Read Manggarai TOMBO PÉTÉ GORI DE RASUL-RASUL 21 Bible Online

TOMBO PÉTÉ GORI DE RASUL-RASUL 21 - Manggarai bible

TOMBO PÉTÉ GORI DE RASUL-RASUL 21

¹Du poli bécang agu isé, ami lajar nggere-oné nuca Kos. Ného diangn caikm ami oné nuca Rodos, agu mai nitu main ngo oné béndar Patara.

²Oné Patara ami haéng kepal ata kudut lajar nggere-oné tana Fénisia. Ami léti kepal hitu, itug kali ngogm.

³Poli hitu ita nuca Siprus baling racap léo, maik lagé kaut lami agu ngo oné tana Siria. Cemoln ga caikm ami oné Tirus, ai sanggéd ceca oné-mai kepal paka wa’u oné béndar hitu.

⁴Ami ngo léjong oné sanggéd ata nungku agu ka’éng nitu tédéng pitu leso. Ali saok de Nai Nggeluk sanggéd ata nungku toing hi Paulus kudut hia néka ngo oné Yérusalém.

⁵Maik du polig leson ka’éng cama, ami lako rudakm. Sanggéd ata nungku agu winad, anakd, podo ami haéng pé’ang mai béndar; oné lupi nanga ami tikul te ngaji cama laing.

⁶Du poli pele-kana, ami léti kepal, agu isé kolé mbarud.

⁷Oné mai Tirus, ami cai oné béndar Ptolémais ai nitu dopon lajar dami. Ami téi tabé oné sanggéd asé-ka’é ca imbi agu ka’éng ca leso oné bahi-réha isé.

⁸Ného diangn ami ngo nitu mai’gm agu cai oné Kaisaréa. Ami ngo oné mbaru de cengata ata ba keréba di’a, ngasangn hi Pelipus. Hia cengata oné mai ata pitu siot poli pilé oné Yérusalém, agu ami ka’éng oné mbaru dihakm.

⁹Hi Pelipus manga pat taus anak molasn ata tiba tabing kudut te ba pedé de Mori Keraéng.

¹⁰Poli pisa leso ami ka’éng nitu, mai cengata nabi oné-mai Yudéa, ngasangn hi Agabus.

¹¹Hia mai oné ami, itu kali emi kanteng di Paulus, cang agu pongo wa’i agu limén, mai taé diha: “Nggo’o taé de Nai Nggeluk: Neho nggo’o koléy dé, mori de kanténg ho’o te pongo lata Yahudi oné Yérusalém agu téing oné limé de wa’u bana.”

¹²Dengé tombo hitu, ami agu sanggéd ata oné osang hitu tegi kudut hi Paulus néka ngo oné Yérusalém.

¹³Maik walé di Paulus: “Co’o tara rétangs méu, wiga pandé wéong nai daku? Ai aku ho’o, lilek toé hanang latang te pongo, maik latang te mata kolé oné Yérusalém le ngasang de Mori Yésus.”

¹⁴Ai hia toé lorong te tiba toing dami, ndong kaut lami nanang diha, maik bengkes dami, “Jari koéy ngoéng de Mori Keraéng!”

¹⁵Du poli ka’éng pisa leso oné Kaisaréa, og kali mengkekg ami, te ngo oné Yérusalém.

¹⁶Cama laing agu ami lut kolé pisa taus ata nungku oné mai Kaisaréa. Isé dadé ami ngo oné mbaru diha Manason. Hia oné mai Siprusn agu remog béhéngn ciri ata nungku. Ami te ka’éng oné mbaru dihakm.

¹⁷Du caig ami oné Yérusalém, sanggéd asé-ka’é ca imbi tiba ami ali nisang naid.

¹⁸Ného diangn, ngo hi Paulus cama laing agu ami la’at hi Yakobus; sanggéd ata tu’a laingn manga taung rangad nitu.

¹⁹Hi Paulus téi tabé agu isé, og kali tombo taung apa ata poli pandé le Mori Keraéng oné bahi-réha wa’u bana loréng gori diha.

²⁰Dengé tombo hitus isé naring Mori Keraéngs. Og kali mai taéd agu hi Paulus: “Asé-ka’én, lélo dé, do kolé ata Yahudi poli imbid agu sanggéd isé seber te mo’éng wintuk Taurat.

²¹Maik dengé lisé toing dité oné sanggén ata Yahudi situt ka’éng oné bahi-réha wa’u bana, kudut legong wintuk di Musa, ai nggo’o taé dité, kudut néka sunats sanggéd anak disé agu néka mosé lorong ruku dité.

²²Jari, co’o kali ho’o ga? Toét-toé dengé lisé te cait ité cé’é ho’o ga.

²³Landing hitu pandé ga, apa ho’o te taé lami: Oné bahi-réha ami manga pat taus ata lari radid.

²⁴Dadé isé cama laing agu ités, pandé di’as adak nggélok weki cama laing agu isé, maik tanggong lités rocang disé, wiga isé ngancéng longké wukd. Itug kali pecing taung lata do te sanggéd keréba situt dengé disé latang te weki dité toé molord, maik ité, kali seber kid te mo’éng wintuk Taurat.

²⁵Maik latang te wa’u bana situt poli imbid, polig lami tulisd taung wérét dami. Isé paka néka hang siot poli takung oné-mai imbi pina-naéng, néka hang dara, néka hang nuru de kaka siot mata le hajel molé, agu oné mai ngoéng ata.”

²⁶Ného diangn hi Paulus dadé ata situ cama laing agu hia, agu hia pandé nggélok wekin cama-cama agu isé situ, itu kali ngo oné Mbaru de Mori Keraéng, kudut tombo cepisa polin adak nggélok weki hitu agu takung nggeluk latang te néténg-néténg isé.

²⁷Du tiong te poli pitu leso hitu, sanggéd ata Yahudi situt mai oné mai tana Asia, ita hi Paulus oné Mbaru de Mori Keraéng, itu kali cocong ro’éngd agu deko hia,

²⁸cang agu ciékd: “Oé ata Israél, campé yé! Ho’oy ata hiot nia-nia kaut wan toing sanggén ata kudut dungkang wa’u dité agu néka lorong wintuk Taurat agu osang nggeluk ho’o! Te ho’on hia dadé ata Yunani kolé nggere-oné Mbaru de Mori Keraéng agu pandé rinek osang nggeluk ho’o.”

²⁹Ai poli itan lisé hi Trofimus oné mai Éfésus, bolon cama-cama agu hi Paulus oné béndar agu bet disé hi Paulus poli dadé hia nggere-oné Mbaru de Mori Keraéng.

³⁰Itu kali gagur-wélék oné béndar agu lawa do mai nemper, itu kali deko hi Paulus agu sorok hia nggere-pé’ang mai Mbaru de Mori Keraéng agu du hitu muing sanggéd lewang Mbaru de Mori Keraéng hitu tadus.

³¹Lari kéta kudut mbelé hia, cai keréba oné kepala serdadu te sanggén béndar Yérusalém, gagur-wélék.

³²Kepala serdadu hitu hidi-hadan ngo agu serdadun agu cai oné beréha ata do situ. Du itan lisé hia agu sanggéd serdadu situ, itu kali toé onggan lisé hi Paulus.

³³Kepala serdadu hitu hesé ruis hi Paulus, deko agu jera pongo hia le suad ranté, itu kali rein, céing hia agu apa ata poli pandé diha.

³⁴Maik oné mai ata do situ, manga ata ciék oné hia nenggo’o, manga kolé ata ciék nenggitu. Le ngai-ngaok hitu, kepala serdadu toé kong pecing, apa cetu’ungn ata poli jarin. Landing hitu hia jera dadé hi Paulus oné markas de serdadu.

³⁵Du cai oné redé mbaru hi Paulus rakang moléy le serdadu, ai do bail lawa ata rabo.

³⁶Sanggéd taung ro’éng londang lut hias, cang agu ciékd: “Co’om mbelé kauty!”

³⁷Du kudut dadé hi Paulus nggere-oné markas de serdadu, mai taén ngong kepala serdadu hitu: “Ngancéng ko toék aku tombo cekoén agu ité?” Mai walé de kepala serdadu: “Oé, kali pecing le hau curup Yunani?

³⁸Jari, toé néng hau ata Mesir ho’ot ho’o koé di, pandé rampas agu wéndo pat sebu ata siot teti harat agu losi nggere-oné satar mambak?”

³⁹Mai walé di Paulus: “Aku ho’o ata Yahudik, oné mai béndar Tarsus, ro’éng oné mai béndar hitut mboun ngasangn oné tana Kilikia; tegi laku kudut sendo koé aku te curup oné ata do so’o.”

⁴⁰Du poli sendon hi Paulus le serdadu, ngo hia, hesé lobo redé mbaru agu pépas limén nggere-oné ata do situ; du lik kéta ga, itug kali wangkag hia tombon agu isé le curup Ibrani, nggo’o taén: