Read Manggarai YOHANÉS 4 Bible Online

YOHANÉS 4 - Manggarai bible

YOHANÉS 4

¹Du baég le Mori Yésus, te sanggéd ata Parisi poli dengén, landing Hia haéng agu cebong ata nungku céwé do oné mai hi Yohanés

²-- koném po weki Run Mori Yésus toé cebong ata laingy, maik co’os ata nungku'N --

³Hia néng ga legong tana Yudéa agu holés koléy nggere-oné tana Galiléa.

⁴Hia paka liba kétay tana Samaria.

⁵Itug kali cain Hia oné ca béndar oné Samaria, ata ngasangn Shikar ruis tana ata téing li Yakob danong oné anakn, hi Yusuf.

⁶Nitu manga perigi di Yakob. Mori Yésus poso kétay le lako, landing hitu Hia lonto lupi perigi hituy. Du hitu anggat ongga campulusua ga.

⁷Itu wan cain cengata inéwai Samaria kudut téku waé. Mai taé de Mori Yésus agu hia: “Téing koé Aku waé inung.”

⁸Ai sanggén taung ata nungku’N poli ngo oné béndar té weli hang.

⁹Mai taé de inéwai Samaria hitu ngong Hia: “Ba’ang néng ga, Ité ca ata Yahudit, tegi kolé waé inung agu aku ata Samaria?” (ai ata Yahudi toé curup taud agu ata Samaria)

¹⁰Mai walé de Mori Yésus agu hia: “Émé pecing le hau latang té widang de Mori Keraéng, agu céing Hia ho’ot curup agu hau: Téing Aku inung! Toé te toé hau tegi agu Hia, agu Hia poli téing agu hau waé mosé.”

¹¹Mai taéd inéwai hitu kamping Hia: “Mori, Ité toé manga émbér té tékun agu délemn perigi ho’o; mai nia main Lité paéngn waé mosé hitu?

¹²Cala Ité kali ata céwé mésén oné mai ema dami hi Yakob, ata téing perigi ho’o agu ami agu ata poli inung dungka le weki run hia agu lawang sanggéd anakn agu paéngn?”

¹³Mai walé de Mori Yésus agu hia: “Céing kaut ata inung waé ho’o hia te masa koléy,

¹⁴maik céing kaut ata inung waé ata kudut téing Laku agu hia, hia toé masa koléy tédéng lén, maik waé ata kudut téing Daku agu hia, kudut ciri mata waé oné weki dihay ata mboas molém taung dengkir tédéng lén.”

¹⁵Mai taéd inéwai hitu kamping Hia: “Mori, téing koé aku waé inung hitu, kudut aku toé masa kolék agu toé maléng mai kolé cé’é ho’og te téku waé.”

¹⁶Mai taé de Mori Yésus agu hia: “Kolé ga, bénta ronam agu mai cé’é ho’oy.”

¹⁷Mai taé de inéwai hitu: “Aku toé manga ronag.” Mai kolé taé de Mori Yésus agu hia: “Tu’ung kéta taé de hau hitu, ai hau toé tu’ung manga ronam,

¹⁸ai hau poli manga limad ronam agu ata mangan ho’o oné hau, toé kolé rona de hau. Oné tombo ho’o molorm hau.”

¹⁹Mai taéd inéwai hitu kamping Hia: “Mori, ho’og baé tu’ungn laku ga, Ité cengata nabit.

²⁰Empo dami suju éta poco ho’os, mai taé de méu ga Yérusalém dé osang baté suju data.”

²¹Mai taé de Mori Yésus agu hia: “Imbi kaut Akuh, oé enu, tiong cai cekengn te méu kudut suju hi Ema toé oné poco ho’o, toé kolé oné Yérusalém.

²²Méu suju apa ata toé baé le méu, ami suju apa ata baé lamin, ai selamak tua oné mai wa’u Yahudin.

²³Maik manga kaut rapak leson agu te ho’on poli cain ga, té isét suju laing tu’ungn kudut suju hi Ema oné Nai agu molor, ai hi Ema lélak ata situt suju nenggitu.

²⁴Mori Keraéng hitu Nai agu céing kaut ata suju Hian, paka suju Hia oné Nai agu molor.”

²⁵Mai walé de inéwai hitu kamping hia: “Pecing laku, hi Mésias kudut maiy, ngong hi Kristus; émé cai Hia, kudut Hia dé ba keréba sanggéd cao-ca oné ami.”

²⁶Mai taé de Mori Yésus agu hia: “Akup Hia, ho’ot rémé gejék agu hau.”

²⁷Du hitu cais ata nungku’N agu lenget kétas, ai Hia rémé tombon agu cengata inéwai. Maik toé kéta cengatan ata cukung te réi: “Apay ngoéng de hau, enu?” ko: “Apay tombo Dité agu hia?”

²⁸Og lego wan gumbangn inéwai hitu nitu, itu kali ngo oné béndarn agu tombo oné sanggén ata manga nitu:

²⁹“Oé, mai é, lélo damang dé! Manga cengata ata ngancéng tombo taung agu aku, sanggéd cao-ca ata poli pandé daku. Cala hitup hi Kristus?”

³⁰Op ngod isé pé’ang oné mai béndar hitu agu ngo oné Mori Yésus.

³¹Rémé nenggitun ata nungku’N nék Hia, mai taéd: “Rabi, hangt di.”

³²Maik mai taé Diha ngong isé: “Oné Aku manga hang ata toé baéy le méu.”

³³Mai taéd ata nungku'N situ cama taud: “Aram manga dadi ata ba cao-ca oné Hia te hang laing?”

³⁴Mai taé de Mori Yésus ngong isé: “Hang Daku ngong émé pandés Laku ngoéng Diha hitut wuat Aku, agu pandé polis gori'N situ.

³⁵Toé weli nenggo’o taé de méu: Téké pat wulang caig cekeng ako? Maik Aku taé agu méu: Lélo dé baling méu agu lélo taung uma ata polis té’éd agu ngancéng te akos.

³⁶Ho’o muing hiat ako tiba lahén, agu hiat ligot wua te mosé tédéng lén, wiga ata wécak wini agu hiat ako cama-cama nisang naid.

³⁷Ai sangged so’o, laing tu’ungn dé go’ét ho’o: Hiat cengata te wécak wini, ata iwon te ako.

³⁸Aku wuat méu te ako apa hitut toé rébok de méud; ata bana ata rébokd méu te ako rébok disé.”

³⁹Agu do kéta ata Samaria oné mai béndar hitu, imbi Hias le dengé tombo de inéwai hitu, ata sakasi: “Hia taé agu aku sanggéd taung apa ata poli pandé dakud.”

⁴⁰Woko cais ata Samaria situ oné Mori Yésus, tegi lisé oné Hia, kudut Hia ka’éng agu iséy; itu kali ka’éngn Hia nitu sua leso béhéngn.

⁴¹Agu céwé do kolé ata situt imbi landing curup Diha,

⁴²mai taéd ngong inéwai hitu: “Imbig lami, maik toé landing taé de hau, ai poli dengé le rug ami Hia, agu pecing lami té Hia tu’ung Ata Selamak de lino.”

⁴³Du sua leso wa ga, Mori Yésus kolé nitu main nggere-oné Galiléa,

⁴⁴ai poli sabi le Run Mori Yésus, toé manga cengatan nabi ata hiangn lata oné tana de run.

⁴⁵Agu du cain Hia oné Galiléa, tiba di’ay lata Galiléa situ ai isé poli ita sanggéd situt pandé Diha oné Yérusalém du ramé hitu, ai rud isé kolé onés du ramé hitu.

⁴⁶Og holés kolé nggere-oné Kana oné tana Galiléan Mori Yésus, oné béo hiot pandé Liha waé ciri anggor. Agu oné Kapérnaum manga cengata pegawé de raja ata rémé betin anakn.

⁴⁷Du dengén liha, caig Mori Yésus oné mai Yudéan nggere-oné Galiléa, itug kali ngon hia oné Mori Yésus agu tegi, dasor Hia mai agu pandé ina anakn, ai anakn hitu kudut matay.

⁴⁸Mai taé de Mori Yésus agu hia: “Émé toé di ita le méu tanda agu tanda lengét, toé di imbi le méu.”

⁴⁹Mai taé de pegawé hitu ngong Hia: “Mori, mait ga rémé koé toé di matan anak daku.”

⁵⁰Mai taé de Mori Yésus agu hia: “Ngoh ga, anak de hau moséy!” Ata hitu imbi curup hitut taé de Mori Yésus agu hia, itug kali ngon.

⁵¹Du ngai oné beréha salangn kin hia, cumang nitus liha mendin kudut te tura agu hia, ai anakn ina gi.

⁵²Mai hia réi agu isé, ongga pisay anakn hitu pu’ung inan. Walé disé: “Oné meseng ongga ca, morag pémpangn.”

⁵³Nitug nukn le pegawé de raja hitu, ina du hitu néng oné méséng Mori Yésus curup agu hia: “Moség anakm.” Itug kali imbi kolén hia lawang agu sanggéd haé kilon.

⁵⁴Agu hitu dé tanda lenget te suan ata pandé de Mori Yésus du kolén oné mai Yudéa nggere-oné Galiléa.