Read Manggarai LUKAS 16 Bible Online

LUKAS 16 - Manggarai bible

LUKAS 16

¹Agu Mori Yésus curup agu ata nungkun: “Cengata ata bora, ata wintuk le cengatas boran. Ata bora hitu tiba mangkong, te ata ciko ni’ang diha dondé pandé mbolohaés boran.

²Itug kali siron liha hiat ciko ni’ang hitu, agu mai taén ngong hia: Manga kéta dengég aku latang te hau ta? Wajo dé papongd situt nipu de haud, ai emo de’it hau gah te wintuk bora daku.

³Mai taé oné nain hiat wintuk bora: Co’o kétag péng laku pandén. Morig te keni aku oné mai gori cau boran. Bom ngancéng wedak tanak aku; sanggar-sanggar bog limég te tegi, ritak kolék aku.

⁴Pecing laku ga, co’o pandé daku, kudut émé kenik aku oné mai gori ciko boran manga kin atan te tiba aku oné mbarud.

⁵Itu kali bénta gici cad ata situt manga raung oné morin. Mai réin agu hia hitut laring cain: Asa dehau, pisad raungm agu mori daku?

⁶Mai walé data hitu: ceratus gumbang mina zaitun. Maig taén ngong ata hitu: Ho’o surak raungm, lontoh agu tulis surak raung dion, ho’o muing: Limampulu deromd.

⁷Poli hitu, mai taén ngong ata te suan: Asa de hau, pisad raungm? Mai walé data hitu: ceratus békad gandum. Mai taén ngong ata hitu: Ho’o surak raungm, pandé surak raung weru kaut: Alompulu békad.

⁸Itug kali keraéng hitu naring hiat cau boran hitut toé hepesn, ai hia poli pandé anor salang lakon. Ai anak de lino ho’o céwé do anorn agu haé atan, itu po anak de gérak.

⁹Aku taé agu méu: pandé woé-nelu di’a-di’a agu bora de lino hitut toé hepes, kudut émé bora de lino hitu, toé ngancéng campé kolé méun, méu ngancéng tibas oné ndéi tédéng lén.”

¹⁰“Céing ata tipek oné taé koé, tipek kolé oné taé mésé. Agu céing ata toé molorn oné taé koé, toé kolé molorn oné taé mésé.

¹¹Jari, émé méu toé tipeks latang te bora de lino hitut toé hepesn, céingy weli ata imbi laing méun bora de wakar ata tu’ung-tu’ung?

¹²Agu émé méu toé tipeks agu bora data bana, céingy ata téing bora de weki rum agu hau?

¹³Ca mendi toé ngancéng io agu sua mori. Ai émé nenggitu, hia te kodo hitut cengata, agu momang hitut ca, ko hia te tipekn agu hitut cengata, agu toé bilang laing hiat cengata. Méu toé ngancéng io Mori Keraéng agu io oné bora de lino.”

¹⁴Sanggéd situ dengé taung lata Parisi, mendi-mendi de séng, agu isé tawa laing Hias.

¹⁵Maig taé Diha ngong isé: “Méu di’a kaut le rus wa ranga data, maik Mori Keraéng pecing nai dé méu. Ai apa situt sobit laing le manusia, kodoy le Mori Keraéng.

¹⁶Adak Taurat agu buku de sanggéd nabi, pepés dengkir uwa di Yohanés; agu pu’ung du hitu main, Adak de Mori Keraéng kerébay agu néténg ata, duduk-duduk tau rumbu ngo bonén.

¹⁷Céwé émong mora awang agu lino, itu po koar can titik adak Taurat.

¹⁸Néténg ata situt saung leba winan, poli hitu kawing agu iné-wai banay, hia loma atay, agu céing ata kawing agu inéwai oké le ronan, hia loma atay.”

¹⁹“Manga cengata ata bora, hitut paké mtaung juba langoy agu towé hemél, agu bilang leson hia raos ramé, hanang ata minakn.

²⁰Agu manga kolé cengata, ata sanggar-sanggar bon limén tegin, ngasangn hi Lazarus; wekin hena le bokéy, halas kin wa ruis para diha hitut boray;

²¹agu nanang te pandé mora darémn le tora situt pa’u éta mai méja data bora hitu. Ngot mai molé acu la’it bokén situ.

²²Ného cepisan, matay ata lénggé hitu, mai malékat dadé hia lobo pa’a di Abraham.

²³Ata hitut bora kolé matay, itu kali boakn. Agu hia rémé séangn oné lino data mata, hia conga nggere-étay, déu main ita liha hi Abraham, agu hi Lazarus lonto lobo pa’an.

²⁴Itug kali kepokn hia, agu mai taén: Ema Abraham, ba’éng koé aku. Jera koé hi Lazarus, kudut hia bembo lobo limé toson oné waé, kudut pandé lep koé lema daku, ai aku beti bailk oné dila api ho’o.

²⁵Maik mai taé di Abraham: Anak, nuk kaut, bo hau poli itan taung di’a du mosém, maik hi Lazarus hanang ata da’atn. Ho’og hia delék lémbuy, agu hau séang da’ath.

²⁶Apan kolé, cé’é mai ho’on haéng sina hau wisin ca ngampang, ata toé kong lakon, kudut isét mai cé’é mai ho’o nggere-sina méu, ko isét mai nitu maid cé’é ami, toé kong lakod.

²⁷Mai taé data hitu: Émé nenggitu aku tegi agu ité, ema, kudut ité jera hia ngo oné mbaru de ema daku;

²⁸ai manga lima kid asé-ka’é daku, kudut hia langi kéta tu’ung isé, kudut isé néka mai oné osang ho’os tai.

²⁹Maik taé di Abraham: Manga oné isé sakasi di Musa agu de nabi do. Céwé di’an isé séngét sakasi hitus.

³⁰Mai walé data hitu: Toé, ema Abraham, ai émé manga cengatan ata, hitut mai oné mai ata matan, ngo oné isé, isé te tesérs.

³¹Mai taé di Abraham ngong hia: Émé toé pinga lisé toing di Musa, agu de nabi do, isé kolé ogos te imbi, koném po le cengata hitut to’o oné mai ata matan.”