Read Manggarai YOHANÉS 16 Bible Online

YOHANÉS 16 - Manggarai bible

YOHANÉS 16

¹“Sanggéd taung so’o tombos laku agu méu, kudut méu néka doét Akum.

²Méu te kenim, ngot cai leson, te néténg ata situt paki méu, nuk koé disé ga pandé ata di’an latang te Mori Keraéng.

³Isé pandé nenggitu, ai toé pecing lisé, ngot hi Ema, ngot Aku.

⁴[4a] Maik sanggéd so’o curups laku agu méu, kudut émé caig leson, nukg le méu te polis curupd Laku agu méu.” [4b] “Sanggéd so’o, toé curup Laku agu méu du pu’ungn, ai lawang ho’o, Aku ngai cama-cama kig agu méu;

⁵maik te ho’on, Aku ngo éta Hia hitut poli wuatg Aku, agu toé manga cengatan oné mai méu ata réi agu Aku: Nggere-niat Ité ngod?

⁶Maik le taé Laku sanggéd situ agu méu, itu tara wéong nais.

⁷Maik tu’ung kéta ho’ot taé Daku agu méu: Céwé di’an latang te méu émé ngok Aku. Ai émé toé ngok Aku, Hiat campé toé mai cé’é méuy; maik émé ngok Aku, Aku te wuat Hia mai nggere-cé’é méuy.

⁸Émé mai Hia, Hia te pandé lino ho’o kudut pecing ndékok, molor agu beté-bicar,

⁹ngong ndékok: Landing isé toé kin di imbi Akus;

¹⁰ngong molor: Ai Aku ngo éta Emag, agu méu toé ita Aku kolém;

¹¹ngong beté-bicar: ai hiat kuasan lino ho’o polig wahéngn.

¹²Ngai do kid apa situt paka tombos Laku agu méu; maik te ho’on, toéd ngancéng polad le méu.

¹³Maik émé caig Hia, ngong Nai Molor, Hia te ampil méu nggere-oné sanggéd molor; ai Hia toé te curup oné mai mu’u Run, maik sanggéd situt dengé Dihat hitus ata curupd Liha agu tombos Liha oné méu co’os cirid sanggéd apa situ du leso tai.

¹⁴Hia te bong Akuy, ai Hia te keréba oné méu, apa situt tiba Liha oné mai Akud.

¹⁵Sanggéd-ménan situ Diha Emas morid, situ kolé léléng Dakus morid; landing hitu curup muing Laku: Hia te keréba oné méu, sanggéd situt tiba Liha oné mai Akud.”

¹⁶“Téké cekoén kali ga, méu toé ita Aku kolém, agu téké cekoén kolé méu te ita Akum.”

¹⁷Dengé curup situ, pisa taus oné mai ata nungkuN taé cama taud: “Apa betuan taé Diha agu ité: Téké cekoén kali ga, méu toé ita Akum, agu téké cekoén kolé ga, méu te ita Akum? Agu: Aku ngo éta hi Emak?”

¹⁸Maig taé disé: “Apay betuan curup Diha tenggo’o: Téké cekoén kali ga? Toé pecing lité apa betuan.”

¹⁹Pecing le Mori Yésus, isé kudut manga réid agu Hia, maig taéN ngong isé: “Manga gejék cama taus, reweng hiot taé Daku bao: Téké cekoén kali ga, méu toé ita Akum, agu téké cekoén kali ga, méu te ita Akum?

²⁰Aku curup agu méu: Moron matan, méu te rétang agu jéjéng, maik lino ho’o te nakay; méu te wéongm, maik wéongs hitu te caling ciri kais nai.

²¹Cengata inéwai lengn mésé betin du redu loas anakn, maik du poli loas anakn, hia toég nuk kolés betin, ai naka cengata manusia poli loas oné linon.

²²Nenggitu kolé méu te ho’on, hanang ata wéongs, maik Aku te ita méu kolé agu nisang nais, agu toé kéta manga cengatan ata ngancéng rumbun nisang naim hitu oné mai méu.

²³Agu du leso hitu, toé manga réi apa-apas agu Aku. Aku taé agu méu: Moron, sanggéd taung situt tegi de méu agu hi Ema, te téings Liha agu méu le ngasang Daku.

²⁴Dengkir te ho’on, méu toéd manga tegi can kolé le ngasang Daku. Tegi ga manga kali tiban le méu, kudut penong kais nais.

²⁵Sanggéd taung so’o curups Laku agu méu le rapang molés. Te cai leson, Aku toé kolé curup agu méu le rapang molé, maik tulak kéta keréba hi Ema agu méu.

²⁶Du leso hitu, méu te ngaji le ngasang Daku. Aku dé toé taé agu méu te Aku tegi latang te méu oné hi Ema,

²⁷ai weki Run hi Ema momang méu, ai méu momang tu’ung Aku agu imbi te Aku mai oné mai Mori Keraéng’g.

²⁸Aku mai oné mai hi Ema, agu Aku mai nggere-oné lino; Aku lego kolé lino agu ngo oné hi Ema.”

²⁹Mai taé data nungkuN: “Lélo, ho’od Ité tombo dungka kétay, toég rapang koléy.

³⁰Ho’og pecingn lami, te Ité pecing sanggéd-ménan, agu te co’on ata réi oné Ité. Ali hitu tara imbin lami, te Ité mai éta mai Mori Keraéngd.”

³¹Mai walé de Mori Yésus agu isé: “Imbig le méu ho’o ga?

³²Lélo, kudut cai leson, ngot polig cain, te méu mbihi-mbehar ngo néténg osang de rus, agu méu te pencang Aku hanang koég. Maik toé hanang koég Aku, ai hi Ema loréng Akuy.

³³Sanggéd situ taé Laku agu méu, kudut méu delék hambor agu meler oné Aku. Oné lino ho’o méu cukung kélo-balém, maik mberes koé nais, Aku poli pandé kodan lino ho’o.”