Read Manggarai LUKAS 15 Bible Online

LUKAS 15 - Manggarai bible

LUKAS 15

¹Sanggéd isét tegi béa agu sanggéd ata ndékok, laséngd ngo oné Mori Yésus te séngét toing Diha.

²Itug kali nggerengga’utd ata Parisi agu ata pecing Taurat, mai taéd: “Hia tiba ata ndékoky, agu hang cama agu iséy.”

³Mai Hia tombo rapang ho’o agu isé:

⁴“Céing oné mai méu ata paéng ceratus jimbaln, émé mora kaut can, toé weli kongd situt ciokmpuluciokd oné oka, ngo kawé di hitut mora dengkir ita néngn?

⁵Agu émé polig itan liha, naka kéta liha agu na’a lobo békék.

⁶Agu du cai oné mbarun, hia bénta taungs haé reban agu haé béon, mai taén ngong isé: Kais koé nais cama laing agu aku, ai jimbal daku ho’ot mora, ita kolé gi.

⁷Aku taé agu méu: Nenggitu kolé néng naka éta Surga, landing tesern cengata ata ndékok, céwé naka oné mai landing ata siot ciokmpuluciok ata molor, ata toé sékékd te tesers.”

⁸“Ko iné-wai nia dé’it hitut manga cepulud dirham, émé mora can néngn, toé tutung culun agu roi mbarun hilit kéta kawén néngn dengkir itan liha?

⁹Agu du itan liha, hia bénta taung haé molasn agu haé béon, agu mai taén: Nisang koé nais cama laing agu akum, ai dirham hiot morag, polig ita kolén.

¹⁰Aku taé agu méu: Nenggitu kolé nakad sanggéd malékat de Mori Keraéng, landing tesérn cengata ata ndékok.”

¹¹Curup kolé le Mori Yésus: “Manga cengata, suad anakn ata rona.

¹²Mai taé dihat cucu ngong eman: Ema, téingsg ranga dakud bora dité, situt maki dakud. Itug kali emad patis bora don situ oné isé.

¹³Pisa leso wa ga, anak koé cucu hitu pika taungs ranga dihad, poli hitu ngo tana pé’angy. Nitu hia mbolohaés boran situ, agu mosé wan ca, étan ca.

¹⁴Du taungs néngn ga, tuag darém mésé oné tana hitu, hia ga wangkag heperhamatn.

¹⁵Itug kali ngon agu hang nggajing oné ca ata oné tana hitu. Ata hitu jera hia ngo oné uman te lami elan.

¹⁶Hia nanang te hang repang pakang de ela situ, maik céing ata téingn agu hia.

¹⁷Itug noingn liha mosé koén, mai taén: Do kéta ata hang nggajing oné ema daku, hitut héla haéd hangn, maik aku cé’é ho’o mata le daremk.

¹⁸Aku te to’o agu ngo oné emag, agu taé agu hia: Ema, aku poli pandé ndékok latang te Surga agu latang te ité,

¹⁹aku toé patun kolé te caro anak diték; ciri koé aku cengata ata hang nggajing diték.

²⁰Itug kali to’on agu ngo oné eman. Du hia ngai déun, poli itan le eman; itug kali kendut nain ali wéong bail. Eman hitu mburuk ngo cumang hia, poli hitu nggépo agu omo néngn hia.

²¹Mai taé de anak koé hitu ngong hia: Ema, aku poli pandé ndékok latang te Surga agu latang te ité; aku toé patun kolé te caro anak diték.

²²Maik eman hitu taé taung agu mendin: Gélang ba cé’é ho’o juba ata di’an kéta, cuki oné hiay, agu puci oné limén kila, agu sepatu wa wa’in.

²³Agu emi anak japi hiot mbuheln, mbeléy agu ité hang ramé-ramét.

²⁴Ai anak daku ho’o néhot poli matan, maik mosé koléy, hiat poli moran, ita koléy. Itug kali raméd ga.

²⁵Maik anak hitut ngason lau umay, agu du wé’én, cai ruis mbaru, dengé liha tebang sunding, déré, agu pemaka.

²⁶Mai hia bénta cengata mendi, réi liha: apa betuan ho’o bao gé?

²⁷Mai walé de mendi hitu: Kolég asém, agu emam ga, mbelé anak japi ata mbuheln, ai ita kolé néngn, ngai géal kin mosén.

²⁸Rabog anak hitut ngaso, agu toé gorin te ngo boné. Itu kali ngo pé’ang eman, agu curup di’a-di’a agu hia.

²⁹Maik hia walé agu eman, taén: Ntaungn lau-liwan sina, aku tiba taé dité ema, agu toé dé’it manga lagé perénta ditég, maik aku toé dé’it manga téing lité tamat. can mbé anak, te ramé-ramé agu haé rebag.

³⁰Maik hitud cain anakm hitut poli mbolohaés bora dité ema agu inéwai mbérong, mbelé kéta anak japi ata mbuheln te hia.

³¹Mai taé de eman ngong hia: Anak daku, bo hau cama laing mtaung agu akuh, agu sanggéd bora daku de haus morid.

³²Naun kéta muing ité pandé ramé agu nakat, ai asém hitu néhot poli matan, maik mosé koléy, hia poli moran, maik ita koléy.”