Read Manggarai YOHANÉS 9 Bible Online

YOHANÉS 9 - Manggarai bible

YOHANÉS 9

¹Du rémé libaN Mori Yésus, ita Liha cengata ata buta pu’ung du loasn.

²Réi data nungkuN oné Hia: “Rabi, céingy ata pandé ndékok, weki run ata ho’o ko ata tu’an, wiga hia loas agu butan?”

³Walé de Mori Yésus: “Toé hia, agu toé kolé ata tu’an, maik sanggéd gori de Mori Keraéng paka ita oné hias.

⁴Ité paka pandé gori Diha hitut wuat Aku du rémé manga kin leso; ai émé caig wié, toé manga cengatan kolé ngancéng te gori.

⁵Du rémé manga oné linog Aku, Akuy gérak de lino.”

⁶Woko poli taungs tombod Liha curup situ, Hia ipo wa tanay, halok Liha ipo hitu agu tana, poli hitu doés oné mata data buta hio bao,

⁷agu mai taén ngong hia: “Ngoh ga, lembo wekim oné tiwu Siloam.” Betuan Siloam, ngong: “Hiat wuat.” Ngoy ata hitu agu lembo wekin, itug kali kolén agu welag matan.

⁸Maik haé béon agu isé situt danong baé hia ata buta agu ata lénggéy, mai taéd: “Cala hia ho’op hiot sanggar-sanggar bon limén te tegi?”

⁹Mai taé data iwod: “Tu’ung, hia ho’o!” Walé kolé data iwod: “Toé hia, maik ata cama tara diha!” Maik taé de run ata buta hitu: “Tu’ung, aku hia!”

¹⁰Mai taé disé ngong hia: “Co’o kaut tara ngancéng welan mata de hau?”

¹¹Mai walén: “Ata hitut ngasangn hi Yésus, acel Liha tana luma du mata daku, agu mai taén ngong aku: Ngo oné tiwu Siloam agu lembo wekim. Itug kali ngog aku, agu du poli lembo wekig, aku ngancéng ita atak.”

¹²Maig taé disé agu hia: “Nia weli Hia ga?” Mai walén: “Toé baég laku.”

¹³Itu kali dadén lisé ata hitut butay baon oné ata Parisi.

¹⁴Leso du acel tana de Mori Yésus agu pandé wela mata data hitu, du leso Sabat.

¹⁵Landing le hitu, isét Parisi réi agu hia, co’oy kaut tara ngancéng welan matam. Mai walén: “Pandé doés Liha tana oné mata daku, poli hitu aku ngo lembo wekig, wiga ho’ok aku ngancéng ita atak.”

¹⁶Mai kolé taéd ata iwod ata Parisi situ: “Ata ho’o toé mai oné mai Mori Keraéngn, ai Hia toé hiang leso Sabaty.” Tungku kolé lata iwod: “Ba’ang kétag néng ga ca ata ndékok ngancéng pandé tanda lenget nenggitu?” Wiga mangag léwang taud cama isén.

¹⁷Mai kole taéd ngong ata buta hitu: “Agu hau ga, co’o weli taé de hau latang te Hia, ai Hia poli pandé wela mata de haun?” Mai walén: “Hia cengata nabiy.”

¹⁸Maik ata Yahudi situ toé imbi lisé, hitut baon hia butay, agu ho’og ita atan, wiga béntan lisé ata tu’an,

¹⁹mai réid agu isé: “Ho’o tu’ung anak de méu hitut taés hia loas agu butan? Émé nggitu co’o tara ngancéng ita atan gé hia?”

²⁰Mai walé data tu’a hitu: “Ata pecing damin kali, hia ho’o anak damiy loas agu butan,

²¹maik co’o kaut hia te ho’on tara ngancéng ita atay, hitug toé pecing lami, agu céing ata pandé wela matan, toé kolé pecingy lami. Réi kaut weki run, tu’ag hia, hia ngancéng tombo latang te weki run.”

²²Tara nenggitun tombo data tu’an, ai isé rantang ata Yahudis, ai isét Yahudi poli ce naid céing ata tura Hia hi Mésias, ata hitu néka ka’éng cama agu iséy.

²³Itu tara nggo’o taé data tu’an: “Hia tu’a gi, réi kaut weki run.”

²⁴Itu kali bénta kolé te suangkalin ata hitut baon butay, mai taéd ngong hia: “Curup kéta ata tu’ungn oné ranga de Mori Keraéng; Pecing lami hia hitu ata ndékoky.”

²⁵Mai walén: “Ata ndékok ko toé ata hitu, toé pecing laku; maik ca kaut pecing daku, aku baon butak, ho’o ga ngancéng ita atak.”

²⁶Mai taéd ngong hia: “Co’oy pandé Diha oné hau? Co’o molé Liha pandé wela matam?”

²⁷Mai walén: “Baog curup daku, maik toé séngét le méu; co’o tara nanang te séngét koléd le méu? Cala méu nanang kolé te ciri ata nungku Diham?”

²⁸Cang agu mbéis mai taéd ngong hia: “Hau ata nungku Diha, maik ami kali ata nungku di Musakm.

²⁹Pecing lami, Mori Keraéng poli curup agu hi Musa, maik latang te Hia toé pecing lami, mai nia main Hia.

³⁰Mai walé data hitu agu isé: “Ba’ang kéta toé pecing de méu, mai nia main Hia, musuk Hia poli pandé wela mata daku.

³¹Pecing lité te Mori Keraéng toé séngét ata ndékoky maik ata nggeluk agu ata pandé sanggéd ngoéng Diha.

³²Pu’ung danong main dengkir te ho’on, toé kéta dengé dé’it te manga ata hitut ngancéng pandé wela mata data hitut loas agu butan.

³³Émé toé mai oné mai Mori Keraéngn ata hitu, Hia toé ngancéng pandé apa-apay.

³⁴Mai walé disé: “Hau ho’o loas kéta déméng agu ndékokm, jari hau kudut toing amih?” Itu kali wur nggere-pé’angn hia lisé.

³⁵Dengé le Mori Yésus, te hia poli wur nggere-pé’angn lisé. Poli hitu Mori Yésus cumang agu hiay, mai taén: “Imbi le hau Anak Manusia?”

³⁶Mai walé data hitu: “Céing néng Hia Mori? Kudut aku imbi Hiak.”

³⁷Mai taé de Mori Yésus ngong hia: “Hau toé kanang ita Hiah; maik Hia ho’ot rémé tombon agu hau, Hiap hitu!”

³⁸Mai taén: “Imbi laku Mori.” Itu kali sujun, io Hian.

³⁹Mai taé de Mori Yésus: “Aku mai oné linok te beté-bicar kudut céing ata toé ita, ngancéng itan, agu kudut céing ata ngancéng ita atan ciri butay.”

⁴⁰Sanggéd tombo situ, dengé lata pisa taus ata Parisi ata manga nitus, agu mai taéd ngong Hia: “Co’o weli betuan hitu ga, ami kolé butakm?”

⁴¹Walé de Mori Yésus agu isé: “Émé buta méu, toé manga ndékoks; maik landing le taé rus méu: Ami ita atakm, itu tara manga kin ndékoks.”