Read Manggarai LUKAS 17 Bible Online

LUKAS 17 - Manggarai bible

LUKAS 17

¹Mori Yésus curup agu ata nungku Diha: “Toét-toé mangay wéléng, maik calang kéta ata hitut pandé mangan.

²Céwé di’an te hia, émé can watu geré latung, pongo du bokakn, poli hitu wéok lau taciky, itu po hia pandé wéléng cengatan oné mai isé so’ot bengge-lénggéng.

³Lami weki rum! Émé manga ndékok asé-ka’ém, rondongy hia, émé tesery hia, ampongy hia.

⁴Ngot émé hia pandé ndékok agu hauy pitu ngkalin leso ca, agu pitu ngkalin kolé mai cé’é haun, agu mai taén: naék aku ga, hau paka ampong akuh.”

⁵Maig taé data nungku situ ngong Mori Yésus: “Tambang koéy imbi dami!”

⁶Mai walé de Mori Yésus: “Émé méu manga imbis cama wini sawé kauty, méu ngancéng taé ngong pu’u ara ho’o: Wakak hau, agu pacek lau tacikh, hia te lorong agu hauy.”

⁷“Céingy oné mai méu ata manga cengata mendin, ata ngo bajaky ko lami wéang pé’ang oka te hau taé agu mendi hitu, du kolé duatn: Gélang koé mai hang!

⁸Toé weli dion kéta, ngot hia taé agu mendi hitu: wédis hang daku ga. Tenggé towém, agu keturu te aku di, haéng poli hang agu inung’g. Agu poli hitu, po hang hau agu inungh.

⁹Manga weli taé delék liha agu mendi hitu, amé mendi hitu poli pandéd apa situt poli jera agu hiad?

¹⁰Nenggitu kolé néng méu. Émé méu poli pandé sanggéd kéta taung situt poli jera agu méud, porong méu taé: Ami mendi ata toé manga betua laingn; ami hanang pandé kaut apa situt paka pandés lami.”

¹¹Du lako nggere-oné Yérusalémn, Mori Yésus lako loléng rahit tana Samaria agu Galiléay.

¹²Lété Hia ngo oné ca béon, mai cepulu taus ata boké cumang Hia. Isé hesé daing tadangd,

¹³agu mai kepokd: “Yésus, Tuang Guru, ba’éng koé ami!”

¹⁴Itu kali Hia lélo isén, agu mai taén: “Ngom ga, toto wekis oné imam.” Agu rémé ngai oné salangd, dumuk ciri di’a kaut wekid.

¹⁵Cengata oné mai isé, du ita liha te hia poli inan, holés koléy, cang agu bong Mori Keraéngn agu reweng mésén.

¹⁶Poli hitu, cunem wa wa’i de Mori Yésus, étan curup wali di’a agu Hia. Ata hitu, ata Samariay.

¹⁷Maig taé de Mori Yésus: “Cala ata cepulu taup bao méut poli helis wekis, ta? Nias isét ciok ga?

¹⁸Toé manga ata holés koléd oné mai isé, te bong Mori Keraéng be pé’ang mai hiat uku bana ho’o?”

¹⁹Mai taén ngong ata hitu: “Heséh ga, agu ngoh ga, le imbim hitut poli selamak hau.”

²⁰Landing le réi disét Parisi, du nia cain Adak de Mori Keraéng, mai walé de Mori Yésus, taén: “Cain Adak de Mori Keraéng, toé manga tanda ita le matan:

²¹toé kolé ngancéng taé lata: Lélo, hia manga cé’é ho’oy ko manga nituy! Ai cetu’un, Adak de Mori Keraéng manga baling méuy.”

²²Agu Hia curup agu ata nungkun: “Te cai leson méu nanang lélo can oné mai sanggéd leso de Anak Manusia hitu, agu méu toé ngancéng itan.

²³Agu ata te taé ngong méu: Lélo, hia manga nioy; lélo, hia manga cé’é ho’oy! Méu néka ngo nitum, néka lorong le méu.

²⁴Ai cama ného hilat, wili-welok agu néran oné mai comong awang ca ngo oné comong awang ca; nenggitu kolé tai Anak Manusia du leso cain Hia.

²⁵Maik Hia olong kéta cukung susa doy, agu doét lata uwa ho’oy.

²⁶Agu cama ného jari du uwa di Nuh, nenggitu kolé néng tai du sanggéd leso de Anak Manusia:

²⁷isé hang agu inungs, isé laki agu wais, haéng du leso di Nuh ngo oné kepaln: poli hitu cain mbang, pandé mempo taung isé.

²⁸Nenggitu kolé jari hitut du uwa di Lot: isé hang agu inungs, isé weli agu pikas, isé weri wini agu hesé mbarus.

²⁹Maik du leso hi Lot ngo pé’ang oné mai béo Sodomn, cain usang api agu usang mburé éta mai awang, pandé mempo taung isé.

³⁰Nenggitu kolé néng tai, du leso niay Anak Manusia toto weki run.

³¹Céing du leso hitu oné palang angis buru lobo mbaru, agu sanggéd cao-can manga oné mbarus, hia néka wa’u te emid; agu nenggitu kolé ata hitut ngai oné uman, néka koléy.

³²Nuk kaut wina di Lot!

³³Céing ata nanang mo’éng mosén, hia te moray mosén; agu céing ata moray mosén, hia te pandé mo’éng mosén.

³⁴Aku taé agu méu: Le wié hitu manga sua taus lobo wongka, hiat cengata dadéy, hiat cengata kongn kaut.

³⁵Manga sua taus iné-wai cama-cama geré latung, hia cengata te dadéy, hiat cengata te kongn kaut.” [

³⁶Émé manga sua tau oné uma, hiat cengata dadéy, hiat cengata kongn kaut].

³⁷Mai taé disé ngong Mori Yésus: “Niay, Mori?” Mai taé Diha ngong isé: “Nias mangad rapu, nitus rentumd ka.”