Read Manggarai LUKAS 19 Bible Online

LUKAS 19 - Manggarai bible

LUKAS 19

¹Mori Yésus ngo oné béndar Yériko, agu lako ruda lagé béndar hitun.

²Nitu manga cengata, ngasangn hi Zakhéus, tu’a disét tegi béa, agu hia ata boray.

³Hia nanang te lélo ného nia kétay Mori Yésus hitu, maik toé ngain, ai ata do, agu radakn hia.

⁴Itug kali hia mburuk bolo mai ata don, poli hitu tuké éta lobo haju aray, te lélo Mori Yésus, hitut kudut liba nituy.

⁵Du cai nitun Mori Yésus, Hia lélo nggere-étay agu mai taén: “Zakhéus, gélang wa’um, ai leso ho’o Aku paka ka’éng oné mbaru de hauk.”

⁶Itu kali hidi-hadan wa’un hi Zakhéus, tiba Mori Yésus, naka kétay.

⁷Maik sanggéd ata situt itan apa hitu nggeré-ngga’uts, mai taéd: “Hia ka’éng oné mbaru data ndékoky.”

⁸Maik hi Zakhéus heséy agu mai taén ngong Mori Yésus: “Mori, oné mai bahi-réhad wéang sewokg te téing isét lénggés, agu émé manga hang kamer datag, te téing kolés laku alép laing pats.”

⁹Mai taé de Mori Yésus ngong hia: “Leso ho’o, poli cain selamak oné mbaru ho’o, ai ata ho’o kolé anak di Abrahamy.

¹⁰Ai main Anak Manusia te kawé agu te selamak ata situt moras.”

¹¹Latang te isét séngét Hia nitu, Mori Yésus ruda olon curupN ba le rapangy, ai Hia ruis gi agu Yérusalém, agu nuk disé te Adak de Mori Keraéng kudut karok itan.

¹²Maig taé Diha: “Manga cengata keraéng, angkak ngo tana pé’angy, kudut téti ciri raja nituy agu du poli hitu itu po koléy.

¹³Hia bénta cepulu taus mendin, agu téing néténg isé gici cad séng mina, mai taén: Séng so’o paka pandé bekas le méu haéng mai kolég aku.

¹⁴Maik ata cama tanad, kodo hias, itu tara wuat ata lisé, kudut tombo: Ami toé gorigm ata ho’o te ciri raja damiy.

¹⁵Og manga du kolén, lété hia poli téti ciri rajan, hia jera bénta taungs mendin, situt poli téing séngd liha, kudut baé capas bekad séng situ néténg isé.

¹⁶Maiy ata hitut laring cain, taén: Ité, séng mina dité hitut ca-y poli cir cepulu minay laku.

¹⁷Mai taén ngong ata hitu: Di’a tu’ung pandém hitu, olé mendi ata di’a; hau tipek oné taé koé, ali hitu, tiba ga kuasa cau cepulu béndar.

¹⁸Mai hiat te suan, nenggo’o taén: Keraéng, séng mina dité poli cir lima minad laku.

¹⁹Mai taén ngong ata hitu: Agu hau cau liman béndar.

²⁰Agu mendi situt iwod mai, agu mai taén: Keraéng, ho’oy séng mina dité, aku poli rokot kin le caré-caréy.

²¹Ai aku rantang iték, ai ité manusia gutek; ité emi apa ata toé dé’it na’a lité, agu ako apa ata toé dé’it weri lité.

²²Mai taén ngong ata hitu: Oé mendi acu da’at, aku te beté bicar hauk lorong curup de rum. Kali poli pecingp le hau, aku ata gutek, hitut emi apa ata toé na’a dé’it laku, agu ako apa hitut toé dé’it weri laku.

²³Émé nggitu ga, co’o séng daku hitu tara toé téing oné ata situt pecing pandé beka séng? Wiga du kolég aku, aku ngancéng emi agu bekad.

²⁴Mai taén agu ata situt hesé nitu: Emiy séng mina hitut ca-y oné mai hia, agu téing hiat manga cepulu minan.

²⁵Mai taé disé ngong hia: Keraéng, hia poli manga cepulu minan.

²⁶Mai walé diha: Aku taé agu méu: néténg ata situt ngai mangad, te téing oné hia, maik hiat toé mangan, oné mai hia te emis, nenggitu kolé apa situt ngai mangad oné hia.

²⁷Maik sanggéd ata bali daku so’o, so’ot toé ngoéngd te aku ciri rajad, dadé cé’é ho’os isé situ, agu mbelés wa ranga daku.”

²⁸Agu du poli taung tombod sanggéd situ, Mori Yésus pado oloy oné mai isé, agu ruda lakoN nggere-oné Yérusalém.

²⁹Du Hia ruis Bétfagé agu Bétania hitut oné abar Golo Zaitun, Mori Yésus wuat sua taus ata nungku'N,

³⁰agu mai pedéN: “Ngo oné béo hiot dungka méu: Du cai nitus méu, méu te ita ca kelédai laing uwan, ngai liwingn, ata toéd nggopuy. Cacay kelédai hitu agu aru ba cé’é ho’oy.

³¹Agu émé manga ata tenga méun: co’o tara cacan le méu? Walé kaut nenggo’o: sékékn le Mori.”

³²Itus kali ngod isé situt poli jerad agu ita tu’ung ného baté taé de Mori Yésus.

³³Du cacan lisé keledai hitu, mai taé dihat morin: “Co’o tara cacan le méu kelédai hitu?”

³⁴Mai walé disé: “Sékékn le Mori.”

³⁵Isé aru kelédai hitu, ba oné Mori Yésus, poli hitu lapak laing nggebar disé, agu campé Mori Yésus du létin.

³⁶Agu du ngai létin Mori Yésus lobo keledai hitu isé wisi towéd wa salang.

³⁷Du Hia ruis Yérusalémy, oné baté redun Golo Zaitun, pu’ungs sanggéd ata nungku situt lako ndorik agu Hia, jikir kétas naring Mori Keraéng agu ciéks, landing sanggéd tanda lenget situt poli itad lisé.

³⁸Mai taé disé: “Naring kéta Hia hitut mai mana Rajay, le ngasang de Mori Keraéng, hambor libur éta Surga, agu bong éta osang ata langkas kéta.”

³⁹Pisa taus ata Parisi, situt lorong agu ata do situ, tombo oné Mori Yésus: “Tuang Guru, ré’ing koés ata nungku Dité situ.”

⁴⁰Mai walé Diha: “Aku taé agu méu: Émé hema isé so’o, watu so’o te raos.”

⁴¹Agu du Mori Yésus ruis gi, agu itag béndar Yérusalém, Hia rétangY landing béndar hitu,

⁴²mai taé Diha: “Oléh, di’an kéta, émé leso ho’o muing le hau pecingn, apa kéta sékék laingn, te hambor libur de hau! Maik te ho’on, hambor-libur hitu pangguy latang te mata de hau.

⁴³Ai te cai leson, ata balim te wéngké léok hau le bénténg, poli hitu léok hau agu léwo hau oné mai néténg ciko,

⁴⁴agu isé te pandé mempo hau agu sangged ro’éngm, agu oné mai siding watum, toé ondang lisé can watu hitut tondol lobo watu haén, ai hau toé baé wié leson, du nia Mori Keraéng mai selamak haun.”

⁴⁵Itug kali ngon Mori Yésus nggere-oné Mbaru de Mori Keraéng, agu wangka mbérd ata situt dagang nitus,

⁴⁶mai taé Diha ngong isé: “Manga tulis: Mbaru Daku, mbaru ngaji. Mai méu pandé cewo de empo déhong laingy.”

⁴⁷Néténg leso Hia toing oné Mbaru de Mori Keraéngy. Imam Kepala agu ata pecing Taurat agu isét tu’ad uku Israél, hili-hoés te pandé calang Hias,

⁴⁸maik toé pecing lisé co’o molé nawan, ai sanggéd ro’éng pa'u naid agu Hias, agu ngoéng kétas séngét toing Dihas.