Read Manggarai YOHANÉS 13 Bible Online

YOHANÉS 13 - Manggarai bible

YOHANÉS 13

¹Rémé nggitun du toéd pu’ung ramé Paska, poli pecing le Mori Yésus, caig leson kudut ngo oné mai lino ho’on nggere-éta hi Ema. Hia momang taungs ata paéngN oné lino ho’o, agu Hia momang isé dengkir agu cemol.

²Du rémé recap disé hang camad, jing da’at poli saok nanéng oné nai di Yudas Iskariot anak di Simon kudut pika Hia.

³Pecing le Mori Yésus te Eman poli téing sanggé-ménan agu Hia te mai oné mai Mori Keraéng agu kolé oné Mori Keraéng.

⁴Itug kali to’on Mori Yésus agu loak jubaN. Hia emi ca nggebar pongo awakN,

⁵poli hitu légé waé oné bintang, agu pu’ung waca wa’i data nungkuN agu koso le nggebar hiot pongo oné awakN.

⁶Caig Hia oné hi Simon Pétrus. Mai taé di Pétrus ngong Hia: “Mori, Ité kudut waca wa’i daku?”

⁷Mai walé de Mori Yésus ngong hia: “Apa ho’ot pandé Laku, toé di pecing le hau te ho’on, tai di po pecing le hau.”

⁸Mai taé di Pétrus ngong Hia: “Ité néka kéta waca wa’i dakut dengkir tain!” Mai walé de Mori Yésus: “Émé toé wacas Laku wa’im, hau toé tiba cimpa oné mai Akuh.”

⁹Mai taé di Simon Pétrus ngong Hia: “Mori, néka hanang wa’ig kaut, maik limég agu ulug kolé!”

¹⁰Mai taé de Mori Yésus agu hia: “Céing ata poli cebong, hia asig waca kolé wekin, waca kaut wa’in kali ga, ai hia poli nggélok taungn. Méu kolé poli nggéloks, maik toé sanggés taung.”

¹¹Ai pecing Liha, céing hitut téing Hia. Itu tara mai taén: “Toé sanggés taung méu nggélokm.”

¹²Du Hia poli waca wa’i disén, Hia sélék kolé juban, agu kolé baté lonton, maig taéN ngong isé: “Pecing weli le méu betuan apa hitut poli pandé Laku agu méu?

¹³Méu caro Aku Guru agu Mori, bo hitu lé’én, ai Guru agu Mori muingk Aku.

¹⁴Jari, émé Aku waca wa’is, Aku ho’o Mori agu Gurus, émé nggitu méu kolé néng paka waca wa’i taus;

¹⁵ai Aku poli téing ca toming latang te méu, kudut méu kolé pandé cama ného hitut poli pandé Laku agu méu.

¹⁶Aku taé agu méu: Moro matan, mendi toé ngancéng béta mai morin, ko cengata ata wuat laing toé ngancéng béta mai hiat ata wuatn.

¹⁷Émé pa’él taung so’o le méu, di’a de mosés méu émé pandés le méu.

¹⁸Toé ngong sanggés taung méu curup Daku. Baé Laku, céing situt poli lir Laku. Maik paka cai oloy tulis ho’o: Ata hitut hang roti Daku, poli téti tundéln agu Aku.

¹⁹Aku curup agu méu ho’o muing, be bolon mangad sanggéd situ, kudut émé tuay apa hitu, imbig dé le méu, te Akuy dé Hia.

²⁰Aku taé agu méu: Tada laingn, céing ata tiba ata hitut wuat Laku, hia tiba Akuy. Agu céing ata tiba Aku, hia tiba Hiat wuat Akuy.”

²¹Du poli curup nenggitun Mori Yésus, bélot kéta naiN, itu kali wan sakasin: “Aku taé agu méu, moron, cengata oné mai méu te téing Akuy.”

²²Ata nungkuN situ lélo taud, isé sesenga’is, céing hitut kindat Diha.

²³Cengata oné mai ata nungku de Mori Yésus, ata hitut momang Diha, bérit ruis Hiay du racap wanangn.

²⁴Repang oné ata nungku hitu hi Simon Pétrus, mai taén: “Réy dé, ngong céing Diha hitu!”

²⁵Ata nungkuN hitut lonto ruis Mori Yésus holés agu mai taén ngong Hia: “Mori, céing hitu?”

²⁶Mai walé de Mori Yésus: “Hia hitu, hiat ata téing roti ata poli bembon Laku.” Du poli curup nenggitun, Hia emi Roti, bemboy agu téing hi Yudas, anak di Simon Iskariot.

²⁷Du poli tiban roti hitu li Yudas, hia hena le jing da’aty. Mai taé de Mori Yésus ngong hia: “Apa ata nanang laing te pandém, pandé gélang ga.”

²⁸Maik toé kéta manga cengatan oné isé situt lonto hang cama ata pecingn, co’o betuan curup hitu de Mori Yésus ngong hi Yudas.

²⁹Ngéséng hi Yudas ata cau kas wiga manga ata nggo’o betd, te Mori Yésus jera hi Yudas weli apa ata sékékn latang te taé hitu, ko téi apa-apa agu ata lénggé.

³⁰Du poli tiban li Yudas roti hitu, itu kali gélang-gélang ngon. Du hitu wiég tana.

³¹Du poli ngon hi Yudas, maig taé de Mori Yésus: “Ho’o ga Anak Manusia te bongy, agu Mori Keraéng te bong oné Hiay.

³²Émé Mori Keraéng bong oné Hiay, Mori Keraéng te bong Hia kolé oné wekiN, agu te bong muing Hia.

³³Ngong sanggés méu anak Daku, téké cekoén kali ga, Aku manga cama agu méuk. Méu te kawé Akum agu ného hiot poli taé Laku agu ata Yahudi: Oné osang ngo Daku, toé kéta ngancéng méu ngos, nenggitu kolé néng taé muing Laku te ho’on agu méu.

³⁴Aku téing perénta weru agu méu, ngong kudut méu paka momang taus, cama ného Aku poli momang méuk, nenggitu kolé méu paka momang cama taus.

³⁵Ali hitu, pecing taung lata, te méu ata nungku Dakum, ngong émé méu momang cama taus.”

³⁶Mai taé di Simon Pétrus agu Mori Yésus: “Mori, te nggere-nia Ité ngod?” Mai walé de Mori Yésus: “Oné osang baté ngo Daku, hau toé ngancéng lut Aku te ho’on, maik tai hau ngancéng lut Akuh.”

³⁷Mai taé di Pétrus ngong Hia: “Mori, co’o tara toé ngancéng lut Itég aku rémé nggo’on? Maram aku oké moség latang te Ité!”

³⁸Mai walé de Mori Yésus: “Ngancéng hau oké mosém latang te Aku? Ce tu’ungn Aku taé agu hau: Du toé di kakor lalong, hau poli pali Akum telu ngkalin.”