpung laing le méu co’o kétam, agu apa kétag le méu curupn te riwok wekis.

¹²Ai du hitu kéta muing Nai Nggeluk te toing méu, apa situt paka curup le méu.”

¹³Cengata oné mai ata do situ, taé ngong Mori Yésus: “Tuang Guru, taé koé oné asé-ka’é daku, kudut hia patis mbaté agu aku.”

¹⁴Maik taé de Mori Yésus ngong hia: “Késa, céing ata poli téti Aku ciri adak laing ko ata tongka de méu?”

¹⁵Mai taén kole ngong isé: “Jengkek-jengkek koé agu sésénga’i koé agu sanggéd ngomper, ai koném po ca ata bora héla-haén, mosén toé landing kaut le boran situ.”

¹⁶Poli hitu, Hia tombo agu isé ca rapang, mai taén: “Manga cengata ata bora, tanan héla-haéd danin.

¹⁷Hia réi oné nai koén: Co’o kétag laku pandéd, ai aku toé manga osang te ngancéng na’ad laku cir tanag.

¹⁸Maig taén: Nenggo’o laku pandéd: aku te koas taungs ca’og, agu aku te hesé ata céwé mésén, agu aku te na’a bonén sanggéd gandum agu ceca dog.

¹⁹Poli hitu aku té taé agu wakarg: wakar daku, manga dod ceca oné hau, tungkur tenék tédéng pisa ntaungd tai; madosh ga, hang kéta kalih ga, inung kétah kaliga, agu cébo épos kétah kali ga!

²⁰Maik taé de Mori Keraéng ngong hia; oé haut bapa, le wié ho’o muing wakar de hau te emiy oné mai haun, agu apa situt poli nangketd le hau, te céis néngm tai?

²¹Nenggitu dé jarin ata hitut ongko bora latang te weki run, émé toé boran hia oné ranga de Mori Keraéng.”

²²Mori Yésus taé agu sanggéd ata nungkun: “Landing hitu, Aku taé agu méu: Néka simpung laing mosés, te apa kétag kudut hangs, agu néka kolé simpung latang te wekis, te apa kétag kudut pakés.

²³Ai mosé hitup céwé mésén itu po hang, agu wekis hitup ata céwé mésén itu po wéngko wekis.

²⁴Lélo kaut Ka, situt toé manga wécak winid, agu toé manga akod, agu toé manga ca’od ko langkokd, aling po nenggitus, léléng téing hang kid le Mori Keraéng. Leng bail tadangs méu dancus agu kaka lélap situ!

²⁵Céing weli oné mai méun, hitut landing kaut simpungn, ngancéng tambang ca cikun léwén mosén?

²⁶Jari, émé méu toé ngancéng pandé ceca ata merik-kejikn, co’o tara simpungn weli le méu, apa situt bana?

²⁷Lélo damang wéla wangkung, hitut toé tiling agu toé dedangy; maik Aku taé agu méu: Hi raja Salomo agu taung di’a dirapn situ kolé, toé kin di manga paké ata cama di’a ného can oné mai wéla situ.

²⁸Jari, émé remang oné uma, hitut mangas leso ho’o, agu diang peké oné apis, nenggitus sélék di’ad le Mori Keraéng, apan kolé méu, oé ata so’ot toé danga imbi!

²⁹Jari, méu néka curup laing apa kéta hangs, ko apa kéta té inungs méu, agu néka kéta soang nais.

³⁰Sanggéd situ, kawé taung le wa’u oné lino ho’ot toé pecing Mori Keraéng. Maik Emam pecing, té méu sékék kéta muingd te sangged situ.

³¹Maik kawé di Perénta Diha, wiga sanggéd situt ce dod te tambang kolés oné méus.

³²Néka rantang dé méu, oé méut ce impung koé! Ai Emam henan kéta téing méu Perénta hitu.

³³Pika taungs le méu sanggéd cao-cas agu téing recos! Pandé ga le méu kandi hitut toé ciri mangay; ngong ca ceca éta Surga hitut toé ngancéng cipotn, toé ngancéng ruis lata takon, agu toé ngancéng hang le pakotn.

³⁴Ai nia mangad boram nitu kolé mangan naim.”

³⁵“Porong awakm laing gelung kin, agu culum dila kin.

³⁶Agu méu porong ného ata siot séréng kid géréng morid hitut kolé ramé kawing, kudut émé cai hia agu nontong para, gélang céngka para te hia.

³⁷Koméd tu’ung mendi situt repéng le morid, lari wela kid du cai diha. Aku taé agu méu: Moro matan kéta, hia te pongo awakn, agu jera isé te lonto hangs, agu hia mai te gatang isé.

³⁸Agu émé hia cai wié méséy, ko tiong tanay, agu repéng isé nenggitus, komé dé moséd.

³⁹Maik idép di’a ho’o: Émé ata ngara mbaru pecing ongga pisa main ata tako, hia toé kéta ondang koas mbarun.

⁴⁰Porong méu kolé, jengkekm taungm, ai Anak Manusia mai du leso ata toé nuk cala le méu.”

⁴¹Mai taé di Pétrus: “Mori, ngong ami kaut betuan Lité rapang hitu, ko ngong sanggéd ata do kolé?”

⁴²Mai walé de Mori Yésus: Jari, céing weli ata wintuk mbaru, hiot junggu agu nggalasn, hitut kudut téti le Morin, ciri tu’ad sanggéd mendin, te téi hang du hitug redun?

⁴³Mosé di’a mendi hitut repéng le morin, pandés gori situ, du cain morin.

⁴⁴Aku taé agu méu: Moro matan, morin hitu té téti hia té nipu taung boran.

⁴⁵Maik émé da’atn mendi hitu, agu mai taén oné nain: Mori daku toé tara maiy, itug kali hia wangka onggad mendi situt ata rona agu inéwai, hangy, inungy agu langu nia-nian;

⁴⁶morin mendi hitu dé, té mai du leso ata toé nuk cala liha, agu du leso hitut toé pecing liha, te mbelé hia agu pandé hia cama ného wada disét toé junggu.

⁴⁷Mendi hitut poli pecing kolé ngoéng de Morin, maik toé kenanu ko toé pandés situt baté ngoéng de morin, hia te bali-boatn le ongga.

⁴⁸Maik céing ata toé pecing ngoéng de morin, agu pandé ata manga laingn ongga, hia te mecék nggitu kauty. Néténg ata, situt do téing oné hia, te do soléng oné hia, agu céing hitut do te imbi laing, oné hia céwé do kolé soléng.”

⁴⁹Mai Daku kudut wéwér api oné lino, agu bengkes tu’ung Laku, api hitu polig dilan!

⁵⁰Aku paka tiba cebongk, agu capan susan nai Daku, du toéd olon apa hitu!

⁵¹Nuk de méu, te mai Daku oné lino ba hambor? Toé, taé Laku ngong méu, toé hambor, maik nggacur-nggamuk tau.

⁵²Ai wangka ho’o ga, te mangan léwang tau oné mai isét lima oné ca mbaru, telu tau dungkang ata sua, agu sua tau dungkang telu ata.

⁵³Isé te léwang taud, ema dungkang anak ata ronan, agu anak ata rona koléng eman; endé dungkang anak inéwain, agu anak inéwai koléng endén; inang dungkang wotén, agu woté koléng inangn.”

⁵⁴Mori Yésus curup kolé agu ata do: “Du itan le méu rewung salé kolep, gélang kéta taés: te cai usang, agu manga tu’ung usang hitu.

⁵⁵Agu du itan le méu solokn buru lau mai, mai taés: Leso te kolang tik, agu manga tu’ung buru hitu.

⁵⁶Oé méut pisik, alang tara de lino agu awang le méu pecings nanggad, co’o tara toé ngancéng pecing nanggad le méu uwa leso ho’o ga?

⁵⁷Agu co’o tara toé ngancéng beté kaut le rus, apa ata molorn?

⁵⁸Ai émé hau agu hiat cecupu ngo oné ranga de adak, damang dé wuli te anor, kudu hambor agu hia, rémé ngai oné salang di, boto sorok hau liha, ba oné adak, agu adak hitu téing hau oné wakéln, agu wakéln hitu wéwéng hau oné bui.

⁵⁹Aku taé agu méu: Hau toé ngancéng pé’ang nitu maim, du toéd bajar taungs raungm.”