Read Manggarai YOHANÉS 5 Bible Online

YOHANÉS 5 - Manggarai bible

YOHANÉS 5

¹Poli hitu manga leso ramé disét Yahudi, Mori Yésus ngo nggere-oné Yérusalém.

²Oné Yérusalém ruis Lewang Jimbal, manga ca tiwu, ngasangn Bétésda oné curup Ibranin. Oné lupi tiwu Bétésda hitu manga limad molang

³do kétas ata beti halas kid oné molang situ: Mangas ata buta, ata denggo-doat wa’i agu ata péko. [Isé géréng gégon waé tiwu hitu.

⁴Ai émé ného palén wa’u malékat de Morin oné tiwu hitu agu pandé gégo waé hitu; céing kaut ata laring cain cembur oné tiwu hitu ina muing betin; koném beti apa kaut.]

⁵Nitu manga cengata ata telumpulu alo ntaung gi betin.

⁶Du ita le Mori Yésus ata hitu, ngai halas kin nitu, agu ali pecing Liha naisn gé betin, mai taé de Mori Yésus agu ata hitu: “Asa, ngoéngm hau te inah ko?”

⁷Mai walé data hitu: “Mori, toé kéta manga cengatan ata te téti aku nggere-oné tiwu hitu émé rémé gégon waé, hituk di aku kudut ngo lembo oné waé hitug, manga’g ata cai olon.”

⁸Mai taé de Mori Yésus: “To’oh ga, lulungs locém agu lakoh ga.”

⁹Du hitu muing di’a betin ata hitu, itu kali tétis locén agu lakoy gi. Maik leso hitu leso Sabat.

¹⁰Ali hitu, mai curup data tu’a disét Yahudi agu ata hitut poli inan: “Leso ho’o leso Sabat. Hau néka cu’ung locém.”

¹¹Mai walé data hitu: “Ata hiot pandé ina beti daku, Hia hitut taé agu aku: Tétis locém agu lakoh ga.”

¹²Mai réi disé agu hia: “Céing ata hitu te taé agu hau: Tétis locém agu lakoh ga?”

¹³Maik ata hitut poli ina betin, toé baé liha céing ata hitut pandé ina hia, ai Mori Yésus ného baon moran ngo oné réha ata do nitu.

¹⁴Ného cepisan, Mori Yésus cumang agu ata hitu oné Mbaru de Mori Keraéng, mai taén ngong Hia: “Polig dé inan beti de hau, néka pandé ndékok kolé, boto hena koléh le beti ata céwé da’atn.”

¹⁵Ngo nggere-pé’angy ata hitu, tombo liha oné isét tu’ad Yahudi, kali Mori Yésus hitut poli pandé ina hia.

¹⁶Landing hitu, ata tu’ad Yahudi humer kéta naid te pandé susa Mori Yésus, ai Hia pandé ina atay oné leso Sabat.

¹⁷Maik mai taé Diha agu isé: “Ema Daku gori dengkir te ho’on, ali hitu, Aku gori nenggitu kolék.”

¹⁸Méséng nggitu isét tu’ad Yahudi tambang kétas buber naid te mbelé Hia, toé landing Hia pandé mora leso Sabat, maik landing le taé Diha kolé te Mori Keraéng, Ema Run Hia. Ali hitu weki Run Hia te cama agu Mori Keraéngy.

¹⁹Og walé ata tu’ad Yahudi situ le Mori Yésus; “Aku taé agu méu, tadan, Anak toé ngancéng pandé apa kaut le téti nai Run, émé toé ita Liha apa ata pandé de Ema, ai apa ata pandé li Ema, hitu kolé ata pandé de Anak.

²⁰Ai hi Ema momang Anak, itu tara toid Liha oné Anak sanggéd taung situt pandé le weki run Hia ngot Hia toi oné Anak, sanggéd gori ata céwé méséd kolé oné mai gori so’o, wiga lengets méu.

²¹Ai cama ného hi Ema pandé to’o isét mata agu pandé mosés, nenggitu kolé Anak pandé mosé céing kaut ata ngoéng laing Liha.

²²Hi Ema toé manga toto bicar céing ko céing kaut, maik poli téing Liha kuasa te beté bicar hitu oné AnakN,

²³kudut sanggéd ata situt hiang hi Anak cama ného hiang hi Ema. Céing kaut ata toé hiang hi Anak, cama ného toé hiang hi Emay hitut wuat Hia.

²⁴Aku taé agu méu: ata tu’ungn kéta, céing ata séngét tombo Daku, agu imbi Hia hitut wuat Aku, hia haéng mosé tédéng lén, agu toé manga kolé wahéng tédéng lén, ai hia poli hésing oné mai matan nggere-oné mosé.

²⁵Aku taé agu méu: Moro matan, te cai leson, agu polig cain, te sanggéd ata mata dengé reweng de Anak de Mori Keraéng, agu isét dengén, te mosés.

²⁶Ai cama ného hi Ema manga mosé oné weki de Run, nenggitu kolé téing Liha oné Anak manga mosé oné weki de Run.

²⁷Agu Hia poli téing kuasa oné Anak'N kudut beté bicar, ai Hia Anak Manusiay.

²⁸Néka lenget laing le méu, ai tiong te rapak leson, sanggéd ata oné boa dengé reweng Dihas,

²⁹agu isét poli pandé di’a to’os wa mai boad kudut tiba mosé tédéng lén, maik isét poli pandé da’at du rémé moséd, to’o kolés kudut tiba wahéng tédéng lén.

³⁰Aku toé ngancéng pandé apa-apa oné mai weki rug; Aku beté bicar lorong apa ata poli dengé Daku, agu beté bicar Daku agiln ai Aku toé lorong ngoéng de weki Rug, maik lorong ngoéng Diha hitut wuat Aku.

³¹Émé Aku sakasi latang te weki Rug, sakasi Daku hitu, toé molorn;

³²manga ata bana te téing sakasi latang te Aku, agu pecing Laku, sakasi hitut téing Diha laing salangn.

³³Méu poli jera atas oné hi Yohanés, hia poli téing sakasi ata laing salangn.

³⁴Maik Aku toé pinga laing sakasi de manusia; maik tara curupn Laku, kudut ita le méu mosé selamak.

³⁵Hia cama ného culu ata dila te téing gérak, agu toé béhéng le méu mantén gérak hitu.

³⁶Maik manga ca kétay sakasi Daku ata céwé mésén oné mai sakasi di Yohanés, ngong sanggéd taung gori ata poli téing li Ema kamping Aku, kudut pandés Laku. Gori situ kolé ata pandé Daku te ho’on, agu sanggéd pandé Daku situ te téing sakasi latang te Aku, te Aku ho’o wuat le Ema'G.

³⁷Hi Ema ata wuat Aku, Hia koléy ata téing sakasi latang te Aku. Méu toé dé’it manga dengén reweng Diha, nenggitu kolé tara'N, toé dé’it ita le méu,

³⁸agu reweng Diha toé manga temern oné méu, ai méu toé imbi Aku ata jera Diha.

³⁹Bo kali seber tu’ungs méu te bacang Surak Nggeluk, ai bet de méu, le bacang Surak Nggeluk situ haéng le méu mosé tédéng lén. Musuk Surak Nggeluk situ téing sakasi latang té Aku,

⁴⁰maik méu toé mai oné Akum kudut haéng mosé tédéng lén.

⁴¹Aku dé toé nanang hiang le manusiak.

⁴²Maik latang te méu, pecing kéta muing Laku nais. Méu toé manga momang Mori Keraéngs.

⁴³Mai Daku le ngasang de Ema'G, maik méu toé tiba Akum; bo woko mai ata bana le ngasang de run, tiba hia le méu.

⁴⁴Co’o kaut tara ngancéng imbin le méu, émé méu kawé hiang oné mai cama taus, maik toé kawé hiang hitut mai éta mai Mori Keraéng hitut ca-y kali?

⁴⁵Néka nggo’o ma’ut de méu, Aku kudut toto sala de méu oné ranga di Ema; maik ata buang méu hi Musa, hitut deming laing le méu.

⁴⁶Ai émé imbi hi Musa méu, toét-toé méu imbi kolé Akum, ai hia poli tulis latang te Aku.

⁴⁷Maik émé méu toé imbis apa situt tulis diha, co’o kétas kong imbid le méu apa so’ot curup Daku?”