Read Manggarai LUKAS 23 Bible Online

LUKAS 23 - Manggarai bible

LUKAS 23

¹Itug kali to’od taung isét toto bicar, agu todang Mori Yésus nggere-oné hi Pilatus.

²Nitu isé pu’ung buang Hiad, taéd: “Poli regéng le rug ami ata ho’o pandé wéléng ata damiy, agu ré’ing bajar taki oné kaisér; agu taén latang te weki run: Hia léng hi Kristus Rajay.”

³Mai hi Pilatus réi Hia: “Asa weli ga, raja disét Yahudi Hau ko?” Mai walé de Mori Yésus: “Weki rum ata taén.”

⁴Mai taé di Pilatus ngong sanggén taung imam kepala, agu sanggéd lawa do: “Aku toé manga dumpu sala koé cekoén oné ata ho’o.”

⁵Maik isé danga-danga kétas soré Hiad, mai taéd: “Hia cocong ro’éng ali toingn oné temu tana Yudéa; wangka oné mai Galiléa, haéng ho’o cé’é.”

⁶Du dengé hitu li Pilatus, mai réi diha, ot ata Galiléa Hia ho’o.

⁷Agu du pecingn liha ga, te Mori Yésus ata oné mai tana adak di Hérodésn, hi Pilatus jera todang Hia nggere-oné ranga di Hérodés, ai du hitu manga kolé oné Yérusalémy.

⁸Du lété hi Hérodés ita Mori Yésus, naka kéta hia. Ai béhéng liha nanang te ita Hiay; ali dongkalin hia dengé tombo latang te Hia, céwén kolé bengkes koén te lélo co’o Mori Yésus pandé tanda lengetn.

⁹Hia do kéta réin kamping Mori Yésus, maik Mori Yésus tadan te walé koé cemu’un.

¹⁰Rémé nggitun, olod imam kepala agu ata pecing Taurat, agu uar kétas buangd, situt pandé mendo latang te Hia.

¹¹Wangkag hi Hérodés agu serdadun nini-noak, agu loér lokét Hiad; hi Hérodés cuki juba mésé oné Hia, poli hitu, jera todang kolé nggere-oné hi Pilatusy.

¹²Agu du leso hitu muing, di’a koléd hi Hérodés agu hi Pilatus; olo maid isé, maca taud.

¹³Og hi Pilatus jera neki taungs imam kepala, tu’a golo agu ro’éng do,

¹⁴agu curup oné ranga disé: “Méu poli todang cé’é ranga dakun Ata ho’o, ného cengata ata pandé wéléng ro’éngy. Ita le rus méu, aku poli réi wangkér-walék Hiag, agu oné sala situt mboték de méu latang te Hia, toé can ata itan laku oné Hia.

¹⁵Agu hi Hérodés kolé toé, ai hia jera todang kolé nggere-cé’é amiy. Moro matan, lagit can koé pandén ata ngancéng wahéng mata muingy.

¹⁶Jari aku te wahéng Hiak, poli hitu legoy.” [

¹⁷Ai hia paka lego cengatan ata latang te isé du leso ramé hitu].

¹⁸Maik isé cengkali kaut raosd: “Pandé mata Hia, lego hi Barabas latang te ami!”

¹⁹Hi Barabas ho’o tara na’a oné buin, landing pandé raha oné béndar, agu ala atay.

²⁰Curup kolé téké cengkalin li Pilatus, mai reweng ta’an agu isé, ai hia ngoéng te lego Mori Yésusy.

²¹Mai isé ciék taungs koléng hia, taéd: “Pépék Hia oné panggol! Pépék Hia oné panggol!”

²²Mai taé di Pilatus te telungkalin agu isé: “Apay pandé da’at data ho’o ata tu’ung? Lagit can koé sala ata ita lakun oné Hia, hitut ngancéng wahéng mata muingn.” Jari aku te wahéng Hia, poli hitu legoy.

²³Maik agu ciékd isé, soré agu soléng kétas, kudut Hia paka panggoly; agu cemoln ga, iség lalongn ali ciékd.

²⁴Itug kali beté di Pilatus, kudut lorong kaut soléng disé.

²⁵Agu hia lego hi Barabas hitut na’a oné bui landing pandé raha agu ala atay, lorong soléng disé, maik Mori Yésus, téing oné iséy, kudut pandé nia kaut ngoéngd.

²⁶Du todangn lisé Mori Yésus, isé caka cengata ngasangn hi Simon oné mai Kiréné, ata mai pé’ang mai béndarn, poli hitu na’a panggol hitu lobo lédarn, kudut pola liha, cang agu lorong Mori Yésus.

²⁷Do kéta ata lut Hia; manga oné mai lawa do situ iné-wai, ata rétang agu jéjéng Hias.

²⁸Mori Yésus holés nggere-oné iséy, mai taén: “Olé enu oné mai Yérusalém, néka rétang landing Aku, maik rétang koé landing weki rus agu sanggéd anaks!

²⁹Ai lélo damang, te cai leson manga taé data: komén iné-wai hitut toé wing agu hitut toé dé’it manga loas anakn, agu hitut cucun toé dé’it manga cucu laingd.

³⁰Itu kali ata te wangka curup agu sanggéd poco: Lurh ga, roné ami! Agu latang te sanggéd taung golo: roné koé amim!

³¹Ai émé haju mosé, pandé nenggitu lata, te jari apag latang te haju dango?”

³²Agu manga kolé todang sua taus ata bana ata da’at, kudut wahéng te matas, cama laing agu Hia.

³³Du caid oné osang hitut ngasangn Toko Longkor, isé pépék Mori Yésus nitu du panggol, agu ata da’at situ sua, cengata oné racap wanangN, agu hiat cengata oné racap léoN.

³⁴Mai taé de Mori Yésus: “Yo Ema, ampong koés isé, ai toé pecing lisé apa ho’ot pandéd.” Agu isé téka nampo molé te pati ceca paké Diha.

³⁵Ata do hesé nitu, agu ita kéta sanggén taung. Isét tu’a laing seget Hia, mai taéd: “Bo ata bana, lobo watus Liha, ondang lité ho’o Hia te lobo watu koé weki run, émé hi Kristus tu’ung Hia, hitut lir de Mori Keraéng.”

³⁶Sanggéd serdadu kolé, loér Hias: isé sotor anggor héo oné mu’u Diha,

³⁷mai taéd: “Émé Hau raja data Yahudih, mo’éng koé weki rum!”

³⁸Manga kolé tulis éta mai ulun: “Ho’o raja data Yahudi.”

³⁹Cengata oné mai ata da’at situt wéo, mbécik Hiay, taén: “Toé weli hi Kristus Hau ko? Mo’éng koé mosém agu mo’éng koé mosé dami.”

⁴⁰Maik hiat cengata ré’ing hia, taén: “Oé, toé rantang hau ko, agu toé kolé rantang Mori Keraéngh, laring hau tiba wahéng ata camas?

⁴¹Bo koé tité, kopd muing te wahéngt, ai ité tiba wahéng lorong agu pandéd; maik ata ho’o, toé manga pandé can koé sala.”

⁴²Maig taé Diha: “Yésus nuk koé aku, du Ité mai ného Rajad.”

⁴³Mai taé de Mori Yésus ngong hia: “Aku taé agu hau, moro matan, leso ho’o kéta muing hau te manga cama laing agu Akuh oné Firdaus.”

⁴⁴Du hitu étag leso, anggat ongga campulusua, rodo nendép tuil kaut temu tana hitu haéng ongga telu,

⁴⁵ai mataleso toé géraky. Agu rinding Mbaru de Mori Keraéng jija laing suay.

⁴⁶Itu kali kepok agu reweng mésén Mori Yésus: “Yo Ema, lobo limé Diték Aku téingn naig.” Du poli curup hituN, Hia beté naiN.

⁴⁷Lété kepala de serdadu ita apa situt jari, hia bong Mori Keraéngy, taén: “Tu’ung kéta ata ho’o, ata molory!”

⁴⁸Agu du sanggéd ata do situt mai rentum nitus, te porong apa situt poli jarid, itus kali koléd cang agu entap berambang de weki rud.

⁴⁹Sanggéd ata situt pecing di’a de Mori Yésus, onéd kolé iné-wai situt lorong Hia oné mai Galiléa, hesé tadang kétas, agu ita taung sangged situ.

⁵⁰Manga cengata, hitut ngasangn hi Yosép; hia kolé cengata oné mai adak mésé de agama, agu cengata ata di’a, laing molorn kolé.

⁵¹Hia toé tiba laing beté agu pandé de Adak Agama situ. Hia oné mai Arimatéan, ca béndar oné Yahudi; hia kolé sereng kin géréng Adak de Mori Keraéngy.

⁵²Hia ngo oné hi Pilatusy, kudut tegi rapu de Mori Yésus.

⁵³Agu du poli na’a wan liha rapu hitu, wuwus liha le lipa hemél, poli hitu loling oné boa, hitut tekang molé oné nampar, ata toé dé’it manga loling rapun nitu.

⁵⁴Leso hitu, leso nangket, agu leso Sabat ruis pu’ung gi.

⁵⁵Agu sanggéd iné-wai siot mai cama agu Mori Yésus oné mai Galiléa, lut kolés, agu isé lélo boa hitu, agu co’oy lolingn rapu Diha.

⁵⁶[56a] Agu du koléd ga, isé ambi rewos agu mina bengé. [56b] Du leso Sabat, isé asi maéld, lorong adak Taurat.