Read Manggarai TOMBO PÉTÉ GORI DE RASUL-RASUL 19 Bible Online

TOMBO PÉTÉ GORI DE RASUL-RASUL 19 - Manggarai bible

TOMBO PÉTÉ GORI DE RASUL-RASUL 19

¹Du hi Apolos manga kin oné Korintus, hi Paulus polig lako-léok temu tana hitu agu cai oné Efésus. Nitu cumangs liha pisa taus ata nungku.

²Mai taén ngong isé: “Poli ko toé tiban le méu Nai Nggeluk du imbis méu?” Maik mai walé disé agu hia: “Toé di, ngot ami kolé toé dé’it manga dengén lami te manga Nai Nggeluk.”

³Mai taé di Paulus ngong isé: “Émé nggitu, apa betuan cebong de méu hitu danong?” Mai walé disé: “Cama ného cebong ata toing di Yohanés.”

⁴Mai taé di Paulus: “Cebong di Yohanés, cebong tanda teser; agu hi Yohanés hitu curup oné ata do, te isé paka imbi oné Cengata hitut mai poli hia, ngong Mori Yésus.”

⁵Du dengén lisé curup hitu, isé cebong oné ngasang de Mori Yésus.

⁶Du hi Paulus témba limén lobo sa’i disé, wa’uy Nai Nggeluk oné isé agu wangkag isé curup dod agu tombo pedé de Mori Keraéng.

⁷Sanggéd taung isé, aik campulusua atas dod.

⁸Tédéng telu wulang hi Paulus ngo oné mbaru ngaji nituy agu si’ang kéta tombon agu léwang sina-cé’é agu isé kudut imbi tu’ung lisé latang te Adak de Mori Keraéng.

⁹Maik manga pisa taus ata teger kid naid. Isé toé gorid te imbi kaut, ngot pocu kali Salang de Mori Keraéng olo mai ranga data do. Landing hitu hi Paulus legong isé kudut cama-cama agu ata nungkun ngo toing ata oné mbaru sekola Tiranus.

¹⁰Toing ata ho’o pandé liha tédéng sua ntaung. Wiga sanggéd ata Yahudi agu ata Yunani oné propinsi Asia, dengé keréba reweng de Mori Keraéngs.

¹¹Lut limé di Paulus, Mori Keraéng pandé tanda lenget ata mésé kéta

¹²ngot ba kaut sapu-soé ko towé ata poli dé’it paké li Paulus agu témba oné sanggéd ata beti, mora taungs beti disé agu pé’ang taungs jing da’at.

¹³Manga kolé pisa taus ata mbeko disét Yahudi ata lako léok tana hitu, damang caro ngasang de Mori Yésus oné isét hena le tatong de jing da’at, mai taéd: “Aku mbér méu, le ngasang de Mori Yésus hitut keréba li Paulus.”

¹⁴Isét pandé nenggitu ata pitus, anak de cengata imam kepala Yahudi ngasangn hi Skéwa.

¹⁵Maik jing da’at hitu walé kolé: “Hi Yésus hitu pecing laku, agu hi Paulus baé laku, maik méu ga, céing méu?”

¹⁶Itu kali ata hitut hena le damang de jing da’at hitu tékar, ramek agu pandé koda sanggéd taung isét pitu situ wiga losi taungs isé déméng lacod oné mai mbaru data hitu, agu réu taung wekid.

¹⁷Tombo hitu pecing taung le sanggéd ata Yahudi agu ata Yunani oné béndar Éfésus wiga rantang kéta taungs isé, agu tambang kéta pecing latan ngasang de Mori Yésus.

¹⁸Do kolé oné mai isét poli imbid, mais agu tura oné ranga data do, te isé kolé poli manté pandé nenggitu.

¹⁹Do kolé oné mai isé ata poli dé’it pandé mbeko, nekek taungs surak-surakd, itu kali tapa taungs olo mai ranga data do. Émé pikas surak situ aik lima mpulu sebu séng pérak.

²⁰Ali salang ho’o kolé cirik wéro-émbon reweng de Mori Keraéng agu tambang mésé kuasan.

²¹Du polin raja hitu, ali sur de Nai Nggeluk, hi Paulus wérét kudut ngo oné Yérusalém palé tana Makédonia agu Akhaya. Mai taén: “Poli la’at nitug, aku kolé paka ngo pé’ang Roma.”

²²Itu kali hia jera sua taus ata campén, hi Timotéus agu hi Érastus, pado olos ngo oné Makédonia, maik weki run hia remo béhéng kin ka’éng oné tana Asia.

²³Aik du hitug wangkan ngai-ngaok mésé latang te Salang de Mori Keraéng.

²⁴Comongn ali cengata ata rona, ngasangn hi Démétrius, cengata tukang pérak, ata pandé tato de déwa Artémis oné mai pérak. Pandé tato hitu diha cir ringgi do latang te tukang-tukangn.

²⁵Hia pandé nekek taung isé agu sanggéd ata tukang bana ata gori cama ného isé, mai taéd: “Asé-ka’én, pecing le méu, tara cébon mosé dité ali dani de gori ho’o!

²⁶Te ho’on ita agu dengé le rus méu taé di Paulus. Toé hanang cé’é Éfésus, maik dengkir temu tana Asia, poli awar agu pandé wéléng ata do ali taé, apa ata pandé le limé de manusia toé ngancéng ciri déway.

²⁷Ali hitu toé hanang gori dité ata lengga lata, maik tato Artémis kolé, déwa mésé hitu, te moray ngasangn. Céwén kolé weki run déwa Artémis ata suju le ata Asia agu oné temu tana lino hitut gauk di’a, te moray ngasang mésén.”

²⁸Dengé hitus, teka kaut rabod, itus kali ciékd: “Léwé mosém Artémis, déwa data Éfésus!”

²⁹Sanggén taung ata oné béndar cirik cebels agu isé ramé-ramé ngo oné mbaru nempung de lawa do agu sorok hi Gayus agu hi Aristarkhus, isét sua so’o ata Makédonia agu haé lako di Paulus.

³⁰Hi Paulus nanang kudut ngo oné bahi-réha ro’éng situ landing ata nungku diha toé sendo hia.

³¹Ngot pisa taus ata mésé haé reba de Paulus oné-mai tana Asia, pedé agu dedek hia, kudut néka ngo oné mbaru nempung de lawa do hitu.

³²Lari nggitun ata nempung oné mbaru hitu ngai-ngaoks, hiat cengata taé nenggo’o, ata iwon taé nenggitu, ai ata situt nempung cebel taungs, ai do kéta oné mai isé ata toé pecing kudut co’od isé tara nempungd.

³³Itu kali cengata ata ngasangn hi Aléksandér dur nggere-oloy lisét Yahudi. Ai le nuk disét Yahudi hi Aléksandér ata campitn tara mangan ngai-ngaok hitu. Hidi-hadan hia pépas limén kudut tombo te kambé olo-mai ranga de ro’éng situ.

³⁴Maik du pecing lisé te hia ata Yahudiy, ciéks isé tédéng ho’ot sua jam béhéngn: “Léwé mosém Artémis, déwa data Éfésus!”

³⁵Cemoln, cengata pagawé béndar, pandé lik ata do situ, agu mai taén: “Oé ata Éfésus! Céing ata oné lino ho’o ata toé pecing te béndar Éfésus ho’o ata lami mbaru de déwa mésé Artémis agu taton hitut wa’u éta mai awangn?

³⁶Toé kéta manga cengatan ata ngancéng te palin, itu tara néka ngai-ngaok agu néka hidi-hada te pandé hitu-ho’o.

³⁷Ai méu poli dadé ata do so’o, nggere-cé’é ho’o, koném po toé isé ata wencan tato déwi dité agu toé loér ngasangn.

³⁸Jari, émé hi Démétrius agu tukang-tukang diha manga barod latang te cengata-cengata, bom toé manga adak agu gubernur te beté-bicar. Ngo kaut oné adak situ émé manga bicar.

³⁹Maik émé manga sékék banas kali méu, co’om sékéks hitu beté kaut oné lonto léok de ro’éng.

⁴⁰Ai calangt ité ho’o ga, mangkong ité ata wangkan pandé ngai-ngaok leso ho’o, ai toé manga campitn ata ngancéng baro lité kudut pandé molor nempung data so’ot ngai-ngaok.”

⁴¹Ali curup hitu diha, wiga wéar kéta taungs ro’éng situt lari nempungd.