Read Manggarai YOHANÉS 6 Bible Online

YOHANÉS 6 - Manggarai bible

YOHANÉS 6

¹Poli hitu Mori Yésus angkak ngo be sina mai sano Galiléa, ngasang banan sano Tibérias.

²Do kétas ata londang lut Hia, ai ita lisé tanda lenget situt pandé Diha latang te isét beti.

³Mori Yésus ngo nggere-éta goloy agu lonto camas nitu agu ata nungku'N.

⁴Leso adak Paska, adak mésé data Yahudi ruis gi.

⁵Du lélo le Mori Yésus ata baling mai Hia, ita Liha do tu’ungs ata holi te mai oné Hia, mai taé'N ngong hi Pelipus: “Weli nia lité roti te hang data so’o?”

⁶Réi hitu Diha kudut damang hi Pelipus, ai pecing Liha co’o ngai Liha pandén.

⁷Mai walé di Pelipus agu Hia: “Koném weli roti ata sua ratus dinar molé, toé kin rangko latang te isé so’o, alim po pati gici ca pu’ild kaut.”

⁸Cengata oné mai ata nungku'N, hi Andréas asé di Simon Pétrus, pa’u rewengn kamping Hia:

⁹“Ho’o manga anak koé ata manga lima mongkod rotin agu suad ikang; maik capa laings to’ong kudut téing lawa do so’o?”

¹⁰Mai taé de Mori Yésus: “Jera lontos le méu ata do situ.” Nitu tebel kéta remang, itus kali lontod ata do situ, am lima sebud dod ata rona.

¹¹Poli hitu, Mori Yésus emi roti situ, étan wali di’a, agu pati péar oné isét lonto nitu; nenggitu kolés ikang situ pati péars Liha latang te ata dos situ, poro ngoéngd.

¹²Woko poli becurd taung ata do situ, mai taé'N agu ata nungku'N: “Nongko taung sanggéd roti situt récid boto manga ata oké bod.”

¹³Og kali ligot taungs lisé sanggéd roti situt récid agu na’a oné campulusua rotod, penong taung le roti siot lima mongko, ata réci hang diséd.

¹⁴Du poli itan lata do situ tanda lenget ata pandé Diha, mai taéd: “Hia ho’o tu’ung kéta nabi hitut mai oné tana linoy.”

¹⁵Ai pecing le Mori Yésus, isé mai nitus kudut te dadé Hia te teti ciri raja laingy. Itu kali Hia lako lentang hanang koé'N nggere-oné poco.

¹⁶Du mané répg tana, sanggéd ata nungku de Mori Yésus, ngo sili sanos agu léti wangkas

¹⁷te ngo nggere-sina Kapérnaums. Nendep molé tana ga toé tara tuay Mori Yésus,

¹⁸céwén kolé cai bombang mésé ai leng bailn buru warat.

¹⁹Remon wa ga aram lima ko enem kilo métér tadangn bisé wangka disé, ita lisé Mori Yésus lako kauty lobo waé mai ruis wangka disé. Isé rantang kéta taungs.

²⁰Maik mai taé Diha ngong isé: “Aku ho’o, néka rantang!”

²¹Isé te poto Hia nggere-oné wangka, agu ca repa mata kaut caig wangka hitu lupi tacik hitut baté ngo disé.

²²Ného diangn, lawa do situt ngai ka’éng besinad toég manga itan lisé wangka, maik hio ca kali bao. Mori Yésus toé léti cama oné wangka hitut léti data nungku'N, maik ata nungku'N kanang situt ngo.

²³Maik rémé nggitun, tuad pisa wangka bana ata mai oné mai Tibérias ruis baté hang roti disé du poli étan wali di’a le Mori Yésus.

²⁴Lété itan lata do te Mori Yésus toég manga nitun, agu ata nungku'N kolé toé, isé léti wangka situ agu angkak te ngo nggere-oné Kapérnaum kudut kawé Mori Yésus.

²⁵Du cumangn lata do situ Mori Yésus be sina mai tacik hitu, mai taéd ngong Hia: “Rabi, oné pisa kaut Tité cai cé’é ho’od?”

²⁶Mai walé de Mori Yésus: “Aku taé agu méu, moro matan, kawé Aku de méu, toé landing le ita tanda lenget situ, maik ali méu poli hang roti situ agu becurm.

²⁷Seber koém te gori, toé latang te hang bara hitut ngancéng pandé calang laing, maik latang te hang hitut ngancéng te mosé tédéng lén, hitut téing le Anak Manusia oné méu, ai Hia ata poli palasn le Mori Keraéng Ema.”

²⁸Mai walé disé agu Hia: “Apa ata pandé dami kudut ngancéng kawé ata henan oné Nai de Mori Keraéng?”

²⁹Mai walé de Mori Yésus: “Ho’o kéta gori ata henan oné nai de Morin; méu paka imbi oné Hia ata wuat le Mori Keraéng.”

³⁰Mai kolé réi disé: “Tanda apa kéta pandé Dité kudut ita lami, kudut ami imbi Itékm? Gori apa kéta hitut pandé Dité?

³¹Empo dami poli hang Mana oné satar mambak, ného manga ata poli tulisd: Isé poli téing Liha roti éta mai Surga.”

³²Mai walé de Mori Yésus: “Taé tu’ung Daku agu méu; moro-matan, toé hi Musa hitut téing méu roti éta mai Surga, maik roti ata tu’ungn kéta, roti hitut téing de Ema Daku éta mai Surga.

³³Ai roti hitut oné mai Mori Keraéng, hituy roti ata wa’u éta mai Surga agu téing mosé oné lino.”

³⁴Maig taé disé: “Mori, téing tédéng koékm ami roti hitu.”

³⁵Mai wantil de Mori Yésus: “Akuy roti hitut te mosé laing; céing kaut ata mai oné Akuy, hia toé manga darem kolén, agu céing kaut ata imbi Aku, hia toé manga masa kolén.

³⁶Maik Aku poli tombon agu méu: Koném poli ita Akus méu, maik toé kin tara imbi le méu.

³⁷Sanggéd taung ata situt téing li Emag oné Aku, te mai oné Akus, agu céing situt mai cé’é Akus, hia toé okéy Laku.

³⁸Ai Aku poli wa’u éta mai Surga, toé kudut pandé lorong ngoéng Daku, maik kudut lorong Hia hitut poli wuat Aku.

³⁹Agu ho’o kétay ngoéng Dihat wuat Aku, poro sanggéd taung ata poli téingd Liha latang te Aku, néka manga ata morad, maik pandé to’os Laku du cemol lino.

⁴⁰Ai ho’oy ngoéng de Ema Daku; kudut sanggéd taung ata siot poli ita Anak agu imbi Hias, ita mosé tédéng lén agu porong Aku pandé to’o isé du cemol lino.”

⁴¹Itug kali ndu’usd ata Yahudi landing Hia, ai poli taé Diha: “Akuy roti hitut wa’u éta mai Surga.”

⁴²Mai kolé taéd: “Toé néng hi Yésus anak di Yosép Hia ho’o ko, ata endé-eman pecing tu’ungs lité? Co’o kaut Hia tara nenggo’on taén: Aku poli wa’u éta mai Surgag?”

⁴³Mai walé de Mori Yésus agu isé: “Méu néka ndu’usm.

⁴⁴Toé kéta manga cengatan ata mai oné Akum, émé toé poto Liha Ema ata wuat Aku, agu hia pandé to’oy Laku du cemol lino.

⁴⁵Manga tulisd oné surak de sangged nabi: Agu sanggéd isé te toing le Mori Keraéngs. Agu néténg ata, ata poli dengé agu tiba toing oné mai hi Ema, mai cé’é Akus.

⁴⁶Sanggéd situ toé nggo’o ga, te manga atan ata poli itan hi Ema. Hanang Hia hitut mai oné mai Mori Keraéngn, Hiay ata poli ita hi Ema.

⁴⁷Aku taé agu méu: Ata tu’ungn kéta, céing ata imbi Aku, hia te haéng mosé tédéng lén.

⁴⁸Akuy dé roti te mosé laing.

⁴⁹Empo de méu poli hang mana oné satar mambak agu isé poli matad ga.

⁵⁰Ho’oy roti ata wa’u éta mai Surga: Céing kaut ata hangn, hia toé ngancéng matay.

⁵¹Akuy dé roti te mosé laing, ata poli wa’u éta mai Surgag. Céing kaut ata hang roti ho’o, hia te haéng mosé tédéng lén. Roti ho’ot téing Daku, hituy weki Daku ata téing Laku te mosé de lino.”

⁵²Sanggéd ata Yahudi léwang cama taud, agu mai taéd: “Co’oy Hia ho’o ngancéng téing weki'N te hang dité?”

⁵³Mai taé de Mori Yésus: “Aku taé agu méu, ata tu’ungn kéta, émé méu toé hang weki de Anak Manusiam agu inung dara'N, méu toé manga mosé oné wekis.

⁵⁴Céing ata hang weki Daku agu inung dara Daku, hia paéng mosé tédéng lén, agu Aku pandé to’o hia du cemoln lino.

⁵⁵Ai weki Daku tu’ung-tu’ung kéta latang te hang, nenggitu kolé dara Daku, tu’ung-tu’ung te inung.

⁵⁶Céing kaut ata hang Weki Daku agu inung Dara daku, hia ka’éng oné Akuy agu Aku oné hiak.

⁵⁷Cama ného hi Ema hitut mosé ata wuat Aku, agu Aku mosé li Emak, nenggitu kolé, céing ata hang weki Daku, hia hitu te mosé Lakuy.

⁵⁸Ho’o dé roti ata poli wa’u éta mai Surga, toé roti ného hiot hang de empo de méu, agu isé polisg matad. Céing kaut ata hang roti ho’o, hia te haéng mosé tédéng lén.”

⁵⁹Sanggéd so’o, tombos le Mori Yésus oné Kapérnaum du toing oné Mbaru ngaji'N.

⁶⁰Du poli dengéd taung tombo situ, dod ata nungku de Mori Yésus ata curup nenggo’o: “Curup ho’o cirang kéta bailn, céing ata ngancéng ta’ongn te séngétn?”

⁶¹Pecing le Mori Yésus, ngga’uts ata nungku’N landing tombo Diha situ. Mai taé’N ngong isé: “Co’o tombo hitu, pandé gégo imbi de méu ko?

⁶²Co’o émé ita le méu Anak Manusia ngo nggere-éta osang hitut baté ka’éngn?

⁶³Nai de Morin ata téing mosé, weki dité toé kéta manga betua laingn. Sanggéd tombo Daku situ kamping méu, hitus dé nai ata téing mosé.

⁶⁴Maik manga oné mai méun ata toé imbid.” Ai du wangkan muing pecing le Mori Yésus, céing ata toé imbin agu céing kudut te pika Hia.

⁶⁵Mai kolé taé Diha: “Landing hitu poli Laku tombon agu méu: Toé kéta manga cengatan ata te mai oné Aku, émé toé widang li Ema latang te hia.”

⁶⁶Pu’ung nitu maid ga, do kétas ata nungku Diha, hedong toé lut Hia kolés.

⁶⁷Maig taé de Mori Yésus agu rasul situt campulu sua: “Asa méu; toé kolé hedongm ko?”

⁶⁸Mai walé di Simon Pétrus ngong Hia: “Mori, ngo kolé oné céingkm di ami? Reweng Dité tu’ung-tu’ung reweng te mosé tédéng lén;

⁶⁹agu poli imbid lami agu pecing te Ité ata nggeluk oné mai Mori Keraéng.”

⁷⁰Mai walé de Mori Yésus agu isé: “Toé weli weki rug Aku ata pilé méut campulusua ho’o? Maik cengata oné mai méu ata jing da’atn.”

⁷¹Betuan curup Diha ngong hi Yudas anak di Simon Iskariot; koném po hia cengata oné mai isét campulusua, maik hia te pika Mori Yésus.